Minite 60 ya patshidi mamu ulelelaku muana ntshikondo tshia mushinga mukole tshidi muana wibidilangana ne pambelu. Bua tshinyi? Bualu bamamu badi batamba kulamakanangana ne bana badibu bafuma ku dilela mu tshikondo etshi badi babambuluisha bua kukolabu ne kukolakanabu bimpe. a

Tshitu tshisaka mamu bua kutabalela muana udiye ufuma ku dilela ne dinanga ntshinyi? Mulongeshi Jeannette Crenshaw wakamba mu tshikandakanda kampanda ne: kudi bintu kampanda munda mua mamu bitu mubidi upatula, bintu abi bitu bivula ne “bimujula majinga kampanda padiye ulenga muanende, umutangila, ne umuamusha.” (The Journal of Perinatal Education) Kudi bikuabu pabi bidi mubidi upatula anu tshiotshi tshikondo atshi “bidi biambuluisha mamu bua kuandamuna ku majinga a muanende” ne bikolesha dipetangana diabu. Bua tshinyi bualu ebu budi ne mushinga?

Yehowa Nzambi b mufuki wetu wa dinanga ke uvua muenze bua mamu ne muana udiye ufuma ku dilela bikale balamatangane bikole. Mukalenge Davidi wakatumbisha Nzambi bua muvuaye mumupatule “mu difu” ne muenze bua adiumvue bimpe mu maboko a mamuende. Wakasambila wamba ne: “Ndi mufidibue ku bulami buebe katshia anu ku diledibua; wewe udi Nzambi wanyi katshia anu mu difu dia mamuanyi.”​—Misambu 22:9, 10.

ELABI MEJI: Bikala Nzambi mufuke mubidi bua wikale upatula bintu bia nunku bua ne: mamu ikale utangila muanende bimpe bua kumukumbajila majinga ende, kabienaku bikumbana bua kuamba ne: Nzambi utu pende utabalela yonso wa kutudi, tuetu “bana ba Nzambi” anyi?​—Bienzedi 17:29.

Yezu Kristo udi mumanye Mufuki bimpe kutupita wakalongesha ne: “Batu bapana mishamisha ibidi ku dikuta dimue dia tshinjanja dia mushinga mukese, ki mmuomu anyi? Kadi nansha umue wa kudiyi kawakumata panshi Tatu wenu kayi mumanye to. Kadi nansha nsuki ya ku mutu kuenu mmibala yonso. Nunku kanutshinyi to; nudi ne mushinga wa bungi kupita mishamisha ya bungi.”​—Matayi 10:29-31.

Ba bungi ba kutudi batu balengulula tunyunyi tua tukese, ne kabatu nansha bamona padi kamue ka kuditu kamata panshi to. Kadi Tatu wetu wa mu diulu  udi utumona tuonso! Nyunyi mine, nansha yoyi ya bungi, kayitu ne mushinga wa bungi kudiye kupita muntu to. Nunku dilongesha nditoke: ‘Kutshinyi’ wela meji ne: Nzambi kena ukumona to. Kadi umanye ne: udi ukutabalela bikole be!

Bible udi utujadikila ne:

• “Mêsu a Yehowa adi miaba yonso, atangila babi ne bimpe.”​—NSUMUINU 15:3.

• “Mêsu a Yehowa adi kudi bantu bakane, ne matshi ende adi ateleja muadi wabu wa dilomba diambuluisha.”​—MISAMBU 34:15.

• “Nensankile mu dinanga diebe dia lulamatu bikole, bualu wewe udi mumone lutatu luanyi; udi mumanye dikenga dianyi dikole.”​—MISAMBU 31:7.

Kumanya ne: Nzambi udi ututabalela bua tuikale bimpe ne ututangila bua kutuambuluisha kudi mua kushintulula malu anyi? Kudi mua kuashintulula bikole. Umvua tshidi Hannah c wa mu Angleterre wamba:

“Misangu ya bungi, mvua mona ne: Yehowa kavua munnange ne kavua wandamuna masambila anyi to. Mvua ngela meji ne: mbualu tshivua ne ditabuja to. Mvua ngela meji ne: uvua unnyoka anyi undengulula bualu tshivua ne mushinga to. Mvua mmona ne: Nzambi kavua untabalela to.”

Kadi Hannah katshiena kabidi udikonka bikala Yehowa ni udi umutabalela ne mumunange to. Tshivua tshimushintulule ntshinyi? Udi wamba ne: “Bivua bienda bishituluka ku kakese ku kakese. Ndi mvuluka muyuki mukuabu uvua mundenge bikole uvuabu benze kukadi bidimu bia bungi bua mulambu wa kupikulangana nawu wa Yezu. Uvua mungambuluishe bua kutuishibua ne: Yehowa mmunnange. Padiye wandamuna masambila anyi, ntu ntamba kupuekesha bisonji bualu ndi mona ne: Yehowa udi anu munnange. Kabidi, kudilongela Bible ne kubuela mu bisangilu nkundongeshe malu a Yehowa a bungi, bumuntu buende ne mushindu udiye umvua buetu tuetu. Mpindieu ndi mona bimpe mudi Yehowa utuambuluisha ne mutunange tuetu bonso ne mudiye musue kututabalela muntu ku muntu.”

Malu adi Hannah muambe adi akankamija. Kadi ntshinyi tshidi mua kukujadikila ne: Nzambi mmumanye muudi udiumvua ne utu uvuluka bualu abu? Tshiena-bualu tshidi tshilonda netshiakule bua bualu ebu.