1, 2. a) Bua tshinyi tudi mua kukokesha bua kuvuala bumuntu bupiabupia? b) Nngikadilu kayi ya bumuntu bupiabupia idibu batele mu Kolosayi 3:10-14?

TSHIAMBILU etshi: “bumuntu bupiabupia” tshidi misangu ibidi mu Bible wa Nkudimuinu wa bulongolodi bupiabupia. (Ef. 4:24; Kolos. 3:10) Tshidi tshileja bumuntu budi “bufukibue bilondeshile disua dia Nzambi.” Tudiku mua kupeta bumuntu bupiabupia ebu anyi? Eyowa. Yehowa uvua mufuke bantu mu tshimfuanyi tshiende ne mmutupeshe mushindu wa tuetu kuleja ngikadilu yende milenga.​—Gen. 1:26, 27; Ef. 5:1.

² Bulelela, bu mutudi bapiane dipanga bupuangane kudi baledi betu ba kumpala, tutu tupeta majinga mabi. Bikadilu bia muaba utudi basombele bidi kabidi mua kutunyanga bikole. Nansha nanku, Yehowa udi utuambuluisha ne luse bua tukokeshe bua kulua bantu ba mushindu udiye musue. Bua kukolesha dijinga dietu dia kukumbaja tshipatshila etshi, netukonkonone imue ngikadilu ya bumuntu bupiabupia ivua nyuma muimpe musake mupostolo Paulo bua kufunda. (Bala Kolosayi 3:10-14.) Netukonkonone kabidi mutudi mua kuleja ngikadilu eyi mu mudimu wetu wa buambi.

3. Ngumue ngikadilu kayi wa bumuntu bupiabupia?

³ Paulo mumane kutulomba bua kuvuala bumuntu bupiabupia, udi uleja kabidi ne: dibenga kuikala ne kansungansunga nngikadilu munene wa bumuntu bupiabupia. Wakamba ne: “Kakuena ni mmuena Greke, ni mmuena Yuda, ni nditengudibua, ni ndibenga kutengudibua, ni mmuenyi, ni mmuena Sekutiya, ni mmupika, ni mmuntu mudikadile.” * Bua tshinyi mu tshisumbu kamuena ne bua kuikala kansungansunga ka makoba, ka bisamba, anyi ka nsombelu udi nende muntu? Bualu bayidi balelela ba Kristo ‘bonso badi tshintu tshimue.’​—Kolos. 3:11; Gal. 3:28.

4. a) Mmunyi mudi batendeledi ba Yehowa ne bua kuenzela bantu bakuabu malu? b) Nnsombelu kayi udi mua kutatshisha bua bena Kristo kuikalabu mu buobumue?

⁴ Bantu badi bavuale bumuntu bupiabupia badi benzela bena Kristo nabu ne bantu bakuabu malu ne bunême, kabayi batangila nsombelu wabu anyi dikoba diabu to. (Lomo 2:11) Bualu ebu budi mua kuikala lutatu mu amue matunga. Tshilejilu, Bantemu ba bungi ba mu Afrique du Sud batshidi basombele miaba ivuabu bakosele bantu ba dikoba diabu bua kusombela bu mudi: mu misoko ya kumpenga idi ne bantu ba bungi, bimenga bia bafiike, anyi miaba ivua bantu ba makoba makuabu ne bua kusombela. Kadi bua kukankamija bana betu bua ‘kudialabaja,’ mu ngondo wa 10/2013, Kasumbu Kaludiki kakanyisha dilomba dia kulongolola bualu kampanda bua pa buabu bua kuambuluisha bana betu bua bamanyangane bimpe. (2 Kol. 6:13, NWT; dim.) Mmalu kayi avuabu balongolole?

5, 6. a) Bua kukolesha buobumue bua bantu ba Nzambi mu dimue ditunga, mmalu kayi avuabu balongolole bua kuenza? (Tangila tshimfuanyi tshia ntuadijilu tshia tshiena-bualu.) b) Mbipeta kayi bidi bimueneke?

⁵ Bavua balongolole bua bisumbu bibidi bia miakulu mishilangane anyi bia bantu ba makoba mashilangane bidisangishe pamue amue matuku a ku ndekelu kua lumingu. Bana betu ba balume ne ba bakaji ba mu bisumbu ebi bavua bayisha pamue, babuela mu bisangilu pamue ne bakidilangana ku nzubu yabu. Bisumbu bia bungi biakenza bualu ebu, ne bena ku Betele bakapeta luapolo luimpe kudi bantu ba bungi bua dilongolola edi, too ne kudi bantu bavua kabayi Bantemu. Tshilejilu, mpasata kampanda wakafika ne ku diamba ne: “Tshiena Ntemu to, kadi ndi nnuambila ne: nudi balongolole mudimu wa diyisha mu mushindu wa dikema, ne nudi bantu ba makoba mashilashilangane kadi bikale mu buobumue.” Mmunyi muvua dilongolola edi diambuluishe Bantemu?

⁶ Kumpala, muanetu wa bakaji kampanda utu wakula muakulu wa Xhosa diende Noma, uvua utshina bua kubikila bana betu batoke ba mu tshisumbu tshia muakulu wa Anglais ku nzubu kuende. Kadi yeye mumane kuyisha ne Bantemu batoke ne mumone muvuabu bamuakidile ku nzubu yabu, wakakema wamba ne: “Mbantu anu bu tuetu!” Nunku pavua tshisumbu tshia muakulu wa Xhosa ne bua kuakidila patshi tshisumbu tshia muakulu wa Anglais, wakalamba biakudia ne kubikila bamue bantu kuende. Mu benyi bende abu muvua mukulu kampanda mutoke. Noma wakamba ne: “Ngakakema bikole bua muvuaye muitabe bua kusomba pa kabasa ka ndundu.” Dilongolola edi ditshidi ditungunuka ndiambuluishe bana betu ba bungi balume ne bakaji bua kupeta balunda bapiabapia, ne mbadisuike bua kutungunuka ne kudialabaja padibu basombeshangana.

7. Bua tshinyi bidi bikengela kutungunuka ne kuditeka pa muaba wa bakuabu?

⁷ Netutungunuke ne kupeta ntatu too ne padi bulongolodi bua Satana butua ku ndekelu. Tudi tupeta ntatu bu mudi: bulofua, masama makole, dikengeshibua, bipupu, dijimija dia bintu dikebesha kudi buenzavi anyi ntatu mikuabu. Bua tuetu kuambuluishangana patudi mu makenga anyi buluishi, tudi ne bua kuditeka pa muaba wa bakuabu ne muoyo mujima. Diditeka pa muaba wa  bakuabu ne dinanga dionso neditusake bua kuenzelangana malu ne bulenga. (Ef. 4:32, NWT) Ngikadilu ya bumuntu bupiabupia eyi neituambuluishe bua kuidikija Nzambi ne kukolesha bakuabu.​—2 Kol. 1:3, 4.

8. Tuetu tuditeka pa muaba wa bantu bonso mu tshisumbu ne tubaleja bulenga, tudi mua kupeta bipeta kayi bimpe? Fila tshilejilu.

⁸ Mmunyi mutudi mua kuleja ne: tudi tuangata bantu ba ku babende anyi badi kabayi ne kantu badi mu tshisumbu tshietu ne mushinga wa bungi? Tudi ne bua kudia bulunda ne bantu ba nunku ne kubambuluisha bua bamone ne: badi ne mushinga mu tshisumbu. (1 Kol. 12:22, 25) Tukonkonone tshivua tshifikile Dannykarl uvua mumbuke mu Philippines muye mu Japon. Ku mudimu kuabu, bavua bamuenzela malu bishilangane ne muvuabu benzela bena mudimu nende ba mu ditunga. Pashishe wakabuela mu bisangilu bia Bantemu ba Yehowa. Dannykarl udi wamba ne: “Bantu pabuipi ne bonso bavua bena mu Japon, kadi bakangakidila ne disanka bienze anu bu ne: tuvua bamanyangane nabu kuonso eku.” Bu muvuabu batungunuke ne kumuenzela malu ne bulenga, biakamuambuluisha bua kuya kumpala mu malu a mu nyuma. Wakabatijibua, ne lelu udi mukulu. Bakulu nende badi bamona Dannykarl ne mukajende Jennifer bu dibenesha didibu bapete mu tshisumbu tshiabu. Bakulu aba badi bamba bua bualu buabu ne: “Mbampanda-njila badi ne nsombelu mupepele ne badi tshilejilu tshimpe tshia dikeba tshia kumpala Bukalenge.”​—Luka 12:31.

9, 10. Fila bilejilu bidi bileja masanka atudi tupeta patudi tuditeka pa muaba wa bakuabu mu mudimu wa buambi.

⁹ Patudi tuyisha mukenji wa Bukalenge ne bantu bakuabu, mmpunga muimpe wa tuetu kuenzela “bantu bonso malu mimpe.” (Gal. 6:10) Bantemu ba bungi badi badienzeja bua kulonga muakulu mukuabu bualu badi baditeka pa muaba wa bantu ba mu matunga makuabu badi balue mu ditunga diabu. (1 Kol. 9:23) Kuenza nunku nkubapeteshe masanka a bungi. Tshilejilu, muanetu wa bakaji kampanda mpanda-njila wa mu Australie diende Tiffany, wakalonga muakulu wa Swahili bua kuambuluisha mu tshisumbu tshia muakulu eu tshidi mu tshimenga tshia Brisbane. Nansha muvua kulonga muakulu eu kutatshishe Tiffany bikole, nsombelu wende mmulengele bikole. Udi wamba ne: “Wewe musue bua mudimu wa diyisha ukusankishe, ndaku mu tshisumbu tshia muakulu muenyi. Kudi anu bu kuenza luendu kuyi upatuka mu tshimenga tshienu. Udi ufika ku diumvua tshidi kuikala mu dîku dia bena Kristo dia pa buloba bujima kumvuija ne udimuenena buobumue buadi budi bukemesha.”

¹⁰ Tuangate kabidi tshilejilu tshia dîku kampanda dia mu Japon. Muana wa bakaji wa mu dîku edi, diende Sakiko, udi uleja ne: “Patuvua tuyisha mu bidimu bia 1990, tuvua tutamba kutuilangana ne bena mu Brésil bavua balue mu ditunga dietu. Patuvua tubabadisha mvese mu Bible  wabu wa mu Tshimputulukeshi, bu mudi Buakabuluibua 21:3, 4 anyi Misambu 37:10, 11, 29, bavua bateya ntema ne imue misangu bapuekesha too ne binsonji.” Diditeka pa muaba wa bakuabu dia bena mu dîku edi kadivua dimanyine anu apu to. Sakiko udi wamba ne: “Patuakamona nzala ya mu nyuma ivuabu nayi, tuakatuadija kulonga Tshimputulukeshi mu dîku dietu.” Pashishe, dîku edi diakambuluisha bua kutuadija tshisumbu tshia muakulu wa Tshimputulukeshi. Mu kupita kua bidimu, bena mu dîku edi bakambuluisha bantu ba bungi bavua balue mu ditunga diabu bua kuluabu batendeledi ba Yehowa. Sakiko udi wamba kabidi ne: “Bivua bikengela kudienzeja bikole bua kulonga Tshimputulukeshi, kadi masanka atudi bapete mmapite didienzeja edi. Tudi ne dianyisha dia bungi kudi Yehowa.”​—Bala Bienzedi 10:34, 35.

11, 12. a) Bua tshinyi kuvuala bumuntu bupiabupia bikale ne meji mimpe kudi ne mushinga? b) Ntshinyi tshiatuambuluisha bua kuikala ne didipuekesha?

¹¹ Tshidi ne bua kutusaka bua kuvuala bumuntu bupiabupia nkutumbisha Yehowa, kadi ki nkukeba lumu lua kudi bantu to. Vuluka ne: nansha tshifukibua tshia mu nyuma tshivua tshipuangane tshiakenza mpekatu bualu tshivua tshilekele lutambishi luwula munda muatshi. (Fuanyikija ne Yehezekele 28:17.) Mbikole menemene bua bantu benji ba mpekatu kuepuka lutambishi lubi ne diambu! Nansha nanku, tudi mua kukokesha bua kuvuala didipuekesha. Ntshinyi tshiatuambuluisha bua kuenza nanku?

¹² Bua kuikala ne didipuekesha, tudi ne bua kukeba dîba dituku dionso dia kuelangana meji a malu atudi tubala mu Dîyi dia Nzambi. (Dut. 17:18-20) Tudi ne bua kuelangana meji nangananga a malongesha a Yezu ne tshilejilu tshimpe tshia mudimu uvuaye muenze ne didipuekesha. (Mat. 20:28) Yezu uvua muoweshe too ne bapostolo bende mâyi ku makasa. (Yone 13:12-17) Tudi kabidi ne bua kusambila misangu yonso bua nyuma wa Nzambi atuambuluishe bua kuluisha lungenyi kayi luonso lua kudimona bapite bakuabu.​—Gal. 6:3, 4; Filip. 2:3.

13. Kuikala ne didipuekesha kudi kupetesha masanka kayi?

¹³ Bala Nsumuinu 22:4. Badi balomba batendeledi balelela bonso bua kuikala ne didipuekesha, ne ngikadilu eu udi upetesha masanka a bungi. Kuikala ne didipuekesha nekutuambuluishe bua kulama ditalala ne buobumue mu tshisumbu. Kupeta ngikadilu wa didipuekesha ne kumukolesha nekutuvuije bantu badi bakumbanyine ngasa wa Nzambi. Mupostolo Petelo wakamba ne: “Nuenu bonso nuvuale didipuekesha umue kudi mukuabu, bualu Nzambi kena wanyisha bena lutambishi, kadi udi upesha bantu badi badipuekesha ngasa wende.”​—1 Pet. 5:5.

14. Nnganyi udi tshilejilu tshitambe buimpe tshia bupole ne lutulu?

¹⁴ Lelu pa buloba, batu misangu ya bungi bamona bantu badi ne bupole ne lutulu bu bantu badi kabayi ne bukole. Ngelelu wa meji wa nunku udi ubengangana bikole ne bulelela. Ngikadilu mimpe eyi idi ifumina kudi Muntu udi ne bukole bupite bungi mu diulu ne pa buloba. Yehowa Nzambi ke tshilejilu tshitambe buimpe tshia muntu udi ne bupole ne lutulu. (2 Pet. 3:9) Konkonona muvuaye muandamune Abalahama ne Lota ku diambuluisha dia banjelu bavua baleji mpala bende pavuabu bamuele nkonko. (Gen. 18:22-33; 19:18-21) Bualu bukuabu, Yehowa wakaleja tshisamba tshitomboke tshia Isalele lutulu munkatshi mua bidimu bipite pa 1 500.​—Yeh. 33:11.

15. Ntshilejilu kayi tshivua Yezu mushiye tshia dileja bupole ne lutulu?

¹⁵ Yezu uvua “mupole malu.” (Mat. 11:29) Wakaleja lutulu lua bungi pavuaye ulengulula bilema bia bayidi bende. Mu mudimu wende wonso wa diyisha pa buloba, Yezu wakatantamena malu a dishima avuabu bamubanda nawu kudi baluishi ba malu a ntendelelu. Kadi uvua ne bupole ne lutulu too ne pakamushipabu kakuyi bualu.  Pavua Yezu ukengakana ku mutshi wa makenga, wakalomba Tatuende bua afuile bantu bavua bamushipa luse, wamba ne: “ki mbamanye tshidibu benza to.” (Luka 23:34) Etshi ntshilejilu tshitambe buimpe tshia dileja bupole ne lutulu mu nsombelu mikole ya tunyinganyinga!​—Bala 1 Petelo 2:21-23.

16. Mmu mushindu kayi muimpe mutudi mua kuleja bupole ne lutulu?

¹⁶ Mmunyi mutudi mua kuleja bupole ne lutulu? Paulo wakatela mushindu umue pavuaye mufundile bena Kristo nende ne: “Nutungunuke ne kulejangana lutulu, nufuilangana luse ne muoyo mujima nansha muntu yeye muikale tshilumbu ne mukuabu. Anu bu mudi Yehowa munufuile luse ne muoyo mujima, nudi ne bua kuenza penu nanku.” (Kolos. 3:13) Bushuwa, bidi bitulomba kuikala ne bupole ne lutulu bua kutumikila dîyi dituma edi. Kadi patudi tufuilangana luse, tudi tuenza bua buobumue buikale mu tshisumbu ne tudi tubulamamu.

17. Bua tshinyi bupole ne lutulu bidi ne mushinga?

¹⁷ Muena Kristo yonso udi ne bua kuikala muvuale bupole ne lutulu. Mbualu bua mushinga budibu batulomba bua tuetu kupeta lupandu. (Mat. 5:5; Yak. 1:21) Bualu budi ne mushinga wa bungi budi ne: ku diambuluisha dia ngikadilu eyi tudi tutumbisha Yehowa ne tuambuluisha bantu bakuabu bua kutumikila mibelu ya mu Bible.​—Gal. 6:1; 2 Tim. 2:24, 25.

18. Ndipetangana kayi didi pankatshi pa dinanga ne dibenga kuikala ne kansungansunga?

¹⁸ Ngikadilu yonso itudi bakonkonone eyi idi yenda pamue ne dinanga. Tshilejilu, muyidi Yakobo wakabela bena Kristo nende bua kubenga kuangata babanji ne mushinga kupita bapele. Wakaleja ne: tshikadilu tshia nunku tshidi tshishipa mukenji munene wa ne: “Udi ne bua kunanga muntu nebe bu muudi mudinange.” Pashishe wakasakidila ne: “Nuenu nutungunuka ne kusunguluja bantu, nudi nuenza [mpekatu].” (Yak. 2:8, 9) Kadi dinanga neditusake bua kubenga kusunguluja bantu bua tulasa tudibu balonge, bua dikoba diabu, anyi bua nsombelu udibu nende. Bushuwa, katuena ne bua kudingidija bu badi kabayi ne kansungansunga to. Ngikadilu eu udi ne bua kuikala tshitupa tshia bumuntu buetu bulelela.

19. Bua tshinyi mbia mushinga bua kuvuala dinanga?

¹⁹ Dinanga didi kabidi “ne lutulu ne buimpe” ne “kadiena didiuwuja.” (1 Kol. 13:4) Bidi bikengela kuikala ne lutulu, ne bulenga ne didipuekesha bua kutungunuka ne kuyisha bantu mukenji wa Bukalenge. (Mat. 28:19) Ngikadilu imue imue eyi ke idi yambuluisha bua tuetu kusomba bipepele ne bena Kristo netu bonso, balume ne bakaji mu tshisumbu. Mbualu kayi buimpe butudi tupeta patudi ne dinanga dia nunku? Didi dikebesha buobumue mu tshisumbu budi butumbishisha Yehowa ne bukoka bantu bapiabapia badi banyisha bulelela. Mbikumbane mudi Bible umvuija bumuntu bupiabupia, ujikija ne mêyi malelela adi ne bukole aa: “Pa kumbusha malu aa onso, nuvuale dinanga, bualu didi tshisuikidi tshipuangane tshia buobumue.”​—Kolos. 3:14.

20. a) Nnkonko kayi itudi ne bua kudiela? Bua tshinyi? b) Ntshikondo kayi tshitudi batekemene?

²⁰ Yonso wa kutudi udi ne bua kudikonka ne: ‘Mmalu kayi makuabu andi mua kuenza bua kuvula bumuntu bua kale ne kubuepuka?’ Tudi ne bua kulomba Nzambi diambuluisha mu disambila bikole ne kudienzeja bikole bua kutshimuna lungenyi kayi luonso anyi tshienzedi tshionso tshidi mua kutupangisha bua kupiana Bukalenge bua Nzambi. (Gal. 5:19-21) Tudi kabidi ne bua kudiebeja ne: ‘Ndiku ntungunuka ne kuvuijibua mupiamupia mu bukole budi bulombola meji anyi, anyi?’ (Ef. 4:23, 24) Kuvuala bumuntu bupiabupia ne kutungunuka nabu mbualu budi bena Kristo bonso ne bua kutungunuka ne kuenza too ne patuikale bakumbane bua kuikala nabu mu malu onso. Pikala muntu yonso utudi bamanye muvuale bumuntu bupiabupia mu mushindu mupuangane, nsombelu neikale muimpe be!