Nzambi utu witaba mishindu yonso ya dimutendelela anyi?

Mutu ba bungi bandamuna:

▪ “Bitendelelu bionso nnjila idi ifikishangana anu kudi Nzambi.”

▪ “Tshilumbu ntshia kuikala muntu muimpe, tshitendelelu katshiena ne bualu to.”

Kadi Yezu pende wakamba tshinyi?

▪ ‘Nubuele ku mushiku wa mbelu mubumbakane; bualu bua mushiku wa mbelu udi munene, ne njila wa kabutu udi munene, ne bantu ba bungi badi babuelamu. Mushiku wa mbelu udi mubumbakane ne njila wa ku muoyo udi mubumbakane, ne bantu banya-banya badi bamumona.’ (Matayo 7:13, 14) Yezu kavua muambe ne: njila yonso idi ifikishangana anu kudi Nzambi nansha.

▪ ‘Dituku adi bantu ba bungi nebangambile ne: Mukalenge, Mukalenge, katuena bambile bantu bualu buebe mu dîna diebe anyi? Katuena bumushe bademon mu dîna diebe anyi? Katuena benze malu a kukema a bungi mu dîna diebe anyi? Dituku adi nembambile ne: Tshiakunumanya; umukayi kundi, nudi benji ba malu mabi.’ (Matayo 7:22, 23) Yezu katu witaba anu bonso badi badiamba mudibu bamulonda to.

BENA mu bitendelelu bia bungi mbatambe kunemenena anu ku mayisha abu bobu ne ku malu abu a kabukulu. Kadi tshitu tshienzeka ntshinyi padi malongesha aa kaayi apetangana ne malu adi mu Bible Dîyi dia Nzambi? Yezu wakaleja bubi bua kulonda bilele bia bantu pakambilaye balombodi ba bitendelelu bia tshikondo tshiende ne: ‘Nuenu nuakuona dîyi dia Nzambi bualu bua bilele bienu.’ Kutelaye kabidi mêyi a Nzambi aa: ‘Bantu aba badi bannemeka ne mishiku yabu, kadi mitshima yabu kayena kundi, idi kule. Badi bantendelela tshianana, badi bayisha bantu diyisha dia mikenji ya bantu.’​—Matayo 15:1-9; Yeshaya 29:13.

Malongesha ki ngadi ne mushinga nkayawu to, bikadilu bidi kabidi ne mushinga. Bible udi wamba bua bamue bantu badi badiamba mudibu batendelela Nzambi ne: ‘Bobu badi bamba ne: Tudi bamanye Nzambi; kadi badi bamudiula ne bienzedi biabu.’ (Tito 1:16) Kadi Bible udi wamba bua bantu ba tshikondo tshietu etshi ne: ‘Nebikale banangi ba masanka, kabayi banangi ba Nzambi; nebikale ne tshimuenekelu tshia buimpe bua Nzambi, kadi bamane kudiula bukole buabu; umuke biebe kudi bantu abu kabidi.’​—2 Timote 3:4, 5.

Dikala muntu muimpe didi ne mushinga, kadi ki nkujike to. Bua tshinyi? Bualu muntu udi mua kuikala udimona anu muntu muimpe pende muikale mu bubi kayi mumanye to. Nunku, kumanya Nzambi mu bulelela kudi ne mushinga wa bungi. (Lomo 10:2, 3) Kupeta dimanya edi ne kutumikila tshidi Bible wamba nekutuambuluishe bua kusankisha Nzambi. (Matayo 7:21) Nanku kuikala mu ntendelelu muakane nkuenda mu buakane bua mutshima, mu malongesha makane ne bienzedi biakane. Kabidi kuikala ne bienzedi biakane kudi kumvuija kuenza tshidi disua dia Nzambi dituku dionso.​—1 Yone 2:17.

Wewe musue kumanya malu a bungi pa tshidi Bible wamba bua Nzambi, keba Bantemu ba Yehowa nubange kulonga nabu Bible kuyi ufuta kantu.

[Lungenyi lunene lua mu dibeji 9]

Ntendelelu muakane ngua kuenda mu buakane bua mutshima, malongesha makane ne bienzedi biakane