Makanda a mubidi mimpe
Bible ki mmukanda wa malu a luondapu to. Kadi udi ne mibelu idi mua kuambuluisha bantu bua kuikala ne makanda a mubidi mimpe. Tukonkononayi amue mêyi manene a mu Bible adi mua kukuambuluisha.
LAMA MUBIDI
DÎYI DINENE DIA MU BIBLE: “Kakuena muntu ukadiku mukine mubidi wende, kadi udi uwudisha [ne] uwunanga.”—Efeso 5:29.
TSHIDIDI DIUMVUIJA: Dîyi dinene dia mu Bible edi didi ditukankamija bua kuenza tshionso tshitudi mua kuenza bua kulama mubidi. Luapolo kampanda ludi luleja ne: masama a bungi adi afumina ku malu adi bantu basungula bua kuenza. Nunku, kuangata mapangadika mimpe kudi mua kutupetesha makanda a mubidi mimpe.
TSHIUDI MUA KUENZA:
-
Ndiilu. Kudia kuebe mbujitu buebe. Nunku ikala udia biakudia bidi bidiisha mubidi ne unua mâyi a bungi.
-
Ikala unyungisha mubidi. Nebikuambuluishe bikole nansha wewe muikale bukole kayi, muikale mulema anyi ne disama dia munanunanu. Nansha mudi bena mu dîku, balunda ne baminganga mua kukuambuluisha bua kuikala kuibidija mubidi, wewe ke udi nangananga ne bua kudienzeja.
-
Ikala ulala bikole. Dibenga kulala bikole ditu dikebesha masama manene. Bantu ba bungi kabena balala bikole bualu batu benza malu makuabu dîba dia kulala. Kadi wewe ulala bikole, newikale bimpe.
LEKELA BIBIDILU BIBI
DÎYI DINENE DIA MU BIBLE: “Tudikezule ku bubi buonso bua mubidi ne bua muoyo.”—2 Kolinto 7:1.
TSHIDIDI DIUMVUIJA: Bintu bidi binyanga mubidi bu mudi makanya bitu bitamba kukebesha masama ne lufu. Nunku tuetu katuyi tubinua netulame makanda etu a mubidi.
TSHIUDI MUA KUENZA: Funda dituku diudi ne bua kuimanyika dibinua. Kumpala menemene kua dituku adi kufika, imansha makanya, bia kuanuina, tulongo tua butu bua makanya, kamu ka kutapisha naku makanya kapia, ne bikuabu. Kuyi miaba itu bantu banua bintu bia buena ebi to. Ambila balunda ne bena mu dîku dienu ne: udi muangate dipangadika dia kubilekela bua bakuambuluishe.
MÊYI MANENE MAKUABU A MU BIBLE
Udi mua kupeta webe Bible mupatula pa mabeji kudi Ntemu wa Yehowa wa muaba uudi musombele
ENZA MALU NE BUDIMU.
“Wewe muibake nzubu mupiamupia, udi ne bua kuibaka kabidi katshibumba ku mutu kua nzubu webe, bua kukebedi nzubu webe dibanza dia mashi, bualu muntu udi mua kukulukaku.”—DUTELONOME 22:8.
KANDA TSHIJI TSHIEBE.
“Muntu udi kayi ukuata tshiji lukasa udi ne dijingulula dia malu divule, kadi muntu udi kayi ne lutulu udi uleja butshimbakane buende patoke.”—NSUMUINU 14:29.
EPUKA KUDIA KUPITSHISHA.
“Kuikadi munkatshi mua bantu badi . . . basukumina munyinyi.”—NSUMUINU 23:20.
Mona bikuabu:
TABULUKAYI!
Njila wa kupetela disanka—Makanda a mubidi ne kuitaba nsombelu utudi nende
Muntu udi usama kenaku mua kupeta yeye disanka anyi?
