“Yeye neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi. Malu a kale mmajimine.”​—Buakabuluibua 21:4, Nkudimuinu wa bulongolodi bupiabupia.

 ‘Yeye neakupule tshinsonji tshionso ku mêsu kuabu; ne lufu kaluena luikalaku kabidi; madilu kena ikalaku kabidi, nansha muadi, nansha kanyinganyinga kabidi; malu a kumudilu akumuka.’​—Buakabuluibua 21:4, Mukanda wa Nzambi.

 Nzambi mmulaye bua kujikija tunyinganyinga ne makenga adi akuata bantu lelu; neajikije kabidi tshikebeshi tshia ntatu ayi.

 “Neakupule tshinsonji tshionso ku mêsu kuabu.” Mêyi aa adi ajadika mulayi wa Yehowa a uvuabu bafunde kudi muprofete Yeshaya eu: “Neakupule binsonji ku mêsu kua bantu bonso.” (Yeshaya 25:8; Buakabuluibua 7:17) Tshiambilu atshi tshidi tshileja mudi Nzambi munange bantu bonso badi badila bua mudibu bafuishe anyi bua ntatu mikuabu.

 “Lufu kaluakuikalaku kabidi.” Badi mua kukudimuna kabidi tshiambilu atshi ne: “lufu nelujike” anyi ne: “kakuakuikala kabidi lufu to.” Nzambi mmulaye bua kujikija lufu ne makenga adi alukebesha. Bualu bukuabu, nekuikale dibishibua dia bafue. (1 Kolinto 15:21, 22) Nanku lufu ‘nelubutudibue.’​—1 Kolinto 15:26.

 “Nansha madilu, nansha mbila ya miadi, nansha bintu bidi bisama kabiakuikalaku kabidi.” Mulayi wa Nzambi au kawena uleja ne: bantu kabakumvua kabidi bintu bionso bidi bisama bu mudi kusama kua mubidi kua pa tshibidilu kudi kuleja ne: tudi bafuane kukuluka mu disama to. Kadi mulayi au udi uleja ne: malu onso adi asamisha lungenyi anyi mubidi makebesha kudi mpekatu b ne dipanga bupuangane kaakuikalaku kabidi to.​—Lomo 8:21, 22.

 “Malu a kale mmajimine.” Tshiambilu tshia ndekelu atshi tshidi tshileja muikala bantu mua kushintuluka bikole. Mukanda mukuabu udi uleja ne: “Nsombelu wa kumpala uvua muntu kayi mua kuepuka lufu, madilu, miadi, ne tunyinganyinga nebamupingane kudi nsombelu mupiamupia.” Nunku bantu nebatunke ne muoyo pa buloba bua kashidi, nebikale ne nsombelu muimpe mutambe uvua Nzambi mulongolole ku ntuadijilu.​—Genese 1:27, 28.

 Ku ntuadijilu wa nshapita wa 21, mupostolo Yone wakumvuija tshivuaye mumone mu tshikena kumona etshi: “Ngakamona diulu dipiadipia ne buloba bupiabupia.” (Buakabuluibua 21:1) Wakakula mu tshimfuanyi bua kuleja dishintuluka dinene dikavuabu bamanyishe kabidi mu mvese mikuabu. (Yeshaya 65:17; 66:22; 2 Petelo 3:13) Mbulamatadi wa Nzambi wa mu diulu, anyi “diulu dipiadipia,” neapingane mbulamatadi yonso ya bana ba bantu ne neakokeshe “buloba bupiabupia,” mmumue ne: bantu bapiabapia basomba pa buloba.​—Yeshaya 65:21-23.

 Ntshinyi tshidi tshileja ne: tshikena kumona atshi tshidi tshiakula bua nsombelu wa pa buloba? Tshia kumpala, mulayi wa Nzambi udi ubanga ne mêyi aa: “Ntenta wa Nzambi udi ne bantu.” (Buakabuluibua 21:3) Nunku mulayi au ki mbawupeshe banjelu ba mu diulu, kadi mbawupeshe bantu badi pa buloba. Tshibidi, tshikena kumona atshi tshidi tshiakula bua buloba muikala ‘lufu kalutshiyiku kabidi.’ (Buakabuluibua 21:4) Mu diulu kamutu lufu to, lufu ludi lukuata anu bantu badi pa buloba. (Lomo 5:14) Ke bualu kayi, mbia meji bua kuamba ne: mvese au udi wakula bua nsombelu wa matuku atshilualua pa buloba.

 Tangila filme muîpi eu bua kumona kadiosha ka mukanda wa Buakabuluibua.