Bible udi uleja ne: Nzambi kavua mufuke Diabolo to. Kadi wakafuka tshifukibua tshiakalua Diabolo. Bible udi wamba bua Nzambi ne: “Mudimu wende wonso mmupuangane, bualu njila yende yonso mmiakane. Nzambi wa lulamatu utu kayi wenza bibi. Yeye udi muakane ne mululame.” (Dutelonome 32:3-5) Bilondeshile mvese eu tudi mua kuamba ne: tshikondo kampanda Satana Diabolo uvua muntu muakane ne mupuangane. Tuambe ne: uvua umue wa ku bana ba Nzambi badi mu diulu.

 Mu Yone 8:44 Yezu wakamba ne: Diabolo “kakimana bikole mu bulelela.” Biumvuika bimpe ne: tshikondo kampanda Diabolo uvua ne lulamatu kayi ne kalema to.

 Nunku anu bu bifukibua bikuabu bia Yehowa bia meji, muanjelu uvua mulue Satana uvua ne budikadidi bua kudisunguila tshidi tshimpe ne tshidi tshibi. Pakasungulaye bua kutombokela Nzambi ne kusaka Adama ne Eva kudimutombokela pabu, wakadivuija nkayende Satana, mmumue ne: “Muluishi.”​—Genese 3:1-5; Buakabuluibua 12:9.