Nzambi mmuntu anyi?

Mutu ba bungi bandamuna:

▪ “Nzambi udi miaba yonso ne mu bintu bionso. Udi bu lupepele.”

▪ “Udi meji male adi kaayi kumvuija, ne mbukole bupitshidile budi kabuyi bu muntu.”

Kadi Yezu pende wakamba tshinyi?

▪ ‘Mu nzubu wa Tatu wanyi mudi miaba ya bungi ya kuikala.’ (Yone 14:2) Yezu mmuambe muvua Nzambi muikale ne nzubu anyi muaba wa kusombela wa tshifuanyikijilu.

▪ ‘Ngakafuma kudi Tatu, ngakulua pa buloba; ndi ngumuka pa buloba kabidi, nempingane kudi Tatu.’ (Yone 16:28) Yezu uvua witabuja ne: Nzambi mmuntu mulelela udi ne muaba musunguluke udiye musombele.

YEZU kavuaku muanji kuamba musangu nansha umue ne: Nzambi mbukole budi kabuyi bu muntu to. Kadi uvua uyikila ne Nzambi, umulomba mu disambila. Uvua misangu ya bungi ubikila Yehowa ne: Tatu wende wa mu diulu, tshibikidilu tshidi tshileja malanda makole avuaye nawu ne Nzambi.​—Matayo 6:14, 26, 32.

Bushuwa, ‘kakuena muntu wakuanji kutangila [anyi ukadi mumone] Nzambi,’ ne “Nzambi udi Nyuma.” (Yone 1:18; 4:24) Kadi abi kabiena bisua kumvuija ne: kena ne wende mubidi wa mushindu kampanda to. Bible udi utuambila ne: “Bikalaku mubidi wa bantu, mubidi wa nyuma udiku kabidi.” (1 Kolinto 15:44) Nanku Yehowa udi ne mubidi wa nyuma anyi?

Eyowa. Pakabika Yezu ku lufu, ‘wakabuela mu diulu muine, bua kumuenekaye mpindieu kumpala kua Nzambi bua bualu buetu.’ (Ebelu 9:24) Bualu ebu budi butulongesha malu abidi manene pa bidi bitangila Nzambi. Bua kumpala: udi ne muaba udiye usombela. Buibidi: mMuntu mulelela, kadi kena anu bukole budi kabuyi kumvuija budi miaba yonso nansha.

Kadi mmunyi mudi Nzambi ne bukole bua kukokesha bintu bionso? Nzambi udi mua kutuma nyuma wende muimpe anyi bukole budiye wenza nabu malu miaba yonso ya panu. Anu mutu tatu woluela muanende tshianza bua kumutukija ne kumukolesha, ke mudi Nzambi utuma nyuma wende munsantu bua kukumbaja disua diende.​—Musambu 104:30; 139:7.

Bu mudi Nzambi muntu, udi pende ne malu adiye musue ne adiye kayi musue ne utu pende umvua bimpe anyi bibi. Bible udi utuambila ne: Nzambi mmunange bantu bende, utu usanka bua bidiye mufuke, mmukine ditendelela dia mpingu ne utu unyingalala bua malu mabi. (Genese 6:6; Dutelonome 16:22; 1 Bakelenge 10:9; Musambu 104:31) Mu mukanda wa 1 Timote 1:11 (NW) badi bamubikila ne: ‘Nzambi wa disanka.’ Ki mpatupu pavua Yezu muambe ne: tudi mua kulonga bua kunanga Nzambi ne muoyo wetu mujima to!​—Mâko 12:30. *

[Mêyi adi kuinshi]

[Lungenyi lunene lua mu dibeji 5]

Anu bu tatu udi woluela muanende tshianza, Nzambi udi pende utuma nyuma wende muimpe bua kukumbaja disua diende