Tòo. Bible udi uleja ne: tudi ne bua kulomba anu Nzambi nkayende mu disambila mu dîna dia Yezu. Yezu wakambila bayidi bende ne: “Nudi ne bua kusambila mushindu eu: Tatu wetu udi mu diulu, dîna diebe dijidibue. (Matayi 6:9) Kakambila bayidi bende bua bikale batuma masambila abu kudi bansantu, banjelu, anyi muntu mukuabu pa kumbusha Nzambi to.

 Yezu wakambila kabidi bayidi bende ne: “Meme ndi njila ne bulelela ne muoyo. Muntu kena mua kulua kudi Tatu kayi mupitshile kundi to.” (Yone 14:6) Anu Yezu nkayende ke udi Nzambi muanyishile bua kutuakuila.​—Ebelu 7:25.

Ntshinyi tshienzeka meme mulombe Nzambi mu disambila, mutume kabidi masambila anyi kudi bansantu?

 Mu Mikenji dikumi, Nzambi wakamba ne: “Meme Yehowa Nzambi webe ndi Nzambi wa mukawu.” (Ekesode 20:5) Mmu ngumvuilu kayi mudi Nzambi ne “mukawu”? Mu Bible wa New American Bible, dimanyisha didi kuinshi kua dibeji didi diamba ne: udi “ulomba bua bamulamate anu yeye nkayende.” Nzambi mmusue ne: bamulamate anyi bamutendelele ne bamulombe anu yeye nkayende mu disambila.​—Yeshaya 48:11.

 Tuetu balombe muntu mukuabu mu disambila, nansha bansantu anyi banjelu ba tshijila, tudi tufiikisha Nzambi munda. Pavua mupostolo Yone ukeba kutendelela muanjelu kampanda, muanjelu au wakabenga ne: “Kuenji nanku to! Ndi anu mupika nebe ne wa bana benu badi ne mudimu wa bumanyishi bua bualu bua Yezu. Tendelela Nzambi!”​—Buakabuluibua 19:10.