Megan: A Shirley, wakumapo. Nasangele bininge ponakumwene ku Kivulukilo kya lufu lwa Yesu Kidishitu yenga mupite. * Lelo wamwene namani byashintulwilwe ku kuno kupwila?

Shirley: Nasangele pa kutanwa’ko, inoko mona’mba nkyaivwanijepo’tu biyampe myanda yanenenwe’ko. Monanga bantu bavuluka kubutulwa kwa Yesu pa Noele ne lusangukilo lwandi pa Pashika, inoko kashā kyāmwene muntu nansha uno uvuluka lufu lwandi.

Megan: I bya bine, Noele ne Pashika i masobo matumbe pano pa ntanda ponso. Inoko Batumoni bamonanga’mba i biyampe kuvuluka lufu lwa Yesu. Shi udi’ko na kitatyi nansha kityetye, nkasangela kukusapwila bubinga bwine.

Shirley: Biyampe, ndi’ko na kyaba.

Megan: Na bubine, Batumoni ba Yehova bavulukanga lufu lwa Yesu mwanda aye mwine wāfundije balondi bandi kulonga namino. Tala byalongekele bufuku kumeso kwa Yesu kwipaibwa. Lelo kodi mwivwane besambila pa bidibwa bya pa bula byaādile na balondi bandi ba kikōkeji?

Shirley: Le i Kya ku Meza kyosaka kunena?

Megan: En-en. Kitwanga ne bu Bidibwa bya Kyolwa bya Mfumwetu. Ku bino bidibwa, Yesu wāpele’ko balondi bandi bulombodi bupotoloke. Le ubwanya kutanga binenwa byandi bidi mu Luka 22:19?

Shirley: BIYAMPE. “Kadi, watekuna mukate nao, wafwija’ko, weutyumuna, webapa’o kanena’mba: ‘Uno welekeja umbidi wami, usa kupānwa pa mwanda wenu. Longai nyeke namino ke pa kumvulukila.’”

Megan: Wafwa’ko. Tala bulombodi bwa Yesu mu musemwa wa mfulo wa uno vese: “Longai nyeke namino ke pa kumvulukila.” Kumeso’tu kwa kulombola balondi bandi kumuvuluka, Yesu wālombwele kine kyobādi bafwaninwe kumuvulukila. Wānene amba ukapāna būmi bwandi pa mwanda wa balondi bandi. Yesu wālombwele ino milangwe mu binenwa biifwene na bino bitanwa mu Mateo 20:28. Uno vese unena amba: “Monka mwaidile Mwanā muntu, ke mwandapo wa kwingidilwa, aa, ino i kwingidila bantu ne kupāna muya wandi ke kinkūlwa kya kukūla bavule bene.” Mu kīpi’tu, kino kyo kibungilanga Batumoni ba Yehova mwaka ne mwaka mwanda wa kuvuluka luvu lwa Yesu​—kuvuluka kitapwa kya kinkūlwa kyāpene Yesu. Lufu lwandi lukaletela būmi ku bantu bonso ba kikōkeji.

Shirley: Ngivwananga bantu banena’mba Yesu wāfwile mwanda wa tumone būmi. Inoko leka’tu  nene na bubine, nkomenwanga kwivwanija mobyabwanikile.

Megan: Bine abe Shirley, kudipo bunka. Mwanda utala kitapwa kya kinkūlwa i mwanda mukatampe. Inoko kadi i bubinebine bwa kutendelwa butanwa mu Kinenwa kya Leza. E! Leka bidi, le ukidi’ko na kyaba?

Shirley: En-en nakidi’ko na kakyaba katyetye.

Megan: Biyampe. Natangile’tu myanda itala kinkūlwa, nsa kukushintulwila’yo mu muswelo upēla.

Shirley: BIYAMPE.

Megan: Pa kusaka amba twivwanije kinkūlwa, tufwaninwe bidi kuyuka ngikadilo yāikele’ko kitatyi kyālongele ba Adama ne Eva bubi mu budimi bwa Edena. Pa kwivwanija kino, tutange pamo Loma 6:​23. Le bibwanika utange uno vese?

Shirley: Biyampe. Panena amba: “Mpalo ipala bubi i lufu, ino kyabuntu kipāna Leza i būmi bwa nyeke mudi Kidishitu Yesu Mfumwetu.”

Megan: Wafwa’ko. Leka tubandaule bino binenwa. Dibajinji, tala mushilwila uno vese: “Mpalo ipala bubi i lufu.” Kino i kijila kipēla kyātudile’ko Leza tamba ku ngalwilo kwa mānga ya muntu​—mpalo nansha mfuto ya bubi i lufu. Shako, ku ngalwilo kekwādipo kipya-mambo nansha umo. Ba Adama ne Eva bāpangilwe babwaninine, ne babo bana bonso bādi bakubutulwa babwaninine. Pa kino kekwadipo muntu nansha umo wadi wa kufwa. Ba Adama ne Eva pamo ne lutundu lwabo lonso bādi na kyepelo kya būmi bwa nyeke bwa nsangaji. Inoko monka motuyukile, kebyakikelepo namino, le baikele babwaninine?

Shirley: Aa. Ba Adama ne Eva bādile ku mutyi obādi bebajidikile.

Megan: I bya bine. Pobālongele namino​—pādile ba Adama ne Eva bāpelele kukōkela Leza—​bālongele bubi. Na bubine, bātongele kwikala bampikwa kubwaninina, ke babipya-mambo. Kino kilongwa kyāletele bipa bibi kudi ba Adama ne Eva ne ku lutundu lwabo lonso.

Shirley: Le usaka kunena bika?

Megan: Biyampe, mbwanya kukupa’ko kimfwa kimo. Leka bidi kwipangule, lelo usenswe kusoka mikate?

Shirley: En-en! Neusenswe.

Megan: Langa’po bidi shi udi na kikombola kipya kya mikate. Kumeso kwa abe kwikingidija kibapone panshi, kibaikala na bulema. Penepo, mikate yonso ikasokelwa mu kino kikombola ikekala namani? Mwene nayo ikekala na bulema?

Shirley: En-en, i bya bine.

Megan: Mo monka ne kitatyi kyāpelele ba Adama ne Eva kukōkela Leza, baikele na “bulema,” nansha kato, na bubi ne kubulwa kubwaninina. Kadi byobāikele babipya-mambo kebabutwile mwana nansha umo, babo bana bonso badi bakubutulwa na buno “bulema.” Bonso badi ba kubutulwa mu ino ngikadilo ya bubi. Mu Bible kishima “bubi” kekisambilangapo’tu enka pa kilongwa, ino i ne pa ngikadilo yotupyene. Bilupukile’ko i bino amba nansha shi abe ne ami ketwalongele kintu kibi​—nansha shi twadi ketwabutwilwe​—pālongele ba Adama ne Eva bubi​—betutyibile batwe nsambu pamo ne lutundu lwabo lonso lwa kumeso ne lwetu ya būmi bwa kubulwa kubwaninina ne bubi, bwine butwala ku lufu. Monka motutangila mu Loma 6:23 amba, mpalo ya bubi i lufu.

Shirley: Bimweka’mba kebyolokepo kulonga namino. Mwanda waka bantu bonso babwanya’tu kususuka nyeke pa mwanda wa bubi bwa ba Adama ne Eva?

Megan: Udi na bubinga​—bimweka’mba kebyolokepo kulonga namino. Inoko kudi bintu bikwabo bivule kutabuka. Mu boloke bwandi, Leza wālombwele patōka amba ba Adama ne Eva bakafwa pa mwanda wa bubi bwabo, ino batwe lutundu lwabo tudi na lukulupilo. Leza watūdile muswelo wa kwitunyongolola mu uno mwanda. Kino kyo kine kyāletelwe kitapwa kya kinkūlwa kya Yesu. Tala monka Loma 6:​23. Pa kupwa kunena’mba “mpalo ipala bubi i lufu,” vese unena amba: “Ino kyabuntu kipāna Leza i būmi bwa  nyeke mudi Kidishitu Yesu Mfumwetu.” Nanshi lufu lwa Yesu lo lwitushitwidile dishinda dya kunyongololwa ku bubi ne ku lufu. *

Megan: Mu uno vese mudi kadi mwanda mukwabo onadi nsaka kukulombola.

Shirley: Le i mwanda’ka?

Megan: Vese unena amba: “Kyabuntu kipāna Leza i būmi bwa nyeke mudi Kidishitu Yesu Mfumwetu.” Penepa, shi Yesu ye wasusukile ne kufwa pa mwanda wetu, wapāna būmi bwandi pa mwanda wa batwe, mwanda waka uno vese unena pa kinkūlwa bu “kyabuntu kipāna Leza”? Mwanda waka, kanenepo’mba, “kyabuntu kipāna Yesu”? *

Shirley: Hum. Nkiyukilepo.

Megan: Biyampe, Leza wāpangile ba Adama ne Eva, kadi ye aye obālubile kitatyi kyobālekele kukōkela mu budimi bwa Edena. Wātenekelwe bininge ku mutyima pa kumona bandi bana babidi babajinji ba pano panshi bamutombokela. Ino’nka ponka’pa Yehova wātene’ko muswelo wa kupwija uno mwanda. * Wakwete’ko mpangiko ya kutuma kipangwa kyandi kimo kya ku mushipiditu pano panshi, kikale bu muntu mubwaninine, ebiya ku mfulo apāne būmi bwandi bu kitapwa kya kinkūlwa. Nanshi na bubine, mpangiko yonso ya kinkūlwa yādi i kyabuntu kya Leza. Kudi kadi bubinga bukwabo bulombola amba kinkūlwa i kyabuntu kya Leza. Lelo kashā kodi mulangulukile pa muswelo wēivwene Leza, kitatyi kyāipailwe Yesu?

Shirley: Mhm, mona’mba nkyalangulukile’po.

Megan: Namonenga bintu bikayanga nabyo banuke muno mu lubanza. Bimweka amba udi na bana.

Shirley: I amo, ndi nabo babidi​—mwana-mulume ne mwana-mukaji.

Megan: Byodi mbutwile, langa’po bidi Shandya Yesu wa mūlu, Yehova Leza, mwaāivwanine difuku dyāfwile Yesu. Nsaka kunena’mba, le i muswelo’ka waēivwene pa kumona tamba momwa mūlu wandi Mwana muswe ukwatwa, upunikwa ne kukupilwa bikoni? Ne i muswelo’ka wēivwene Shandi pāpopelwe wandi Mwana ku mutyi ne kumuleka ufwa lufu lubi?

Shirley: Bimweka amba weivwene bibi. Nadi nkyafundijibwe uno mwanda kashā!

Megan: Na bubine, ketubwanyapo kuyuka senene mwēivwanine Leza mu dine difuku’dya. Ino tuyukile’tu amba byāmusense, kadi tuyukile kine kyaālekele bino byonso bilongeke. I kitushintulwilwe biyampe mu kino kisonekwa kiyukane kya Yoano 3:​16. Le ukokeja kwikitanga?

Shirley: Biyampe. Kinena amba: “Leza byaasenswe ino ntanda bikatampe mpata, wapēne wandi Mwana mubutulwe bunka, amba ense ulombola lwitabijo mudi aye kakyonakanibwa, ino amone būmi bwa nyeke.”

Megan: Wafwa’ko. Tala monka ku ngalwilo kwa uno vese. Panena amba: “Leza byaasenswe ino ntanda.” Kino kyo kintu kikatampe kyamutonwene​—buswe. Buswe bwatonwene Leza atume wandi Mwana pano pa ntanda afwe pa mwanda wetu. Bine, kitapwa kya kinkūlwa i kilomboji kikatampe kya buswe. Kino kyo kine kibungilanga Batumoni ba Yehova pamo mwanda wa kuvuluka lufu lwa Yesu mwaka ne mwaka. Le ino myanda yonakulombola mu kīpi ibakukwasha?

Shirley: Bine, ibankwasha. Wafwa’ko pa kwitūdila’ko kitatyi kya kunshintulwila ino myanda.