Yisha ne dikima bua kuidikija Yezu

‘Tuakakolesha mitshima bua kunuambila lumu luimpe.’​—1 TES. 2:2.

1. Bua tshinyi lumu luimpe lua Bukalenge ludi lutusankisha?

BITU bienza disanka bua kumvua lumu luimpe. Lumu luimpe lua Bukalenge bua Nzambi ke lumu ludi lutambe ngumu mikuabu yonso. Lumu luimpe elu ludi lutujadikila ne: makenga, masama, ntatu, tunyinganyinga ne lufu nebijike. Ludi lutupesha ditekemena dia kupeta muoyo wa tshiendelele, lutumanyisha malu adi Nzambi mulongolole ne lutuleja mutudi mua kudia nende malanda mimpe. Udi mua kuela meji ne: bantu bonso nebasanke bua kumvua lumu elu luvua Yezu wambila bantu. Kadi diakabi, kabiena nanku to.

2. Umvuija mêyi a Yezu a ne: ‘Ngakuluila bua kupandulula bantu.’

² Yezu wakambila bayidi bende ne: ‘Kanuedianganyi meji ne: Meme ngakuluila bua kutuma ditalala pa buloba, tshiakuluila bua kutuma ditalala, ngakuluila bua kutuma muele wa mvita. Ngakuluila [bua kupandulula anyi] kuelesha muntu ne tatuende mpata, muana mukaji ne mamuende mpata, ne mukaji wa muana ne mamuende muenu mpata. Badi mu nzubu nebikale ne muena nzubu lukuna.’ (Mat. 10:34-36) Kadi pamutu pa bantu kuakidilabu lumu luimpe bimpe, ba bungi badi balubenga. Bakuabu badi badivuija baluishi ba bantu badi baluyisha, nansha bobu bikale bena mu dîku diabu.

3. Tudi dijinga ne tshinyi bua kuyisha lumu luimpe?

³ Tudi tuyisha malu a muomumue ne avua Yezu uyisha, ne kudi bantu badi batuteleja ne badi babenga kututeleja anu bu mu tshikondo tshia Yezu. Bualu ebu kabuena ne bua kutukemesha to, bualu Yezu uvua muambile bayidi bende ne: ‘Mupika kena  mutambe mfumuende. Biankengeshabu, nebanukengeshe kabidi.’ (Yone 15:20) Mu matunga a bungi kabatu batukengesha patoke to, kadi bantu batu batupepeja anyi batulengulula. Ke bualu kayi, tudi dijinga ne ditabuja ne muoyo mukole bua kutungunuka ne kuenza mudimu wetu wa kuyisha lumu luimpe ne dikima.​—Bala 2 Petelo 1:5-8.

4. Bua tshinyi Paulo uvua ne bua ‘kukolesha mutshima’ bua kuyisha?

⁴ Imue misangu bidi mua kukukolela bua kuyisha anyi utu umvua buôwa bua kuyisha mu mushindu kampanda. Bikalabi nanku, umanye ne: kudi bamanyishi bakuabu ba lulamatu ba bungi badi badiumvua pabu anu bu wewe. Mupostolo Paulo uvua muambi wa lumu luimpe uvua uyisha ne dikima ne uvua mumanye bimpe Dîyi dia Nzambi. Kadi kuvua misangu ivuabi bimukolela bua kuyisha ne uvua udienzeja bua kutungunuka ne kuyisha. Wakafundila bena Kristo ba mu Tesalonike ne: ‘Kadi patuakadianjila kukenga, ne pakatuenzelabu bibi ku Filipoi, bu munudi bamanye, tuakakolesha mitshima mu Nzambi wetu bua kunuambila lumu luimpe lua Nzambi mu kuluangana kua bungi.’ (1 Tes. 2:2) Bakokeshi ba mu Filipoi bavua bakumishe Paulo ne Sila nkodi, babeleshe mu buloko ne mu bikunyi. (Bien. 16:16-24) Nansha nanku, Paulo ne Sila ‘bakakolesha mitshima’ bua kutungunuka ne kuyisha. Mmushindu kayi utudi mua kuenza petu nanku? Bua kuandamuna lukonko elu, tuanji tumonayi tshivua tshiambuluishe basadidi ba Nzambi ba kale bua kuamba malu a Yehowa ne dikima ne pashishe netumone mutudi mua kubidikija.

Bavua dijinga ne dikima bua kutantamena lukuna

5. Bua tshinyi basadidi ba Yehowa ba lulamatu batu dijinga ne dikima?

⁵ Yezu Kristo ke tshilejilu tshitambe buimpe tshia muntu uvua ne dikima. Kadi katshia anu ku ntuadijilu, basadidi bonso ba lulamatu ba Yehowa batu anu dijinga ne dikima. Bua tshinyi? Bualu pavua bantu batombokele Nzambi mu budimi bua Edene, Yehowa wakamanyisha ne: nekuikale lukuna pankatshi pa bantu badi benzela Nzambi mudimu ne badi benzela Satana mudimu. (Gen. 3:15) Lukuna elu luakamueneka patoke pavuabu bashipe Abele muntu muakane kudi tutuende. Pashishe bakaluisha kabidi Hanoka, muntu muakane uvua ne muoyo kumpala kua mvula wa kabutu. Wakamanyisha ne: Nzambi uvua ne bua kulua ne mbombo ya bantu bende ba tshijila bua kubutula bantu badi kabayi batumikila mikenji yende. (Yuda 14, 15) Kakuyi mpata, malu avuaye uyisha au kaavua asankisha bantu to. Bantu bavua bakine Hanoka, ne bavua mua kuikala bamushipe bu Yehowa kayi mukosoloje matuku ende a muoyo. Hanoka uvua ne dikima dia bungi.​—Gen. 5:21-24.

6. Bua tshinyi Mose uvua dijinga ne muoyo mukole bua kuakulaye ne Palô?

⁶ Ela kabidi meji bua dikima divua Mose nadi pavuaye wakula ne Palô, mukalenge uvua bantu bamona bu nzambi ne muana wa nzambi dîba anyi Ra. Pamuapa, Palô uvua utendelela tshimfuanyi tshiende anu bu ba Palô bakuabu. Bantu bavua bamona mêyi onso a Palô anu bu mikenji. Bu muvua Palô ne bukokeshi bua bungi, muikale ne diambu ne mutu mukole, kavua muibidile bua bantu bakuabu bamuambile tshia kuenza to. Mose uvua mulami wa mikoko wa tshianana uvua ne bua kuakula kumpala kua muntu wa mushindu eu misangu ne misangu, kayi mumubikile ne kayi umuakidila bimpe. Mmalu kayi avua Mose umumanyisha? Bipupu bibi bitambe. Ntshinyi tshivuaye umulomba bua kuenza? Uvua ulomba Palô bua alekele bapika bende binunu ne binunu bua bumbuke mu ditunga diende. Mose uvuaku dijinga ne muoyo mukole anyi? Eyowa.​—Nom. 12:3; Eb. 11:27.

7, 8. (a) Ntatu kayi ivua mikuate basadidi ba Nzambi ba kale? (b) Ntshinyi tshivua tshibambuluishe bua kuakuila ntendelelu mulelela ne dikima?

⁷ Munkatshi mua bidimu bivule biakalonda, baprofete ne basadidi bakuabu ba lulamatu ba Nzambi bakatungunuka ne kuenza malu ne dikima bua kukuatshisha ntendelelu mulelela. Satana ne bantu bende bakabakengesha. Paulo udi wamba ne: ‘Bakakumibua mabue, bakakoshibua pankatshi ne nsele, bakateyibua, bakashipibua ne muele wa mvita, bakendakana  baluate biseba bia mikoko ne biseba bia mbuji, bakengela bintu, bakengeshibua, babenzela bibi.’ (Eb. 11:37) Ntshinyi tshivua tshiambuluishe basadidi ba Nzambi bua kushala ne lulamatu? Mu mvese idi kumpala kua mvese eu, mupostolo Paulo udi wakula bua tshivua tshipeshe Abele, Abalahama, Sala ne bakuabu bukole bua kutantamena ntatu. Udi wamba ne: ‘Kabavua banji kuangata biakabalayabu, kadi [mu ditabuja] bakavua bamane kubitangila ne kubinemekela pa bule.’ (Eb. 11:13) Kakuyi mpata, baprofete bu mudi Eliya, Yelemiya ne bena lulamatu bakuabu ba kumpala kua Kristo bavua bakuile ntendelelu mulelela ne dikima ne Yehowa wakabambuluisha bua kutantamena ntatu ne kushala batuishile mêsu abu pa malu avuaye mubalaye.​—Tito 1:2.

⁸ Basadidi ba Nzambi ba lulamatu ba kumpala kua Kristo bavua bindile masanka. Pabikabu ku lufu, mudimu wa Yezu Kristo muakuidi munene ne bakuidi nende 144 000 ‘neubapikule ku bupika bua dibola diabu’ ne nebalue bapuangane ku kakese ku kakese. (Lomo 8:21) Yelemiya ne basadidi bakuabu ba Nzambi ba kale bavua ne dikima bakakolesha kabidi muoyo bua mêyi avua Yehowa muambile Yelemiya ne: ‘Nebaluangane nebe, kadi kabena bakupita bukole; bualu bua meme ndi nebe bua kukupandisha.’ (Yel. 1:19) Lelu eu tudi petu tukola ku muoyo patudi tuvuluka malu adi Nzambi mutulaye ne mudiye mutujadikile bua kutulama ku malu adi mua kunyanga malanda etu nende.​—Nsu. 2:7; bala 2 Kolinto 4:17, 18.

Dinanga diakasaka Yezu bua kuyisha ne dikima

9, 10. Mmushindu kayi uvua Yezu muleje dikima diende pavuaye kumpala kua (a) bamfumu ba bena Yuda, (b) basalayi, (c) muakuidi munene, (d) Pilato?

⁹ Yezu tshilejilu tshietu wakaleja muvuaye ne dikima mu mishindu ya bungi. Tshilejilu, nansha muvua bantu banene bavua ne bukokeshi bamukine, kavua mubengeleke utshina bua kubambila patoke tshivua Nzambi musue bua bamanye to. Wakaleja patoke muvua bamfumu ba bena Yuda badiamba muvuabu bantu bakane ne kuela patoke malongesha abu a dishima. Wakabapisha mu mêsu abu, ubambila malu kayi udiangana tshibanga to. Dituku dikuabu wakabambila ne: ‘Nuenu bafundi ne Bafalese, nudi bena lubombo, mulawu ulualua kunudi! Nudi bu nkita mitokesha pa nyima, pa nyima padi pimpe ku mêsu, kadi munda muayi mudi muule tente ne mifuba ya bafue ne bukoya bua mishindu yonso. Nunku nuenu nudi bakane ku mêsu kua bantu, kadi munda muenu mudi muule tente ne lubombo ne tshishiku.’​—Mat. 23:27, 28.

¹⁰ Pavua bisumbu bia basalayi bilue kukeba Yezu mu budimi bua Getesemane, kakasokoma to, kadi wakadileja kudibu ne dikima. (Yone 18:3-8) Pashishe bakaya nende kumpala kua kabadi kanene ne muakuidi munene kumuelaye nkonko. Nansha muvuaye mumanye ne: muakuidi munene uvua ukeba tshia kumubanda natshi bua kumushipesha, Yezu wakamuambila ne dikima dionso ne: uvua Kristo ne uvua kabidi Muana wa Nzambi. Kuambilaye kabidi bantu bavua muaba au ne: bavua ne bua kumumona ‘mushikame ku tshianza tshia balume tshia Bukole ne ulua ne matutu a mu diulu.’ (Mâko 14:53, 57-65) Katupa kakese pashishe, bakasuika Yezu ne kuya nende kudi Pilato uvua mua kumulekesha. Kadi Yezu kakandamuna bualu nansha bumue ku bionso bivuabu  bamubanda nabi to. (Mâko 15:1-5) Bua kuenzaye bionso ebi, bivua bikengela ikale ne dikima.

11. Dikima didi diumvuangana ne dinanga ku tshinyi?

¹¹ Kadi Yezu wakambila Pilato ne: ‘Ngakuledibua bua bualu ebu, ngakuluila pa buloba bualu ebu, ne bua kuamba malu malelela.’ (Yone 18:37) Yehowa uvua mutume Yezu bua kuyisha lumu luimpe ne Yezu wakenza mudimu eu ne disanka bualu uvua munange Tatuende wa mu diulu. (Luka 4:18, 19) Yezu uvua kabidi munange bantu. Uvua mumanye ne: bavua bakenga. Bia muomumue, tuetu petu tudi tuyisha ne dikima bualu tudi banange Nzambi ne banange bantu netu.​—Mat. 22:36-40.

Nyuma muimpe udi utupesha bukole bua kuyisha ne dikima

12. Mbualu kayi buvua busankishe bayidi ba kumpala?

¹² Mbingu yakalonda lufu lua Yezu, bayidi bende bakasanka bikole bualu Yehowa uvua ubakumbajila bayidi bapiabapia. Anu mu dituku dimue patupu, bantu batue ku 3 000 ba bena Yuda ne ba bisamba bikuabu bavua balue mu Yelushalema bua kusekelela tshibilu tshia Pentekoste bakatambula. Bantu bonso ba mu Yelushalema bavua mua kuikala bumvue lumu lua bualu abu. Bible udi wamba ne: ‘Buôwa buakabakuata buonso buabu; bapostolo bakenza malu a kukema a bungi ne bimanyinu.’​—Bien. 2:41, 43.

13. Bua tshinyi bana betu bakalomba Nzambi bua abapeshe dikima? Ntshinyi tshiakenzeka?

¹³ Bamfumu ba bitendelelu bakafika munda bikole, kukuatabu Petelo ne Yone kubela mu buloko butuku ne kubakanyinabu bua kabakudi kabidi bua Yezu to. Kadi diakamue pakabalekelabu, Petelo ne Yone bakaya kulondela bana betu malu onso avua menzeke. Buonso buabu kulomba Nzambi bua dikengesha divuabu babakengesha adi bamba ne: ‘Mukalenge upe bantu bebe mitshima ya kuamba dîyi diebe ne dikima dikole.’ Ntshinyi tshiakenzeka? ‘Bakuula tente ne nyuma muimpe, bakamba dîyi dia Nzambi ne dikima.’​—Bien. 4:24-31.

14. Mmushindu kayi udi nyuma muimpe utuambuluisha mu mudimu wetu wa kuyisha?

¹⁴ Bukole bua nyuma muimpe wa Yehowa ke buvua buambuluishe bayidi bua kuamba dîyi dia Nzambi ne dikima. Bukole bua kuambila bantu bakuabu nansha badi batuluisha dîyi dia Nzambi ne dikima kabuena bufuma kutudi to. Tuetu balombe Yehowa nyuma wende, neatupeshaye. Yehowa udi mua kutuambuluisha petu bua kupeta dikima dia kutantamena ntatu ya mishindu yonso.​—Bala Musambu wa 138:3.

Bena Kristo badi bayisha ne dikima lelu

15. Mmushindu kayi udi bulelela bupandulula bantu lelu?

¹⁵ Anu bu ku kale, bulelela budi butungunuka anu ne kupandulula bantu. Kudi bantu badi babuitaba ne bakuabu badi babubenga ne babenga ntendelelu wetu. Bakuabu badi bakula bibi bua bualu buetu, batuseka anyi batukina anu bu muvua Yezu muambe. (Mat. 10:22) Imue misangu batu batushiminyina malu ne batunyangila lumu ku tudiomba ne mu bikandakanda. (Mus. 109:1-3) Nansha nanku, Bantemu ba Yehowa badi batungunuka ne kuyisha lumu luimpe pa buloba bujima ne dikima dionso.

16. Londa bualu budi buleja mudi dikima dietu mua kushintulula mushindu utu bantu bamona lumu luimpe.

¹⁶ Dikima dietu didi mua kuambuluisha bantu bua kushintululabu mushindu utubu bamona lumu luimpe. Tshilejilu, muanetu wa bakaji mukuabu wa mu ditunga dia Kirghizistan udi wamba ne: “Pamvua nyisha, tatu mukuabu wakangambila ne: ‘Ntu ngitabuja Nzambi kadi ki Nzambi wa bena Kristo to. Wewe mulue kabidi muaba eu, ndi nkutumina mbua.’ Panyima pende pavua mbua wa luonji muela ku shene. Kadi patuvua tuabanya Ngumu ya Bukalenge No. 37 ivua ne tshiena-bualu ne: ‘Bitendelelu bia dishima bikadi pa kufua,’ ngakangata dipangadika dia kupingana kua tatu au bua kumona ni mvua mua kuyisha bena mu dîku diende bakuabu. Kadi anu tatu ke wakunzulula tshiibi. Diakamue ngakasambila Yehowa ne kuambila tatu au ne: ‘Wetu au tatu! Ndi muvuluke tshiuvua mungambile  kukadi matuku asatu, ne ndi muvuluke kabidi mbua webe. Kadi tshivua mua kukupita patupu to, bualu anu bu wewe, ndi ngitabuja Nzambi umuepele mulelela. Mu katupa kîpi emu Nzambi neabutule bitendelelu bidi bimupendeshisha. Wewe mubale dibeji edi, neumanye malu a bungi.’ Biakankemesha bikole bualu tatu au wakangata dibeji dia Ngumu ya Bukalenge adi. Meme kuya ku lupangu lukuabu. Minite mikese pashishe, tatu wakandonda wenda unyema ne dibeji adi dikuata ku bianza. Wakangambila ne: ‘Ngadibadi. Ntshinyi tshindi ne bua kuenza bua Nzambi kalu kumbutula?’” Muanetu au wakatuadija kulonga Bible ne tatu au ne tatu kutuadijaye kubuela mu bisangilu.

17. Mmushindu kayi uvua dikima dia muanetu wa bakaji mukuabu dikoleshe mulongi wa Bible uvua ne buôwa?

¹⁷ Dikima dietu didi kabidi mua kusaka bakuabu bua kuikalabu pabu ne dikima. Tshilejilu mu ditunga dia Russie, muanetu wa bakaji mukuabu uvua mu luendu uvua musue kupesha muntu kampanda uvuabu nende mu mashinyi tshibejibeji. Pakamona tatu mukuabu nanku, wakumbuka muaba uvuaye musombe ne kunyenga muanetu tshibejibeji atshi, kutshivungakaja ne kutshimansha panshi. Wakapenda muanetu wa bakaji au bantu bonso bumvue, kumuebeja muaba udiye musombele ne kumukandika bua kayishi mu musoko wabu to. Muanetu wakalomba Yehowa diambuluisha ne kuvulukaye mêyi a Yezu a ne: ‘Kanutshinyi badi bashipa mubidi.’ (Mat. 10:28) Wakimana kulu ne lutulu luonso, kuambilaye tatu au ne: “Tshiakukuambila muaba undi musombele to, ne nentungunuke anu ne kuyisha.” Pashishe kutulukaye mu mashinyi. Kadi muanetu eu kavua mumanye ne: mamu mukuabu uvuaye ulongesha Bible uvua mu mashinyi amu to. Bua ditshina dia bantu, mamu au kavua ubuela mu bisangilu bia bena Kristo to. Kadi pakamonaye dikima dia muanetu wa bakaji, wakangata dipangadika dia kutuadija kubuela mu bisangilu.

18. Ntshinyi tshiakuambuluisha bua kuyisha ne dikima anu bu Yezu?

¹⁸ Bidi bikengela kuikala ne dikima bua kuyisha bantu badi kabayi basue kutumikila Nzambi anu bu muvua Yezu muyishe. Ntshinyi tshidi mua kukuambuluisha bua kuyisha ne dikima? Tuishila lungenyi luebe pa malu atshilualua. Kolesha dinanga diudi munange Nzambi ne bantu nebe. Lomba Yehowa bua akupeshe dikima. Ikala uvuluka misangu yonso ne: kuena nkayebe to, bualu Yezu udi nebe. (Mat. 28:20) Nyuma muimpe neakukoleshe. Yehowa pende neakubeneshe ne neakuambuluishe. Nunku, tuikalayi ne dikima ne tuambayi ne: ‘Mukalenge udi mukuatshishi wanyi; tshiena ntshina; muntu neangenzele tshinyi?’​—Eb. 13:6.

Newandamune munyi?

• Bua tshinyi basadidi ba Nzambi badi dijinga ne dikima?

• Pa bidi bitangila dikima, ntshinyi tshitudi tulongela kudi . . .

bena lulamatu ba kumpala kua Kristo?

Yezu Kristo?

bena Kristo ba kumpala?

bena Kristo netu lelu?

[Nkonko ya dilonga]

[Tshimfuanyi mu dibeji 21]

Yezu wakela bilema bia bamfumu ba bitendelelu patoke ne dikima dionso

[Tshimfuanyi mu dibeji 23]

Yehowa udi utupesha bukole bua kuyisha ne dikima