Yezu uvua ne tshimuenekelu kayi?
Tshidi Bible wamba
Kakuena muntu nansha umue udi mumanya bimpe muvua tshimuenekelu tshia Yezu, bualu kabavua bumvuija muvua tshimuenekelu tshiende mu Bible to. Bidi bimueneke ne: tshimuenekelu tshia Yezu katshiena ne mushinga to. Nansha nanku, Bible udi utuleja amue malu a muvua tshimuenekelu tshia Yezu.
Kuîsu kuende: Yezu uvua muena Yuda, ne uvua mufuane mamuende menemene ku mubidi. (Ebelu 7:14) Kavua ne tshimuenekelu tshia muntu wa pa buende to. Dimue dituku, wakumbuka mu musokoko ku Galela uya mutangila ku Yelushalema bantu kabayi nansha bamumanya to. (Yone 7:10, 11) Nansha pavuaye usomba ne bayidi bende ba pa muoyo kavua umueneka mushilangane nabu to. Vuluka ne: Yudasa Isakaliote ke uvua muleja Yezu kudi tshisumbu tshia basalayi bua kumukuata.—Matayi 26:47-49.
Bule bua nsuki yende: Bidi bimueneka ne: Yezu kavua ne nsuki mile to bualu Bible udi wamba ne: ‘muntu mulume yeye ne nsuki mile mbualu bua bundu.’—1 Kolinto 11:14.
Muedi wende: Yezu uvua ne muedi. Uvua ulonda mukenji wa bena Yuda uvua ukandika bantu balume bua ‘kunyangakaja mielelu ya miedi yabu.’ (Lewitiki 19:27; Galatiya 4:4) Bualu bukuabu, Bible mmutela bualu bua muedi wa Yezu mu mêyi a buprofete adi akula bua dikenga diende.—Yeshaya 50:6.
Mubidi wende: Bidi bimueneke ne: Yezu uvua muntu wa mukitshi. Uvua wenza ngendu mile pavuaye uyisha. (Matayi 9:35) Wakakezula ntempelo misangu ibidi mijima pakatonkolaye mêsa a bena Yuda bavua bashintakaja makuta ku ntempelo, ne pavuaye muipate kabidi bantu bavua bapana nyama ku ntempelo ne mfimbu. (Luka 19:45, 46; Yone 2:14, 15) Tshibungu kampanda tshia mukanda (McClintock and Strong’s Volume IV, dibeji dia 884) tshidi tshiamba ne: Mikanda ya Evanjeliyo yonso idi ileja ne: Yezu uvua muntu wa bukole bua bungi ne uvua ne makanda a mubidi mimpe.
Tshilunji tshiende tshia mpala: Yezu uvua muntu wa musangelu ne uvua uditeka pa muaba wa bakuabu. Tshilunji tshiende tshia mpala tshivua tshileja tshivuaye. (Matayi 11:28, 29) Bantu ba mishindu yonso bavua baya kudiye bua abakankamije ne abambuluishe. (Luka 5:12, 13; 7:37, 38) Nansha bana batekete pabu bavua badiumve bimpe pavuabu ku luseke luende.—Matayi 19:13-15; Mâko 9:35-37.
Mudi bamue babuejakaja malu bua tshimuenekelu tshia Yezu
Mudi bamue babuejakaja: Bamue bantu batu bamba ne: Yezu uvua mua kuikala muledibue mu Afrike bualu mukanda wa Buakabuluibua udi ufuanyikija nsuki yende ne miose ya mukoko ne makasa ende ne “tshiamu tshikunze tshia mushinga mukole.”—Buakabuluibua 1:14, 15 MMM.
Bulelela bua bualu: Mukanda wa Buakabuluibua mbawufunde “mu bimanyinu.” (Buakabuluibua 1:1) Diumvuija dia nsuki ya Yezu ne makasa ende ndia mu ngakuilu wa tshimfuanyi udi uleja ngikadilu ya Yezu panyima pa dibishibua diende ku lufu. Kadi kadiena diumvuija tshimuenekelu tshiende tshia pavuaye pa buloba to. Padi Bible wamba mu Buakabuluibua 1:14 ne: ‘mutu wa Yezu ne nsuki yende bivua bitoke bu miosa mitoke ya mikoko ne bu neje’, udi wakula bua dikala, kadi ki mbua tshimuenakelu bu tshintu tshia kuyifuanyikija nayi to. Ebi bidi bileja meji avuaye mupete pavuaye wende ukola. (Buakabuluibua 3:14) Mvese eu kena ufuanyikija tshimuenekelu tshia nsuki ya Yezu ne tshia miose ya mikoko kupita mutuye uyifuanyikija ne neje to.
Makasa a Yezu avua mafuanangane ne tshiamu “tshia mitaku tshimpe menemene paditshi tshikenka mu tshikutu tshia kapia.” (Buakabuluibua 1:15) Kabidi, mpala wende uvua “bu dîba padidi dikenka bikole menemene.” (Buakabuluibua 1:16) Bu mutuku kakuyi kuanji kuikala bantu ne mubidi wa mushindu udibu bakuile eu, tshikena kumona etshi ki mbualu bua kumvua anu mudibu amu to. Tshidi tshileja ne pavua Yezu mubishibue ku lufu, uvua bu muntu “udi musombe mu butoke budi muntu kayi mua kufika kudibu.”—1 Timote 6:16.
Mudi bamue babuejakaja: Yezu uvua muntu wa kalendalenda anyi mupuyile.
Bulelela bua bualu: Yezu uvua muntu wa bikadilu bimpe. Tshilejilu, wakadifila nkayende kudi tshisumbu tshia basalayi tshivua tshilue bua kumukuata. (Yone 18:4-8) Yezu uvua kabidi muntu uvua ne bukole bua mubidi bua bungi bua kuenza mudimu wa mabaya, uwenza ne biamu bia ku bianza.—Mâko 6:3.
Kadi bua tshinyi Yezu uvua dijinga ne muntu wa kumuambuisha mutshi wa makenga? Bua tshinyi wakafua kumpala kua bantu bakuabu bavuabu bapopele ku mitshi pamue nende? (Luka 23:26; Yone 19:31-33) Yezu uvua mutshioke bikole kumpala mene kua kumushipabu. Uvua mupitshishe butuku bujima kayi mulale bua bukole bua kanyinganyinga kavuaye naku. (Luka 22:42-44) Bena Yuda bavua bamukengesha butuku abu, ne mu dinda diakalonda bena Lomo bakamututa bikole menemene. (Matayi 26:67, 68; Yone 19:1-3) Malu aa ke avua menze bua akuula muoyo lukasa.
Mudi bamue babuejakaja: Yezu uvua anu muntu wa tunyinganyinga ne uvua mubungame.
Bulelela bua bualu: Yezu uvua ne ngikadilu ya buena ya Yehowa tatuenda wa mu diulu udi Bible ubikila ne: “Nzambi wa disanka” (1 Timote 1:11; Yone 14:9) Mu bulelela, Yezu uvua mulongesha bantu tshia kuenza bua kuikala ne disanka. (Matayi 5:3-9; Luka 11:28) Malu aa adi aleja muvua disanka diende dimuenekela ku tshilunji tshiende tshia mpala.
Mona bikuabu:
MANDAMUNA A NKONKO YA MALU A MU BIBLE
Malu adi Bible ulonda bua Yezu mmajalame anyi?
Konkonona bijadiki bia malu adibu balonde mu Evanjeliyo ne mu mikanda ya kale mifunda ku tshianza.
MALONGESHA A MU BIBLE A NSHINDAMENU
Tshidi tshitujadikila ne: Bible udi ne malu malelela ntshinyi?
Bikala Nzambi ke muena Bible, udi ne bua kupita mikanda mikuabu yonso kule ne kule.
MALU ETU
Lomba bua balue kukutangila
Tata lukonko lua malu a mu Bible, anyi longa malu a bungi adi atangila Bantemu ba Yehowa.