Bantemu ba Yehowa batu bashipa mabaka anyi?

BANTU ba bungi batu bamba ne: “Dibaka nedifue padi mulume anyi mukaji yeye mushintulula tshitendelelu.” Imue misangu, mêyi au ke atu bamue bantu bambile mulume anyi mukaji udi musue kulua Ntemu wa Yehowa. Kadi, mêyi au atu malelela anyi?

Mbimueneka ne: padi mulume anyi mukaji utuadija kutantshila tshitendelelu tshikuabu anyi ubenga malongesha a tshitendelelu tshiabu tshia kale, kabitu bisankisha muena dibaka nende to. Bidi mua kushiya muntu ne kanyinganyinga, kumutekesha ku muoyo ne nansha kumujula tshiji.

Mukaji ke utu nangananga wa kumpala ku dishintulula dia tshitendelelu. Bikala Bantemu ba Yehowa balongesha mukajebe, dibaka dienu didi mua kupeta lutatu anyi? Biwikala mukaji udi udisangisha ne Bantemu ba Yehowa, tshinyi tshiudi mua kuenza bua kutuyisha buôwa budi nabu bayebe?

Mmuenenu wa mulume kampanda

Tatu Mark wa mu ditunga dia Australie ukavua ne bidimu 12 mu dibaka pavua Bantemu ba Yehowa batuadije kulongesha mukajende Bible. Tatu au udi wamba ne: “Mvua ne disanka katshia ngabuela mu dibaka ne mvua kabidi ngenza mudimu wanyi muimpe. Tuvua ne nsombelu muimpe be! Kadi dimue edi mukajanyi kuitaba bua kulonga Bible ne Bantemu ba Yehowa. Meji kumvuila diakamue ne: nsombelu wa dîku dianyi udi mu njiwu. Tshia kumpala, ntshivua musue malu a mu Bible avua mukajanyi mutuadije kulonga au to, kadi biakantonda kabidi bikole pavuaye mungambile ne: uvua muangate dipangadika dia kutambula bua kuluaye pende Ntemu wa Yehowa.”

Tatu Mark kutuadija kumvua buôwa udiebeja bikala dibaka diabu mua kufua bualu mukajende walu Ntemu. Uvua wela meji a kulekesha mukajende dilonga dia Bible ne kumukandika kabidi diyukila ne Bantemu. Pamutu pa kuya mu tshiputuku, tatu Mark wakanji kulekela bua kupita matuku ndambu. Dibaka diabu diakafua anyi?

Tatu Mark udi wamba ne: “Diakalenga, dibaka dietu ndilue kukola bikole mpindieu kupita ne muvuadi kumpala. Didi anu ditungunuka ne kulengela bikole katshia mukajanyi walua Ntemu wa Yehowa mutambule kukadi mpindieu bidimu 15.” Ntshinyi tshivua tshiambuluishe bua dibaka diabu dilengela ne dikole? Mark udi wamba ne: “Pandi ntangila bungi bua bidimu bitukadi bapitshishe, ndi ngela meji ne: bionso ebi bualu  mukajanyi uvua utumikila mibelu mimpe ya mu Bible. Mukajanyi uvua unnemeka misangu yonso.”

Mibelu ya bakaji badi bambuluisha ba bayabu bimpe

Biwikale udi mukaji musela, kadi udi ulonga Bible ne Bantemu ba Yehowa, tshinyi tshiudi mua kuenza ne kuamba bua kutuyisha buôwa budi bayebe mua kuikala nabu? Konkonona mêyi mamba kudi bakaji bakuabu ba miaba mishilashilangane.

Mamu Sakiko wa mu Japon udi wamba ne: “Mbansela kukadi bidimu 31 ne ndi ne bana basatu. Ndi kabidi Ntemu wa Yehowa kukadi mpindieu bidimu bipite pa 22. Kusomba ne mulume udi kayi Ntemu bu wewe kudi mua kuikala lutatu. Kadi ntu ndienzeja bua kutumikila mubelu wa mu Bible wa kuikala ‘kumvua lubilu, kutukija kumpala kua kuakula, tshiyi nkuata tshiji lubilu.’ (Yakobo 1:19) Mvua ndienzeja bua kusomba ne bayanyi bimpe ne kuenza tshidiye ukeba bikala Bible kayi mutshikandika. Malu aa akatuambuluisha bua kuikala ne nsombelu muimpe mu dibaka dietu.”

Mamu Nadezhda wa mu ditunga dia Russie udi wamba ne: “Ndi musedibue kukadi bidimu 28 ne ndi Ntemu kukadi bidimu bipite pa 16. Kumpala kua meme kutuadija kulonga Bible, tshivua ngitaba ne: bayanyi ke udi ne bua kuikala shefu wa dîku to. Mvua musue kudienzela malu a bungi mumvua musue. Kadi, ku kakese ku kakese, meme kumone ne: kutumikila mikenji ya mu Bible kuvua kutuambuluisha bua kuikala ne ditalala ne disanka mu dîku dietu. (1 Kolinto 11:3) Kakese kakese meme kutuadija kukokela bayanyi ne yeye pende uvua mumone mumvua ngenda nshintuluka.”

Mamu Marli wa mu ditunga dia Brésil udi wamba ne: “Ndi mulele bana ba bakaji babidi ne ndi musedibue kukadi bidimu 21. Ndi ntemu wa Yehowa kukadi bidimu bipite pa 16. Ngakalonga ne: Yehowa mmusue bua bena dibaka bashale balamatangane bua kashidi, kababulukianyi nansha. Nanku, mvua nditatshisha bua ngikale mukaji muimpe udi wakula ne wenza malu bua kusankisha Yehowa ne bayanyi kabidi.”

Mamu Larisa wa mu ditunga dia Russie udi wamba ne: “Ndi Ntemu wa Yehowa kukadi bidimu bitue ku 19, bualu butambe bunene bumvua ne bua kuenza nkushintulula bikadilu bianyi. Bayanyi wakamona mushindu uvua Bible mungambuluishe bua kuikala mukaji mulenga ne kuikala kabidi nganyisha bayanyi. Ku ntuadijilu, tuvua ne mmuenenu mishilangane ya mushindu wa kukolesha bana, kadi tuakajikija ntatu ayi bimpe. Bayanyi mmuanyishe bua meme kuikala kuya ne bana betu babidi ba balume mu bisangilu bietu bia Bantemu, bualu mmusue mudibu babalongesha anu malu mimpe adi mua kubatutshisha diakalenga.”

Mamu Valquíria wa mu Brésil udi wamba ne: “Mbansela kukadi bidimu 19 ne ndi mulela muana umue wa balume. Kudi mpindieu bidimu bipite pa 13 katshia ngalua Ntemu wa Yehowa. Pangakatuadija kuyisha bantu, bayanyi kavua musue to. Kadi, ngakalonga bua kumuandamuna ne lutulu ne kumuambuluisha bua kumonaye ne: Bible uvua mungambuluishe bikole bua meme kushintuluka. Mu bungi bua matuku bayanyi wakalua kumvua ne: bivua bia mushinga wa bungi bua meme kuikala nyisha. Bayanyi udi lelu unkuatshishe bikole bua kukumbaja malu adi atangila ditabuja dianyi. Pandi nya kulongesha bantu ba ku misoko ya kule Bible, utu ungambula mu mashinyi ende uya kunshiya ne ushala mungindile too ne pandi njikija kubalongesha bua tupingane pamue.”

Bukole bua kuenza malu mimpe

Mukajebe anyi bayebe yeye ulonga Bible ne Bantemu ba Yehowa kutshinyi, wela meji ne: dibaka dienu nedifue to. Balume ne bakaji ba miaba mishilashilangane mbafike ku dimona pabu ne: Bible udi wambuluisha bua dibaka dilengela.

Mulume kampanda udi kayi Ntemu wa Yehowa wakamba ne: “Mvua ne kanyinganyinga ka bungi pavua mukajanyi muitabuje bua kushala Ntemu wa Yehowa, kadi nansha muvuabi binkolela bua kushintulula mmuenenu wanyi wa amue malu, tuakapeta masanka a bungi.” Mulume mukuabu wakamba pende bua mukajende ne: “Lulamatu lua mukajanyi, tshisumi tshiende ne bululame buende bivua binsake bua kunemeka Bantemu ba Yehowa bikole. Dibaka dietu didi ne nsombelu muimpe mutambe anu bua malongesha mimpe a mu tshitendelelu tshia ba mukajanyi. Tudi tumvuilangana ne tudi tuangata dibaka dietu bu tshintu tshia kashidi.”

 [Kazubu/​Tshimfuanyi mu dibeji 32]

Mmushindu kayi utu Bantemu ba Yehowa bamona dibaka?

Bantemu ba Yehowa batu bitaba ne: Bible n’Dîyi difundisha ku nyuma wa Nzambi. Nunku, badi batumikile tshidiye wamba bua dibaka. Tangila mandamuna adi Bible ufile ku nkonko idi ilonda eyi:

▪ Bantemu ba Yehowa batu basake batendeledi nabu bua kulekelangana ne muena dibaka udi kayi Ntemu anyi? Tòo. Mupostolo Paulo wakafunda ne: ‘Bikala muanenu wa mu Kristo ne mukaji udi kayi muena ditabuja, ne mukaji eu udi usanka bua kuikala nende, mulume kamulekedi nansha. Ne mukaji udi ne mulume udi kayi muena ditabuja, ne mulume eu udi usanka bua kuikala nende, mukaji kalekedi mulume wende nansha.’ (1 Kolinto 7:12, 13) Bantemu ba Yehowa badi batumikila mukenji eu.

▪ Batu bambila mukaji udi Ntemu wa Yehowa bua kubenga kulonda tshidi bayende wamba bualu yeye kena Ntemu anyi? Nansha kakese. Mupostolo Petelo wakafunda ne: ‘Nuenu bakaji, nukokele babayenu; nunku bikala bakuabo kabayi bitabuja dîyi dia Nzambi, nebapetshibue mu bualu bua Nzambi kabayi ne dîyi dia Nzambi, ku bienzedi bia bakaji babo; patangilabu bienzedi bienu bilengele bidi ne ditshina.’​—1 Petelo 3:1, 2.

▪ Bantemu ba Yehowa batu balongesha ne: mulume ikale tshikokesha nkaya anyi? Tòo. Mupostolo Paulo wakamba ne: ‘Ndi musue nuenu numanya ne: Mutu wa mulume yonso udi Kristo, ne mutu wa mukaji yonso udi mulume, ne mutu wa Kristo udi Nzambi.’ (1 Kolinto 11:3) Mukaji muena Kristo anemeke bayende bualu yeye ke shefu wa dîku. Kadi, bumfumu bua mulume ki bua tshikokesha nkaya to. Nealue kubadila Nzambi ne Kristo malu. Nunku, bikala mulume utumina mukajende dîyi bua ashipa mikenji ya Nzambi, dîba adi mukaji muena Kristo udi ne bua ‘kutumikila mêyi a Nzambi ku mpala kua mêyi a bantu.’​—Bienzedi 5:29.

▪ Bantemu ba Yehowa batu balongesha ne: kushipa kua dibaka nkukandikibue anyi? Tòo. Yezu Kristo wakamba ne: ‘Ndi nuambila kabidi ne: umusha mukajende kabuyi bua masandi [dilala ne muntu mukuabu], pabakaye mukaji mukuabu, yeye udi wenda masandi.’ (Matayo 19:9) Nunku, Bantemu ba Yehowa badi bitaba anu bu Yezu ne: masandi menda kudi mulume anyi mukaji ke adi mua kushipesha dibaka. Kadi, badi bitaba kabidi ne muoyo mujima ne: pa kumbusha masandi, dibaka kadiena mua kufua bua malu makuabu a tshianana to. Badi bambila Bantemu nabu bua kulonda mêyi a Yezu aa: ‘Mulume neashiye tatuende ne baba wende , nealamate kudi mukajende; bubidi buabu nebalue mubidi umue. Bua bualu ebu muntu kapanduludi tshidi tshibumbakaja kudi Nzambi.’​—Matayo 19:5, 6.