1. Tela amue malu atu atamba kuenza buôwa.

 TUAKULAYI bua malu adi menzeke aa. Nestor ne mukajende, Maria bavua basue kuyisha muaba uvuabu dijinga ne bamanyishi ba bungi. * Bua kuenza mudimu eu bavua ne bua kushintulula nsombelu uvuabu nende. Kadi bavua ne buôwa bua ne: bobu bashale ne makuta makese, pamuapa kabakuikala ne disanka menemene to. Pavua Biniam mulue Ntemu wa Yehowa mu ditunga muvuabu baluisha mudimu wetu, wakamona ne: bumuvuaye mulue umue wa ku bantu ba Nzambi, bavua ne bua kumukengesha. Biakamuenza buôwa. Kadi wakapeta kabidi buôwa bua tshivua bena mu dîku diabu mua kuenza bobu bumvue bualu bua tshitendelelu tshiende tshipiatshipia. Bakapeta muanetu wa bakaji Valérie ne disama dia kansere ka kabi menemene; nunku uvua uluangana bua kupeta munganga mupandianganyi uvua mua kunemeka malu a mu Bible avuaye witabuja bua mashi. Bidi bileja muvuaye ne buôwa bua ne: kalu kufua.

2. Bua tshinyi tudi ne bua kudienzeja bikole bua kutshimuna buôwa?

² Ukadi mupete malu a akuenza buôwa mushindu eu anyi? Ba bungi ba kutudi bakadi baapete. Tuetu katuyi tukanda buôwa butudi tumvua, pamuapa netuangate mapangadika mabi mafuane kunyanga malanda etu ne Yehowa. Ke tshidi Satana musue. Udi ubuelela pa buôwa butudi nabu bua atufikishe ku dibenga kutumikila mikenji ya Yehowa, bu mudi wa kuyisha lumu luimpe. (Buak. 12:17) Satana udi ne bukole, mmubi, ne kena ne luse. Kadi udi mua kudikuba kudiye. Mushindu kayi?

3. Tshiatuambuluisha bua kutshimuna buôwa ntshinyi?

³ Tuetu batuishibue ne: Yehowa mmutunange, ne udi netu,  netutshimune bionso bidi Satana wenza bua kutukuatshisha buôwa. (Mis. 118:6) Tshilejilu, mufundi wa Musambu wa 118 wakatuilangana ne imue nsombelu ya tunyinganyinga. Uvua ne baluishi ba bungi. Mu baluishi abu muvua bantu ba miaba mibandile (mvese 9, 10). Kuvua misangu ivuaye ukengeshibua bikole. (mvese 13) Wakapeta kabidi dinyoka dia kudi Yehowa (mvese 18) Kadi anu yeye muimbi wa misambu eu wakamba ne: “Tshia kutshina to.” Tshivua tshienza bua adiumvue mu bukubi bua bungi nanku ntshinyi? Uvua mumanye ne: nansha muvua Yehowa, Tatu wende wa mu diulu mumunyoke, uvua mumunange bikole. Uvua mutuishibue ne: nansha bu yeye mua kutuilangana ne nsombelu kayi, Nzambi wende wa dinanga uvua anu pabuipi bua kumuambuluisha.​—Mis. 118:29.

4. Tuetu batuishibue ne: Nzambi mmutunange, mmishindu kayi ya buôwa itudi mua kutshimuna?

⁴ Tudi ne bua kuikala batuishibue ne: Yehowa mmutunange muntu pa nkayende. Abi nebituambuluishe bua kutshimuna mishindu minene isatu ya buowa eyi: 1) buôwa bua ne: katuakukumbana bua kupetesha bena mu dîku bidibu nabi dijinga; 2) ditshina dia bantu, ne 3) ditshina lufu.

5. Nnsombelu kayi idi mua kufikisha mfumu wa dîku ku dishamisha mutu? (Tangila tshimfuanyi tshia pa tshizubu.)

⁵ Mfumu wa dîku kena umona mudimu wa kutabalela dîku bua kudipetesha bintu bia ku mubidi bu mudimu wa bilele to. (1 Tim. 5:8) Wewe muikale mfumu wa dîku, pamuapa katshia disama didi dimuangalake edi diabudika, uvua musamishe mutu bua ne: uvua mua kujimija mudimu uuvua wenza. Uvua mua kuikala usamisha mutu, udiambila ne: bivua mua kukukolela bua kukebela bena mu dîku diebe tshiakudia, kufuta nzubu anyi bua kufuta makuta auvua mueyekele tshintu bua kumona mua kufuta nzubu. Uvua mua kuikala kabidi ne buôwa bua ne: bu wewe mujimije mudimu, kuvua mua kupeta mukuabu to. Anu bu Nestor ne Maria batukadi bakuile, pamuapa uvua pebe muele meji ne: kushala ne makuta makese kakuvua kukumbana bua kudiambuluisha to. Satana uvua mubuelele pa buôwa buvua nabu bana betu ba bungi, mubapangishe bua kutungunuka ne kuenzela Yehowa mudimu.

6. Ntshinyi tshidi Satana ukeba kutuitabijija?

⁶ Satana udi ukeba kutuitabijija ne: Yehowa kena ututabalela muntu pa nkayende, ne kena utuambuluisha bua kupetesha bena mu dîku dietu bidibu nabi dijinga to. Abi bidi mua kutufikisha ku diamba ne: nanku au tudi ne bua kuenza tshionso tshia kuenza bua kulama anu mudimu utudi nawu, nansha wowu ushipa mêyi manene a mu Bible.

7. Ntshinyi tshidi Yezu utujadikila?

⁷ Yezu mmumanye Tatu wetu bimpe kupita muntu mukuabu kayi yonso. Udi utujadikila ne: Nzambi wetu ‘mmumanye binudi nabi dijinga kumpala mene kua nuenu kumulomba.’ (Mat. 6:8) Yezu mmumanye kabidi ne: Yehowa udi pabuipi bua kutupetesha bitudi nabi dijinga. Bu mutudi bena Kristo, Tudi ba mu dîku dia Nzambi. Tuikale batuishibue ne: bu mudiye Mfumu wa dîku, neanemeke dîyi dinene divuaye mufundishe mu 1 Timote 5:8.

8. a) Ntshinyi tshiatuambuluisha bua kutshimuna buôwa bua ne: katuakukumbana bua kupetesha bena mu dîku bidibu nabi dijinga? (Matayi 6:31-33) b) Mmunyi mutudi mua kuidikija bena dibaka badi mu foto badi babanyangana tshiakudia ne muanetu wa bakaji mukuabu?

⁸ Tuetu batuishibue ne: Yehowa mmutunange tuetu ne dîku dietu, netuikale ne  dishindika dia ne: netupete bintu bitudi nabi dijinga. (Bala Matayi 6:31-33.) Yehowa mmusue kutupeshabi. Bushuwa, mmutupeshi wa bintu, utupeshabi ne tshianza tshilekelela! Pavuaye mufuke buloba, pakumbusha bintu binene bidi ne bua kutukuatshisha bivuaye mutupeshe, mmuwuje kabidi buloba ne bintu bia bungi bia tuetu kusanka nabi. (Gen. 2:9) Kudi misangu itutu anu ne bintu bikese bua kudiambuluisha nabi, nansha nanku mbimpe tuimanyine pa ne: bidi bituambuluisha; bidi bileja ne: Yehowa ki mmupange kutupesha bintu bidi bikengela to. (Mat. 6:11) Mbimpe tuvuluke ne: bintu bidi Nzambi wetu wa dinanga utupesha lelu ne biatupeshaye matuku kumpala mbipite kule ne kule bintu bitudi tudipangisha lelu eu. Ke tshivua Nestor ne Maria bafike ku dimona.​—Yesh. 65:21, 22.

9. Tshilejilu tshia Nestor ne María tshidi tshitulongesha tshinyi?

⁹ Nestor ne María bavua ne nsombelu muimpe wa kantu ku bianza mu Colombie. Bakamba ne: “Patuakela meji a kupepeja nsombelu wetu bua kuvudija mudimu wa buambi, tuakapeta buôwa bua ne: tuetu bashale ne makuta makese, katuakuikala ne disanka menemene to.” Tshiakabambuluisha ntshinyi bua kutshimuna buôwa abu? Bakelangana meji a muvua Yehowa muleje ne: uvua mubanange. Bu muvuabu batuishibue ne: neikale anu ubatabalela, bakalekela mudimu wabu wa makuta a bungi au. Bakapana nzubu wabu, kuyabu kusombela muaba uvuabu dijinga ne bamanyishi ba bungi anu mu Colombie amu. Nestor udi wamba ne: “Tuvua badimuenene tshitu Matayi 6:33 wamba. Katuvua tupangila tshintu tshia ku mubidi nansha, ne tuvua ne nsombelu wa disanka.”

10. Bua tshinyi tudi tuamba ne: bantu badi benza bantu nabu buôwa?

¹⁰ Bantu batu batamba kuenzelangana bibi. (Muam. 8:9) Tshilejilu, badi benza mudimu bibi ne bukokeshi buabu, bangondavi badi benza malu a tshikisu, balongi badi batatshishangana mu tulasa ne bapendangana. Bushuwa, bantu badi benza bantu nabu buôwa! Mmunyi mudi Satana ukeba kubuelela pa ditshina dia bantu edi?

11-12. Mmunyi mudi Satana ubuelela pa ditshina dia bantu bua kutuluisha?

¹¹ Satana udi ubuelela pa ditshina dia bantu ditudi mua kuikala nadi anu bua ne: tulekele kuyisha ne kuenza malu makuabu adi Yehowa  utuambila. Satana mmusake mbulamatadi bua kukandika mudimu wetu ne kutukengesha. (Luka 21:12; Buak. 2:10) Bantu ba bungi ba mu buloba bua Satana ebu badi bamuangalajila Bantemu ba Yehowa malu a dishima. Bantu badi bitaba mashimi aa badi mua kutuseka, anyi mene kutututa. (Mat. 10:36) Mayele ende aa kaena atukemesha to. Ukavua muenze nawu mudimu mu bidimu lukama bia kumpala.​—Bien. 5:27, 28, 40.

¹² Ditshina buluishi budi mbulamatadi utuluisha ki ntshia mvita tshimuepele tshidi Satana utuluisha natshi to. Bua bamue bana betu, buôwa bua tshikala bena mu mêku abu mua kuamba mbupite bua bobu babatute. Mbanange balela babu bikole ne mbasue bafike pabu ku dimanya Yehowa ne ku dimunanga. Badi bumvua bibi padibu bumvua balela babu aba bakula bua Nzambi mulelela ne bua batendeledi bende kabayi ne kanemu. Kadi tshituenza ntshinyi bena mu dîku dietu bobu bakose netu malanda bua malongesha mapiamapia atudi tuitabuja?

13. Mmunyi mudi kuikala batuishibue ne: Nzambi mmutunange mua kutuambuluisha padi bena mu mêku etu batubenga? (Misambu 27:10)

¹³ Mêyi malelela malenga adi mu Misambu 27:10 (Bala.) adi atukolesha. Patudi anu tuvuluka mudi Yehowa mutunange bikole, tudi tudiumvua mu bukubi padibu batuluisha. Tudi kabidi batuishibue ne: neatufute bua dinanukila dietu. Yehowa neatabalele majinga etu a ku mubidi ne a mu nyuma, ne neatuambuluishe bua kuikala ne disanka, batukije. Kakuena muntu mukuabu udi mua kututabalela bimpe nunku bu Yehowa to! Ke tshivua Biniam utukadi batele mumone.

14. Tshilejilu tshia Biniam tshidi tshikulongesha tshinyi?

¹⁴ Biniam wakalua Ntemu wa Yehowa nansha muvuaye mumanye ne: bavua mua kumuluisha bibi. Tumonayi muvua dimanya dia ne: Yehowa mmumunange dimuambuluishe bua kutshimuna ditshina dia bantu. Udi wamba ne: “Dikengeshibua divua dibi kupita mumvua muele meji, kadi mvua ntshina buluishi bua bena mu dîku dietu bikole kupita mumvua ntshina bua kudi mbulamatadi. Mvua ne buôwa bua ne: dipangadika dianyi dia kulua Ntemu wa Yehowa kadilu kunyingalaja tatuanyi uvua kayi muena kuitabuja. Mvua ntshina kabidi bua bena mu dîku dietu kabalu kupanga kunnemeka.” Kadi Biniam uvua mutuishibue ne: Yehowa utu anu utabalela bantu badi bamunange. Udi wamba ne: “Mvua ngela meji a muvua Yehowa  muambuluishe bakuabu bua kutantamena lutatu lua makuta, kansungansunga, ne tshikisu tshia bantu. Mvua mumanye ne: meme mushale mulamate Yehowa, neambeneshe. Pakankuatabu misangu ne misangu, bankuma ne kunkuma, ngakadimuenena mudi Yehowa utuambuluisha mu tshikondo tshia dikenga tuetu bashale bamulamate.” Yehowa wakalua tatuende wa menemene wa Biniam, ne batendeledi bende bakalua dîku diabu dia menemene.

15. Bua tshinyi ditshina lufu ki ndibi anu to?

¹⁵ Bible utu ulongesha ne: lufu mmuena lukuna. (1 Kol. 15:25, 26) Padibu bakula bua lufu, tudi mua kumvua bibi menemene, nangananga tuetu anyi balela betu tusama bia bikole. Bua tshinyi tutu tutshina lufu? Bualu Yehowa mmutufuke ne dijinga dia kuikala ne muoyo kashidi. (Muam. 3:11) Kadi ditshina lufu didi mua kutuambuluishaku bua kukuba muoyo wetu. Tshilejilu, didi mua kuenza bua ne: tukebe bua kudia anu biakudia bidi bimpe, tuikale ne tshibidilu tshia kuibidija mubidi, tukebe diambuluisha dia baminganga, tunue manga padibi bikengela, ne tuepuke bua kuteka muoyo wetu mu njiwu tshianana.

16. Leja mudi Satana ubuelela pa ditshina dia lufu ditutu nadi.

¹⁶ Satana mmumanye ne: tudi basue kuikala ne muoyo. Kadi udi wamba mutudi mua kufila tshionso tshitudi natshi anyi mutudi mua kushipa tòo ne bulunda buetu ne Yehowa bua tuikale anu ne muoyo eu. (Yobo 2:4, 5) Satana udi ushima! Kadi bu mudibi ne: “udi ne mushindu wa kukebesha lufu,” udi ubuelela pa ditshina dia lufu ditutu nadi bua kutufikisha ku dilekela Yehowa. (Eb. 2:14, 15) Mu imue nsombelu, bantu ba Satana batu bafuna bua kushipa batendeledi ba Yehowa bua mudibu kabayi balekela ditabuja diabu. Mu nsombelu mikuabu, Satana udi mua kubuelela pa disama didi diamba kuya netu bua tunyange ditabuja dietu. Baminganga ne bena mu mêku etu badi mua kutuenzeja bua tuitabe batuele mashi, pabi tuetu bitabe, tudi tushipa mukenji wa Nzambi. Muntu mukuabu pende udi mua kukeba bua kutuitabijija buanga budi bubengangana ne mêyi manene a mu Bible.

17. Bilondeshile Lomo 8:37-39, bua tshinyi katuena ne bua kutshina lufu?

¹⁷ Nansha mutudi katuyi basue kufua, tudi bamanye ne: nansha tuetu ne bua kufua, Yehowa kakulekela kutunanga to. (Bala Lomo 8:37-39.) Padi balunda ba Yehowa bafua, udi ushala mubalame mu meji ende, bienze anu bu ne: badi ne muoyo. (Luka 20:37, 38) Udi ne dijinga dikole dia kubabisha ku lufu. (Yobo 14:15) Yehowa mmufute tshintu tshia mushinga mukole bua ‘tupete . . . muoyo wa tshiendelele.’ (Yone 3:16) Tudi bamanye ne: Yehowa mmutunange ne udi ututabalela bikole. Nunku pamutu pa kulekela Yehowa patudi tusama anyi patudi tukeba kufua, tudi tumulomba busambi, meji, ne bukole. Ke tshivua Valérie ne bayende benze menemene.​—Mis. 41:3.

18. Tshilejilu tshia Valérie tshidi tshikulongesha tshinyi?

¹⁸ Pavua Valérie ne bidimu 35, bakamukuata ne disama dia kansere kabi menemene katu kakayi nangananga mu bantu. Tumonayi muvua dinanga dimuambuluishe bua kutshimuna ditshina dia lufu. Udi wamba ne: “Pakangambilabu ne: mvua ne kansere, meme ne bayanyi tuakumvua bibi menemene. Bivua bikengela bampande. Ngakamonangana ne baminganga ba bungi bua bampande, kadi bavua babenga bua mumvua tshiyi ngitaba bua bangele mashi. Biakangenza buôwa, kadi bilondeshile mukenji wa Nzambi, kakuvua mushindu wa kuitaba bua baangele to!  Yehowa ukavua mundeje mu nsombelu wanyi mujima muvuaye munnange bikole. Mpindieu atshi tshivua mpunga wa meme kumuleja panyi mumvua mumunange. Dîba dionso dimvua mpeta lumu lubi, bivua binsaka bua kudisuika kabidi bikole bua kuenza bua Yehowa adiumvue, pamutu pa kuenza bua Satana atshimune. Ndekelu wa bionso, bakampanda kabayi bangele mashi. Nansha mutshidi mubidi untatshisha, Yehowa utu anu utupetesha bitudi nabi dijinga. Tshilejilu, kumpala kua kumpandabu, tuvua balonge mu bisangilu bia ku ndekelu kua lumingu tshiena-bualu tshia ne: ‘Tuikale ne dikima bua ntatu itudi tupeta lelu.’ * Tshivua tshitukoleshe bikole menemene. Tuakatshibala misangu ne misangu. Bu mutuvua tubala biena-bualu bia buena ebi ne bikale ne tshibidilu tshimpe tshia kuenza malu a mu nyuma, meme ne bayanyi tudi bapete ditalala dia mu muoyo ne mbituambuluishe bua kuikala ne nkatshinkatshi ne kuangata mapangadika mimpe.

19.Ntshinyi tshienzeka mu matuku makese emu?

¹⁹ Bena Kristo netu pa buloba bujima mbatantamene nsombelu mikole ne mbafike ku ditshimuna Diabolo ku diambuluisha dia Yehowa. (1 Pet. 5:8, 9) Wewe pebe udi mua kuenza nanku. Mu matuku makese emu, Yehowa neambile Yezu ne bantu badiye ukokesha nabu bua “kubutula midimu ya Diabolo.” (1 Yone 3:8) Pashishe bantu ba Nzambi badi bamuenzela mudimu pa buloba ‘kabakutshina tshintu ne kabakuikala ne tshintu tshidi tshibazakeja’ to. (Yesh. 54:14; Mika 4:4) Kadi pakuamba tshikondo atshi tshifike, tudi ne bua kudienzeja bikole bua kutshimuna buôwa.

20. Ntshinyi tshiatuambuluisha bua kutshimuna buôwa?

²⁰ Tudi ne bua kutungunuka ne kukolesha dishindika ditudi nadi dia ne: Yehowa mmutunange ne udi ukuba batendeledi bende. Bua kukolesha dishindika adi mbimpe tuelangane meji a bualu abu ne tuyukidilangane bua muvua Yehowa mukube batendeledi bende kale. Tudi mua kushala bavuluke muvuaye muambuluishe yonso wa kutudi bua kutua nsombelu ya tunyinganyinga tshiadi. Tudi ne mushindu wa kutshimuna buôwa ku diambuluisha dia Yehowa!​—Mis. 34:4.