1, 2. a) Mmu mushindu kayi mudi bulongolodi bubi ebu bufuanangane ne muenzavi ukadibu basua kushipa? (Tangila tshimfuanyi tshia ntuadijilu tshia tshiena-bualu.) b) Mmunyi muadiumvua muntu yonso mu diulu ne pa buloba panyima pa dibutuka dia ndongoluelu mubi eu?

FUANYIKIJABI bualu ebu. Mbakuate muenzavi munene, mbamukosele tshibawu tshia lufu. Mpindieu badi baya nende kudi balami ba buloko bua kumushipa. Nansha mudi muenzavi eu umueneka muikale ne muoyo ne makanda a mubidi mimpe, bakadi pa kumushipa.

² Bulongolodi bubi butudi basombele ebu mbufuanangane ne muenzavi eu ukadibu pa kushipa. Bible udi wamba ne: “Buloba budi bupita.” (1 Yone 2:17) Yehowa mmupangadije bua kubutula bulongolodi ebu mu katupa kîpi emu, nunku tudi batuishibue ne: neabubutule. Kadi kudi dishilangana dinene pankantshi pa nshikidilu wa ndongoluelu eu ne dishipa dia muenzavi au. Bamue bantu badi mua kumona ne: mushindu uvuabu balumbuluishe muenzavi au ki mmukumbane to, ne badi mua kubenga bela meji ne: kabakumushipa to. Kadi Yehowa mmulumbuluishi muakane, ne dipangadika diende dia kubutula ndongoluelu eu ndiakane menemene.  (Dutelonome 32:4) Dibutuka dia ndongoluelu eu kadiakujanguluka to. Pabutulabu ndongoluelu eu, muntu yonso udi mu diulu ne pa buloba neitabe ne: dilumbuluisha dia Yehowa ndiakane. Netshikale disulakana dia dikema!

3. Mbintu kayi binayi biabutuka palua Bukalenge bua Nzambi?

³ “Buloba budi bupita” budi bukonga malu kayi? Budi bukonga malu mabi adi enzeka lelu mu bantu. Malu onso aa neabutuke mu katupa kîpi emu. Ebu mbumue bua ku malu adi bushuwa enza “lumu luimpe lua Bukalenge.” (Matayi 24:14) Mu tshiena-bualu etshi, netuakule bua bintu binayi biabutuka palua Bukalenge bua Nzambi: bantu babi, malongolodi mabi, malu mabi ne nsombelu mibi. Mu malu onso aa netulonge 1) mudiwu ne buenzeji kutudi lelu, 2) tshienza Yehowa ne malu aa, ne 3) tshiapingajaye pa muaba wawu.

4. Bantu babi badi ne buenzeji kayi kutudi lelu?

⁴ Bantu babi badi ne buenzeji kayi kutudi lelu? Mupostolo Paulo wakamba ne: mu matuku a ku nshikidilu kuvua ne bua kuikala “bikondo bibi bidi bikole mua kupita nabi.” Pashishe kusakidila ne: “Bantu babi ne badi badinga bakuabu nebatungunuke ne kunyanguka bibi menemene.” (2 Timote 3:1-5, 13) Ukadiku mutuilangane ne malu aa anyi? Ba bungi ba kutudi bakadi batuilangane ne bantu babi bu mudi bena tshikisu, bantu batu bakinangana bua makoba ne benzavi banene. Bamue ba kudibu kabatu basokoka malu mabi atubu benza to. Bakuabu batu baleja mudibu basue kuambuluisha bantu, kadi mu bulelela bikale bantu babi. Kadi nansha tuetu katuyi banji kutuilangana ne benzavi, bantu babi badi anu ne buenzeji kutudi. Bitu bitutonda bikole patutu tumvua mudibu bakengesha ne tshikisu tshionso bana, bakulakaje ne bantu bakuabu badi kabayi ne mushindu wa kudisungila. Bantu babi aba batu benza malu bu nyama ya luonji anyi bu bademon. (Yakobo 3:15) Diakalenga, Dîyi dia Yehowa didi ditupesha ditekemena.

5. a) Mpunga kayi utshidi nende bantu babi? b) Ntshinyi tshiafikila bantu badi babenga kushintuluka?

⁵ Ntshinyi tshienza Yehowa? Kubangila anu ku mpidieu, Yehowa mmupeshe bantu babi mpunga wa kushintulukabu. (Yeshaya 55:7) Nansha muabutulabu ndongoluelu eu mu katupa kîpi emu, ki mbanji anu kulumbuluisha bantu babi to. Kadi ntshinyi tshiafikila bantu badi babenga kushintuluka ne aba badi batua ndongoluelu eu udi wenda usemena ku tshikondo tshia dikenga dinene mpanda? Yehowa mmulaye bua kumbusha bantu babi bonso pa buloba. (Bala Misambu 37:10.) Lelu, bantu ba bungi batu basokoka malu mabi atubu benza, ne misangu ya bungi kabatu babanyoka to. (Yobo 21:7, 9) Kadi Bible udi utuvuluija ne: ‘Yeye [Nzambi] udi uteka mêsu ende ku njila idi muntu wendela, udi umona biendedi biende bionso. Kakuena mîdima, kakuena mufitu mukole kudi benji ba malu mabi bamanye mua kusokomena.’ (Yobo 34:21, 22) Nunku kakuena mushindu wa kusokoma Yehowa to. Udi umona bualu buonso budi bantu babi benza. Panyima pa Armagedone, netutangile muaba uvuabu,katuakubamona to. Nebababutule bua kashidi!​—Misambu 37:12-15.

6. Mbanganyi bashala pabutulabu bantu babi? Bua tshinyi bualu ebu ndumu luimpe?

 ⁶ Mbanganyi bashala pabutulabu bantu babi? Yehowa mmulaye ne: ‘Badi ne mitshima mipuekele nebapiane buloba, mioyo yabu neyisanke mu ditalala dikumbane.’ Tudi tubala kabidi anu mu musambu umue umue eu ne: ‘Bantu bakane nebapiane buloba, nebashikamemu tshiendelele.’ (Misambu 37:11, 29) ‘Bapuekele’ ne “bakane” mbanganyi? Bapuekele mbantu badi ne budipuekeshi badi balonga malu kudi Yehowa ne baatumikila. Bakane ngaba badi banange kuenza malu adi Nzambi wamba ne: mmimpe. Lelu pa buloba kudi bantu babi ba bungi kupita bakane. Kadi mu bulongolodi bupiabupia nekuikale anu bantu bapuekele ne bakane, ne nebavuije buloba mparadizu!

7. Malongolodi mabi adi ne buenzeji kayi kutudi lelu?

⁷ Malongolodi mabi adi ne buenzeji kayi kutudi lelu? Malu mabi a bungi adi pa buloba lelu ki mmakebesha kudi bantu to, kadi kudi malongolodi. Bitendelelu bidi bishima bantu miliyo ya bungi. Tshilejilu, bidi bishima bantu bua tshidi Nzambi, bidi biamba ne: Bible ki mmukanda wa kueyemena to, ne bidi bishima bantu bua muikala buloba ne bukua bantu mu matuku atshilualua. Mbulamatadi mibi idi isaka bantu ku mvita, ku tshikisu bua kansungansunga ka makoba ne ku dikengesha bapele ne bantu badi kabayi ne wa kubakuila. Mbulamatadi ya nunku idi ilua ne bubanji bua bungi ne bukole bua mudiyi isunguluja bantu ne itaba nkosa mishiku. Biapu bidi ne lukuka bidi binyanga kapepa ka miaba idi bantu basombele, binyanga mabanji a mu buloba, badiila bantu pambidi anu bua kunemesha bantu bakese. Bulelela, malongolodi mabi mmakebeshe makenga a bungi mu bantu pa buloba lelu.

8. Ntshinyi tshidi Bible wamba tshiafikila malongolodi adi amueneka bu adi ne bukole ku mêsu kua bantu ba bungi lelu?

⁸ Ntshinyi tshienza Yehowa? Dikenga dinene nedibange patuadija bena tshididi kuluisha bitendelelu bionso bia dishima bidi Bible ubikila ne: ndumba anyi Babilona munene. (Buakabuluibua 17:1, 2, 16; 18:1-4) Nebabutule bitendelelu ebi bua kashidi. Kadi ntshinyi tshiafikila malongolodi mabi makuabu onso? Bible udi uafuanyikija ne mikuna ne bidiila bualu adi amueneka bu adi ne bukole ne mashindame. (Bala Buakabuluibua 6:14.) Kadi udi usakidila kabidi ne: mbulamatadi ne malongolodi makuabu onso adi kaayi atua Bukalenge bua Nzambi nyama ku mikolo nebibutudibue. Netshikale tshitupa tshia ndekelu tshia dikenga dinene. (Yelemiya 25:31-33) Pashishe, malongolodi mabi kaakuikalaku kabidi to!

9. Bua tshinyi tudi bajadike ne: buloba bupiabupia nebuikale bulongolola bimpe?

⁹ Ntshinyi tshiapingana pa muaba wa malongolodi mabi? Panyima pa Armagedone, nekuikalaku bulongolodi kampanda pa buloba anyi? Bible udi wamba ne: “Bilondeshile mulayi wende, tudi bindile diulu dipiadipia ne buloba bupiabupia muikala buakane.” (2 Petelo 3:13) Diulu ne buloba bia kale mbulamatadi mibi ne bantu badiyi ilombola. Pabibutulabu, ntshinyi tshiapingana pa muaba wabi? “Diulu dipiadipia ne buloba bupiabupia.” Diulu dipiadipia mbulamatadi mupiamupia, Bukalenge buenza ne  Yezu Kristo ne bantu 144 000 bakokesha nende. Buloba bupiabupia mbantu bakokeshabu kudi Bukalenge bua Nzambi. Yezu ne bantu bakokeshaye nabu nebidikije Yehowa Nzambi wa bulongame bimpe menemene. (1 Kolinto 14:33) Nunku “buloba bupiabupia” nebuikale bulongolola. Nekuikale bantu balume bimpe bua kutabalela malu. (Misambu 45:16) Bantu balume aba nebalombodibue kudi Kristo Yezu ne kudi bantu 144 000. Elabi meji muikala nsombelu tshikondo tshiapingana bulongolodi bumue budi mu buobumue budi kabuyi mua kunyanguka pa muaba wa malongolodi mabi onso adiku lelu!

10. Mmalu kayi mabi adi bantu ba bungi benza muaba uudi? Adi ne buenzeji kayi kuudi ne kudi bena mu dîku dienu?

¹⁰ Malu mabi adi ne buenzeji kayi kutudi lelu? Tudi mu buloba mudi buenzavi, dipanga bululame, ne malu a tshikisu bitangalake bikole mu bantu. Dijikija dia lutetuku didi pa buloba didi disaka bantu bua kuanyisha malu aa nansha mudiwu ashipa mikenji ya Nzambi ya tshidi tshimpe ne tshidi tshibi. (Yeshaya 5:20) Baledi badi nangananga ne bua kudienzeja bikole bua kukuba bana babu ku malu mabi aa. Bushuwa, bena Kristo balelela bonso badi ne bua kudienzeja bikole bua kulama malanda abu ne Yehowa mu bulongolodi budi kabuyi bunemeka mikenji ya Nzambi.

11. Dibutula Sodoma ne Amola kudi Yehowa didi ditulongesha tshinyi?

¹¹ Ntshinyi tshienza Yehowa ne malu mabi? Vuluka tshivua Yehowa muenze ne malu mabi avua enzeka mu tshimenga tshia Sodoma ne tshia Amola. (Bala 2 Petelo 2:6-8.) Lota uvua muntu muakane, yeye ne bena mu dîku diende bakakenga bikole bua malu mabi onso avua bantu bavua babanyunguluke benza. Yehowa wakabutula tshimenga tshijima bua kujikija malu mabi avua enzekamu. Kadi uvua kabidi mufile “tshilejilu” bua bantu babi badiku lelu. Anu bu muvua Yehowa mujikije malu mabi onso a buenzavi tshikondo atshi, ke muaajikijaye kabidi lelu pabutulaye ndongoluelu eu.

12. Ngamue malu kayi audi muindile ne muoyo kuulu kuulu pabutulabu ndongoluelu eu?

¹² Ntshinyi tshiapingana pa muaba wa malu mabi? Mu bulongolodi bupiabupia, netuikale ne malu a bungi a kuenza adi asankisha. Tshilejilu, netuvuije buloba mparadizu ne netuase nzubu buetu tuetu ne bua bantu batudi banange. Netuakidile kabidi miliyo ya bantu babishabu ku lufu, netubalongeshe malu a Yehowa ne bionso bidiye muenzele bantu. (Yeshaya 65:21, 22; Bienzedi 24:15) Tshikondo atshi, netuikale ne malu a bungi a kuenza atupetesha disanka ne atusaka bua kutumbisha Yehowa.

13. Mbipeta kayi bidi buntomboji bua mu Edene bupatule?

¹³ Nsombelu mibi idi ne buenzeji kayi kutudi lelu? Buloba budi buwule tente ne bantu babi, malongolodi mabi ne malu mabi mbifikishe bantu ku dikala ne nsombelu mibi. Tuetu bonso tutu tutuilangana ne malu bu mudi mvita, bupele, kansungansunga ka makoba, masama ne lufu. Malu mabi aa akatuadija bualu Satana, Adama ne Eva bakatombokela Yehowa. Buntomboji buabu mbutukebele tuetu bonso ntatu.

14. Ntshinyi tshienza Yehowa ne nsombelu mibi?

 ¹⁴ Ntshinyi tshienza Yehowa ne nsombelu mibi? Tuangate bimue bilejilu. Yehowa mmulaye bua kujikija mvita yonso. (Bala Misambu 46:8, 9.) Neajikije masama. (Yeshaya 33:24) Neamine lufu bua kashidi. (Yeshaya 25:8) Neajikije bupele. (Misambu 72:12-16) Yehowa neumbushe malu makuabu mabi onso adi anyanga nsombelu bikole lelu. Neumbushe kabidi buenzeji bubi bua Satana ne bademon bende.​—Efeso 2:2.

15. Panyima pa Armagedone, ngamue malu kayi ajikijabu bua kashidi?

¹⁵ Fuanyikijabi muikala nsombelu mu buloba kabuyi mvita, masama nansha lufu! Kakuakuikala biluilu bia mvita, bingoma anyi katuakuvuluka kabidi mvita to. Katuakuikala dijinga ne mpitadi, badoktere, baminganga, biamu bia mashika bua bafue anyi nkita to. Kakuakuikala kabidi buenzavi, ke bua tshinyi katuakuikala dijinga ne bampulushi, ngonga ya dimanyisha bualu anyi pamuapa mene bikuvu ne nsapi to! Malu mabi onso adi atukebela tunyinganyinga tua bungi aa neajike bua kashidi.

16, 17. a) Mmunyi muadiumvua bantu bapanduka ku Armagedone? Fila tshilejilu. b) Mmunyi mutudi mua kujadika ne: netushale ne muoyo pabutulabu ndongoluelu mubi eu?

¹⁶ Nsombelu neikale mushindu kayi pajikijabu malu mabi? Mbikole bua kubielela meji. Tudi bapitshile mu nsombelu mibi bidimu bia bungi, bitupangisha too ne bua kumona tunyinganyinga tudiyi itukebela. Tshilejilu, bantu badi basombele pabuipi ne muaba utu kawulu kimanyina kabatu kabidi bumvua mutoyi wa kawulu ubatonda to. Nansha bantu batu pabuipi ne tshina tshia butshiafu kabatu kabidi bumvua mupuya wa butshiafu ubatonda to. Kadi pajikija Yehowa malu mabi onso, nekuikale disulakana dia dikema!

¹⁷ Ntshinyi tshiapingana pa muaba wa tunyinganyinga tuonso tutudi natu lelu? Musambu wa 37:11 udi wamba ne: ‘Mioyo yabu neyisanke mu ditalala dikumbane.’ Bidi bikolesha ku muoyo patudi tumanya ne: ke tshidi Yehowa musue buetu tuetu! Mu bikondo bia tunyinganyinga ebi, enza tshionso tshiudi mua kuenza bua kushala pabuipi ne Yehowa ne bulongolodi buende. Malu audi mutekemene matuku atshilualua adi ne mushinga wa bungi, nunku elela malu aa meji bikole, enza bua uamone malelela kuudi, ne uambile bakuabu. (1 Timote 4:15, 16; 1 Petelo 3:15) Wewe muenze nanku, newikale mutuishibue ne: pabutulabu ndongoluelu eu, neushale ne muoyo, ne neusanke bua kashidi!