MÊYI A MU BIBLE: “Lekelayi kuditatshisha bua mioyo yenu.”​—Matayi 6:25.

Bidi biumvuija tshinyi? Yezu wakamba mêyi aa mu muyuki wende wa pa mukuna. Bilondeshile diksionere kampanda dia malu a mu Bible, muaku wa pa muanda wa mu tshiena Greke udibu bakudimune ne: “kuditatshisha” udi mua kumvuija “mushindu utu muntu yonso wenza malu padiye mu bupele, padiye ne tshiji ne ntatu mikuabu itu imufikila mu nsombelu wende wa ku dituku ne ku dituku.” Kuditatshisha kudi kukongoloja kumvua buôwa bua malu adi mua kufika mu matuku atshilualua. Ki mbibi bua kuditatshisha bua majinga etu a ku mubidi ne kuditatshisha bua bantu batudi banange bikale bimpe to. (Filipoyi 2:20) Pavua Yezu muambe ne: “kanuditatshishi” uvua ubela bayidi bende bua kubenga kumvua buôwa bua tshianana, mbuena kuamba ne: buôwa bua bungi bua tshidi mua kutufikila malaba budi mua kutupangisha bua kuikala ne disanka bua muoyo utudi nawu lelu.​—Matayi 6:31, 34.

Bidiku mua kuenzeka nanku lelu anyi? Mbimpe tulonde mubelu wa Yezu. Bua tshinyi? Bamue bantu batu bamba ne: padi bantu bakuabu ne buôwa bua bungi, lungenyi luabu ludi kuulu kuulu, dîba adi “bidi bikebesha masama bu mudi mputa ya mu tshifu, masama a mioyo ne masama a mfuenke.”

Yezu wakaleja bua tshinyi mbimpe kuepuka kuditatshisha kakuyi bualu, bualu kabiena ne mushinga. Wakebeja ne: “Mmuntu kayi wa munkatshi muenu udi mua kusakidila nkubita umue ku bule bua muoyo wende padiye uditatshisha?” (Matayi 6:27) Kuimanyina anu pa buôwa butudi nabu kakuena mua kulepesha muoyo wetu nansha sekonde umue anyi kuwakaja to. Ku lukuabu luseke, malu kaatu enzeka misangu yonso anu mututu tuatshinamu to. Mumanyi kampanda wakamba ne: “Misangu ya bungi matuku atshilualua atu mimpe kupita mutuvua tuela meji ne: neikale.”

Mmunyi mutudi mua kubenga kuditatshisha? Tshia kumpala, tueyemenayi Nzambi. Bikala Nzambi udisha nyunyi ne uvuadika bilongo bilenga bia dikema, kakukumbajilaku bantu badi bateka malu a ntendelelu wende pa muaba wa kumpala mu nsombelu wabu majinga abu anyi? (Matayi 6:25, 26, 28-30) Tshibidi, ntatu ya ku dituku ne ku dituku mmikumbane. Yezu wakamba ne: “Kanuditatshishi bua dituku didi dilonda, bualu dituku adi nedikale ne yadi ntatu.” Kuenaku witaba ne: “dituku ne dituku didi ne yadi ntatu idi midikumbanyine” anyi?​—Matayi 6:34.

Patudi tulonda mubelu wa Yezu wa meji eu, tudi mua kuepuka masama a bungi a mubidi. Netuikale kabidi ne ditalala dia mu mutshima didi Bible ubikila ne: “ditalala dia Nzambi.”​—Filipoyi 4:6, 7.