Tòo, bitendelelu bionso kabiena muomumue to. Mu Bible mudi bilejilu bia bungi bia bitendelelu bidi kabiyi bisankisha Nzambi. Tudi tubikosolola mu mishindu minene ibidi.

Mushindu 1: Ditendelela nzambi ya dishima

 Bible utu utela miaku “tshidingishilu,” “patupu,” ne “tshianana” bua kumvuija tshidi ntendelelu wa nzambi ya dishima (Yelemiya 10:3-5; 16:19, 20) Yehowa * Nzambi wakatumina tshisamba tshia Isalele wa kale dîyi ne: “Kuena ne bua kuikala ne Nzambi mikuabu pa kumbusha meme to.” (Ekesode 20:3, 23; 23:24) Pavua bena Isalele batendelele nzambi mikuabu, ‘Yehowa wakabakuatshila tshiji tshikole.’​—Nomba 25:3; Lewitiki 20:2; Balumbuluishi 2:13, 14.

 Nzambi udi umvua mushindu wa muomumue lelu bua ditendelela bidibu “babikila nzambi.” (1 Kolinto 8:5, 6; Galatiya 4:8) Udi utumina bantu badi basue kumutendelela dîyi bua balekele kudisanga ne bantu badi mu ntendelelu wa dishima, wamba ne: “Patukayi munkatshi muabu, nuditapulule kudibu.” (2 Kolinto 6:14-17) Bikalabi ne: bitendelelu bionso bidi muomumue ne bilombola bantu kudi Nzambi, bua tshinyi Nzambi mmutume dîyi edi?

Mushindu 2: Ditendelela Nzambi mulelela mudiye kayi wanyisha

 Kuvua misangu ivua bena Isalele bangata malongesha a mu ntendelelu wa nzambi ya dishima ne bilele bivuamu bua kutendelela Nzambi; kadi Yehowa uvua ubenga mushindu uvuabu bakeba kusambakaja ntendelelu mulelela ne wa dishima au. (Ekesode 32:8; Dutelonome 12:2-4) Yezu wakapisha bamfumu ba bitendelelu bia tshikondo tshiende bua mushindu uvuabu batendelela Nzambi; bavua baleja kuîsu muvuabu bantu bavua batendelela, pabu bikale bena lubombo bavua “balengulule malu a mushinga mukole a mu Mikenji, mmumue ne: kulumbuluisha kuakane, luse, ne lulamatu.”​—Matayi 23:23.

 Bia muomumue lelu, anu tshitendelelu tshidi tshimanyine pa bulelela ke tshidi tshilombola bantu kudi Nzambi. Bulelela ebu budi mu Bible. (Yone 4:24; 17:17; 2 Timote 3:16, 17) Bushuwa, bitendelelu bidi ne malongesha adi kaayi apetangana ne Bible bidi bisesuisha bantu kule ne Nzambi. Malongesha a bungi adi bantu bela meji ne: nga mu Bible, bu mudi dia Busatu bunsantu, dibenga kufua dia anyima, ne dia dikengeshibua mu kapia ka tshiendelele mmafumine kudi bantu bavua batendelela nzambi ya dishima. Ntendelelu udi uzangika malongesha a nunku udi “tshianana,” anyi patupu bualu udi upingaja bilele bia malu a ntendelelu pa muaba wa malu adi Nzambi ulomba bantu.​—Mâk 7:7, 8.

 Nzambi mmukine lubombo lua bena mu bitendelelu. (Tito 1:16) Bua kuambuluisha bantu bua basemene pabuipi ne Nzambi, tshitendelelu tshidi ne bua kubaleja tshia kuenza mu nsombelu wabu dituku dionso; katshiena anu ne bua kuimanyina pa mikiya kampanda ne kuenza malu kansanga bua kuwuja mukenji to. Tshilejilu Bible udi wamba ne: “Bikala muntu wela meji ne: mmutendeledi wa Nzambi kadi kayi ulama ludimi luende bikole, udi udinga muoyo wende, ne ntendelelu wende udi patupu. Ntendelelu udi mukezuke ne kayi munyanguke ku mêsu kua Nzambi wetu ne Tatu udi nunku: kutangila bana ba nshiya ne bakaji bakamba mu makenga abu, ne kudilama katuyi katoba ka malu a panu.” (Yakobo 1:26, 27) Nansha Bible wa King James udi wakula bua “ntendelelu mukezuke,” udi kayi lubombo.