Anthony: A Tim wakoma’po. Nasangala kwitana nobe monka.

Tim: Nami nasangala kukumona.

Anthony: Nadi nakuselela Kiteba kya Mulami ne Réveillez-vous ! bya panopano. Nanga’mba usa kusangela bishinte bidi mu ano mapepala.

Tim: Ubafu’ko. Nasangala pa kukumona monka dyalelo, mwanda nsaka ku kwipangula kipangujo kimo.

Anthony: Le i kipangujo’ka?

Tim: Difuku dimo nesambile na muntu umo otwingilanga nandi. Namulombwele bidi mu tubuku towampele ne muswelo otwikele tusangaja. Ino aye’mba ke biyampepo netutange mwanda Batumoni ba Yehova kebetabijepo mudi Yesu. Nanshi ye nankyo? Na mulombola’mba nsakumwipangula shi waiya dikwabo.

Anthony: Ubalonga biyampe kungipangula. I biyampe kwipangula Batumoni bene, kupita’ko kwipangula bakwabo. Nanshi, mwene’mba i kitabuke buya kuyuka bitabije muntu na ku mwipangula aye mwine pa kyaba kya kwipangula bantu bangi?

Tim: Nami nalangile nankyo.

Anthony: Bubine bwine i buno amba, Batumoni ba Yehova betabije mudi Yesu. Nakusapwila, tuyukile’mba, kwitabija mudi Yesu i kintu kya mvubu mpata pa kukapanda.

Tim: Nadi nanga’mba mumwitabije, ino mwingidi nami panene’mba kemwitabijepo mudi Yesu, natulumukile. Mona’mba ketwesambile nobe pa uno mwanda.

Anthony: Le ulanga namani shi nakutangila mu Bible mavese akomeneja mvubu ya kwitabija mudi Yesu? Ano mavese engidijibwanga divule na Batumoni ba Yehova mu busapudi.

Tim: I biyampe.

Anthony: I biyampe tushilule na byānene Yesu aye mwine mu Yoano 14:6. Bino binenwa Yesu wesambile’byo na mutumibwa wandi umo. Tutanga’mba: “Yesu wamunena’mba: ‘Ami ne dishinda ne bubine ne būmi. I kutupu wiya kudi Tata poso upityila padi ami.’” Mungya uno vese le i dishinda’ka dimo ditwala kudi Tata?

Tim: I kupityila kudi Yesu.

Anthony: I amo. Ne Batumoni ba Yehova nabo betabije’nka nankyo. Nkwipangule’po bidi: Molangila Leza usakanga muntu alombele kwadi kupityila mu dijina dya ani?

Tim: I mu dijina dya Yesu.

Anthony: Ubaase. O mwanda milombelo yonso yonombelanga nenanga’yo kupityila mu dijina dya Yesu. Momulombedilanga ne Batumoni ba Yehova bonso.

Tim: Kidi na mvubu kuyuka kino.

Anthony: Kisonekwa kikwabo kyotubwanya kubandaula i kya Yoano 3:16. Uno vese udi na kamweno mpata o mwanda witwanga bu Evanjile mityetye. Kokunena’mba, shi byadi bibwanika kutyanga pamo byonso bilembelwe bitala pa būmi  bwa Yesu ne mwingilo wandi, kwibyela mu vese umo, padi i enka uno vese’u. Ubwanya bidi kutanga kino kisonekwa.

Tim: Kinena’mba: “Mwanda Leza byaasenswe ino ntanda bikatampe mpata, wapēne wandi Mwana mubutulwe bunka, amba ense ulombola lwitabijo mudi aye kakyonakanibwa, ino amone būmi bwa nyeke.”

Anthony: Wafwako. Mwene’mba uyukile senene uno vese?

Tim: Muyukile, kendi mwivwane’ye misunsa mivule kadi mumonanga balembe’ye ne pa mapano patalwa na bantu bonso.

Anthony: I vese mutumbe. Mutale monka na katentekeji, ta mutyima ku byobya byānene Yesu. Wānene’mba buswe bwa Leza bukwashanga bantu bamone būmi bwa nyeke—ino enka shi tulonge bika?

Tim: Tulombole lwitabijo.

Anthony: I amo. Nakampata kwitabija mudi Mwana mubutulwe bunka, Yesu Kidishitu. Ne kino kilombola’mba—kwitabija mudi Yesu kushitulanga kibelo kya kumona būmi bwa nyeke—enka mokilombwedilwe pa paje 2 wa dino dipepala dyonakupaila. I palombolwe myanda imo idi mu kitungo kya Kiteba kya Mulami, amba dino dipepala “dikankamikanga bantu bekale na lwitabijo mudi Yesu Kidishitu wētufwidile amba netu tukamone būmi bwa nyeke, kadi pano ke mubikale bu Mulopwe wa Bulopwe bwa Leza.”

Tim: I amo. Dipepala dyenu dilombola’mba Batumoni ba Yehova betabije mudi Yesu.

Anthony: Ubaase.

Tim: Ino, le mwanda waka bantu banenanga’mba kemwitabijepo mudi Yesu?

Anthony: Padi kudi bubinga buvule bunenenanga bantu uno muswelo. Kyaba kimo banenanga namino mwanda’tu baivwene bakwabo banena’byo. Nansha padi bafundijibwe uno mumweno mubi na bapashitele babo.

Tim: Navuluka—padi bantu bamo banenanga bu kemwitabijepo mudi Yesu mwanda mwitelanga bu Batumoni ba Yehova, ke bu Batumonipo ba Yesu.

Anthony: Bwabo nabo bubwanya kwikala bubinga.

Tim: Mwanda waka mwisambilanga divule padi Yehova?

Anthony: Dibajinji bidi, tukulupile’mba kidi na mvubu kwingidija dijina dya bunka dya Leza, Yehova—monka mwālongele wandi mwana Yesu. Langulukila bidi pa byānene Yesu mu milombelo kudi Shandi. Bidi mu Yoano 17:26. Le ubwanya kutanga uno vese?

Tim: Biyampe. “Nayukanya dijina dyobe kobadi kadi nkediyukanya, amba buswe bowaunsenswe bwikale mobadi kadi ami nami umbumo nabo.”

Anthony: Wafwa’ko. Ubamone, Yesu wānene’mba wayukanya dijina dya Leza. Le uyukile mwanda waka?

Tim: Uhm. Nkiyukile.

Anthony: Biyampe, tubwanya nanshi kutanga’ko kisonekwa kikwabo kitōkeja uno mwanda. Navuluka Bilongwa 2:21. Tutanga’mba: “Ense wa kwita dijina dya Yehova ukapandanga.” Ino, pano mona’mba ubwanya kwitabija’mba pa kupanda kilomba kwita pa dijina dya Yehova, i kimweke patōka’mba Yesu nandi wādi ujingulwile kino kisakibwa.

Tim: I bya bine.

Anthony: Nanshi, Yesu wādi uyukile’mba kidi na mvubu mpata balondi bandi bayuke dijina dya Leza, ne kwidingidija mwanda wa bamone lupandilo. Kadi buno i bubinga bukatampe bwine botwisambila bininge padi Yehova. Tuyukile’mba kidi na mvubu kuyukanya dijina dya bunka dya Leza kadi tukabwanya kukwasha bakwabo bete pa dino dijina.

Tim: Ino nansha shi bantu bapela kuyuka dijina dya Leza ne kwidingidija patōkelela, shi ubatela’tu Leza abo basakwimvwa.

Anthony: Eyo bibwanika. Ino nansha nabya, Leza paetulombola dijina dyandi dya bunka i mwitupēleleje mwanda wa tumufwene.

Tim: Le ukimba kunena bika?

 Anthony: Tulanguluke’po bidi: Padi ketwadipo tusaka kuyuka dijina dya Mosesa. Padi twadi ba kumuyuka bu muntu wākalañenye Kalunga Katyila ne wāpelwe Mbila Dikumi kubapu. Nansha ke Noa—Le kyadi na mvubu kuyuka dyandi dijina? Twadi’tu ba kumuyuka bu muntu wāubakile safina, wāpandija kisaka kyandi ne banyama kubapu. Nansha ke Yesu, wādi’tu wa kuyukwa’tu bu muntu umo wātūkile mūlu ne kufwa pa mwanda wa bubi bwetu kubapu. Mwene i amo?

Tim: Mona’mba i amo.

Anthony: Ino Leza wāsakile tuyuke majina a bano bantu. Kuyuka abo majina i kulengeje twivwanije senene shē manga yabo. Nansha byoketwemwene na Mosesa, Noa ne Yesu, kuyuka majina abo i kukwashe twibamone bu bantu badi’ko binebine.

Tim: Bine udi na bubinga, nkyadi’po nanga namino dibajinji!

Anthony: Ino kudi bubinga bukwabo butelela bininge Batumoni ba Yehova dijina dya bunka dya Leza. Tusakanga kukwasha bantu batamije lwitabijo mudi Yehova na kumumona bu muntu udi’ko bine obabwanya kupwana nandi. Kadi, tukomenejanga bininge mwingilo waingila mwanda wa kwitupandija. Padi tubwanya ne kutanga kisonekwa kimo kitenga uno mwanda.

Tim: Biyampe.

Anthony: Twadi tubatange Yoano 14:6. Vuluka, Yesu wānene amba aye ye “dishinda ne bubine ne būmi.” Leka tujokele bidi ku mavese adi kūlu, tuyuke binenwa bidi mu Yoano 14:1. Le ubwanya kutanga byanene Yesu kumfulo kwa uno vese?

Tim: Biyampe. Panena’mba: “Lombolai lwitabijo mudi Leza, lombolai lwitabijo ne mudi ami.”

Anthony: Ubafu’ko. Le ulanga lwitabijo lwa bine i shi tubasake’ni nansha i kintu kyotufwaninwe kulonga? Le kwitabija mudi Yesu kulombola’mba ketufwaninwepo kwitabija mudi Yehova?

Tim: Mhm. Yesu wānene’mba i bonso babidi.

Anthony: Ubanena bya bine. Kadi nkulupile’mba, witabije’mba kunena bitupu’mba twitabije mudi Leza ne mudi Yesu kekubwenepo. Na bubine, būmi bwetu bufwaninwe kukwatañana na byotwitabije.

Tim: I bya bine.

Anthony: Le penepa, muntu ubwanya kulombola namani amba witabije mudi Leza ne mudi Yesu? Shi uswile nabya tukabandaula kino kipangujo difuku dikwabo. *

Tim: Bine nkasangala.