Umue mushindu munene utudi mua kutantamena ntatu eyi mpadibu batukolesha kudi bena mu dîku dietu, balunda betu ne bena Kristo netu.

Mêyi mimpe adi mulunda wetu utuambila adi mua kuikala bu manyi mimpe adi atondopa ne atukolesha. (Nsu. 16:24; 18:24; 25:11) Kadi bena Kristo balelela kabena bakeba anu bua babakoleshe bobu to. Badi badienzeja bua ‘kusamba bakuabu mu makenga a mishindu yonso ne busambi budibu bapeta kudi Nzambi.’ (2 Kol. 1:4, Luka 6:31) Bualu ebu buakafikila Antonio udi mutangidi wa distrike mu Mexique.

Pavuabu bakuate Antonio ne disama dia kansere ka mu mashi, biakamutonda. Kadi, wakadienzeja bua kubenga kuikala wela meji mu mushindu mubi. Wakenza tshinyi? Uvua udienzeja bua kuvuluka misambu ya Bukalenge ne kuyimba mu mushindu uvuaye umvua mêyi avuamu ne welangana meji bua mêyi aa. Kusambila ne dîyi dikole ne kubala Bible kuvua kabidi kumukoleshe bikole.

Antonio mmufike ku dimona ne: bena Kristo nende ke bavua batambe kumuambuluisha. Udi wamba ne: “Patuvua meme ne mukajanyi babungame, tuvua tulomba mulela wetu mukuabu uvua mukulu mu tshisumbu bua kulua kusambila netu pamue. Bualu ebu buakatukolesha ne kutupesha ditalala. Ku diambuluisha dituvua bapete kudi bena mu dîku dietu ne bena Kristo netu, mu matuku makese biakatuambuluisha bua kutantamena meji mabi.” Muanetu eu uvua ne disanka bua muvuaye mupete balunda bavua bamunange ne bamutabalela.

Nyuma muimpe udi kabidi utuambuluisha patudi mu ntatu. Mupostolo Petelo wakamba ne: nyuma muimpe ‘ndipa didi Nzambi ufila tshianana.’ (Bien. 2:38) Bualu ebu buakamueneka muvuabu bulelela pavuabu batshikijile bantu ba bungi nyuma muimpe mu Pentekoste wa mu 33. Nansha muvua Petelo muakule bua bela manyi, tuetu bonso tudi ne nyuma muimpe. Nzambi utu upesha bantu nyuma eu misangu yonso, nunku tutungunukayi ne kulomba nyuma eu.​—Yesh. 40:28-31.

Mupostolo Paulo wakapeta ntatu ya bungi ne imue misangu ivua mua kumufikisha ku njiwu ya lufu. (2 Kol. 1:8-10) Nansha nanku Paulo kavua uditatshisha bikole bua muoyo wende to. Wakakoleshibua pakamanyaye ne: Nzambi uvua umuambuluisha. Wakafunda ne: “Nzambi, Tatu wa Mukalenge wetu Yezu Kristo ne Tatu wa luse lua bungi ne Nzambi wa busambi buonso, atumbishibue, yeye udi utusamba mu makenga etu onso.” (2 Kol. 1:3, 4) Paulo kavua ulekela ntatu imutekesha to. Kadi, ntatu ivuaye utantamena yakamuambuluisha bua kuenzela bantu malu mimpe ne kubumvuila bua ikale mudiakaje bua kukolesha bantu badi dijinga ne dikoleshibua.

Pavua disama dia Antonio wakatungunuka ne mudimu wende wa mutangidi muena ngendu. Misangu ya bungi uvua utabalela bena Kristo nende, kadi pashishe yeye ne mukajende bakadienzeja bua kutangila bantu badi basama ne kubakolesha. Tshilejilu, pakakumbula Antonio muena Kristo kampanda uvua ne disama dikole, wakumvua ne: muanetu wa balume eu kavua musue kubuela mu bisangilu to. Antonio udi uleja ne: “Kavua ubenga bualu ki mmunange Yehowa ne bena Kristo nende to, kadi disama diende divua dimusake bua kudimona ne: katshivua ne mushinga kabidi to.”

Bualu bumue buvua Antonio muenze bua kukankamija muanetu uvua usama eu budi ne: wakambila muanetu wa balume au ne: yeye ke wenza disambila musangu uvuabu ne bua kutuilangana kumpala. Nansha muvua muanetu au udimona kayi mukumbane, wakitaba dilomba adi. Antonio udi wamba ne: “Wakenza disambila dimpe be! Pashishe wakashintulula lungenyi luende. Wakatuadija kudimona kabidi ne mushinga.”

Bulelela, mu mushindu kampanda anyi kansanga netupete ntatu kampanda. Kadi anu muvua Paulo muambe, bidi mua kutuambuluisha bua kusamba bakuabu padibu dijinga ne dikoleshibua. Nunku, tuikalayi tumvuila bena Kristo netu padibu mu ntatu ne tuidikijayi Yehowa Nzambi wetu pa kusamba bakuabu.