Nzambi nnganyi?

UDI mua kuandamuna lukonko elu bishi? Bamue bantu badi bela meji ne: mbamanye Nzambi bimpe, kabidi ne: mmulunda wabu wa pa muoyo. Bakuabu pabu badi bamona Nzambi bu tshilongo tshiabu tshia kule. Badi bitaba ne: Nzambi udiku, kadi kabayi bamumanye bimpe to. Wewe muitabe ne: Nzambi udiku, mmunyi muudi mua kuandamuna nkonko eyi?

1. Nzambi mmuntu anyi?

2. Nzambi utu ne dîna anyi?

3. Yezu ke Nzambi wa Bukole Buonso anyi?

4. Nzambi utuku ungelela panyi meji anyi?

5. Nzambi utu witaba mishindu yonso ya dimutendelela anyi?

 Wewe muele bantu nkonko eyi, neupete pamuapa mandamuna a dikema a mishindu ne mishindu. Nunku, kabiena bikemesha mudi mianu idi bantu bela pa bidi bitangila Nzambi ne malongesha a dishima a bualu ebu bivule mu bantu to.

Mushinga udi nawu mandamuna a nkonko eyi

Pakayikila Yezu ne mukaji uvua pende utendelela uvuaye mutuilangane nende ku tshina tshia mâyi, Yezu wakaleja mushinga wa kumanya tshidi Nzambi bimpe. Mukaji muena Samalea au wakitaba ne: Yezu uvua muprofete. Kadi kuvua bualu buvua bumutatshishe. Ntendelelu uvua Yezu uvua mushilangane ne uvuaye. Pavua mukaji au muleje Yezu bualu ebu, Yezu wakamuambila kayi udia tshibanga ne: ‘Nudi nutendelela tshinudi kanuyi bamanye.’ (Yone 4:19-22) Mbimueneke ne: Yezu uvua umulongesha ne: ki mbitendelelu bionso bidi bimanye Nzambi bimpe to.

Yezu uvua musue kuamba ne: kakuena muntu udi mua kumanya Nzambi bimpe anyi? Too. Yezu wakalua kuambila kabidi mukaji au ne: ‘Batendeledi balelela nebatendelele Nzambi mu nyuma ne mu bulelela; Tatu udi ukeba bantu ba nunku bamutendelele.’ (Yone 4:23) Udi pebe umue wa mu bantu abu badi batendelela Nzambi “mu nyuma ne mu bulelela” anyi?

Wewe muditatshishe bua kupeta diandamuna dia lukonko elu bidi ne mushinga wa bungi. Mmushinga kayi? Yezu wakaleja mushinga wa kupeta dimanya dijalame pakasambilaye ne: ‘Eu udi muoyo wa tshiendelele, bua bobu bakumanye wewe, Nzambi umuepele mulelela, ne yeye uwakatuma, Yezu Kristo mene.’ (Yone 17:3) Nunku, bua wewe kushala pebe mutekemene muoyo matuku atshilualua, mbimpe wewe kumanya tshidi Nzambi bimpe.

Kudiku mushindu wa kumanya tshidi Nzambi bimpe anyi? Eyowa, si udiku! Ke mushindu kayi au? Yezu wakawuleja pakambaye bualu buende yeye muine ne: ‘Ndi bianyi njila ne bulelela ne muoyo; kakuena muntu udi ulua kudi Tatu, kayi muanji kulua kundi diambedi.’ (Yone 14:6) Wakamba kabidi ne: ‘Kakuena muntu udi mumanye Tatu, anu Muana ne udi Muana musue kuleja Tatu.’​—Luka 10:22.

Nunku, mushindu wa kumanya Nzambi ngua kumumanyina ku malongesha a Yezu Kristo Muanende. Bua bualu ebu Yezu udi utulaya ne: “Binualamata ku dilongesha dianyi, nenuikale balongi banyi bulelela; nenumanye bulelela ne bulelela nebunupe budikadidi.”​—Yone 8:31, 32, Muanda Mulenga Lelu.

Kadi mmushindu kayi uvua Yezu mua kuandamuna nkonko itanu ituvua bele ku ntuadijilu ayi?

[Tshimfuanyi mu dibeji 4]

Utu utendelela Nzambi uudi kuyi mumanye bimpe anyi?