Dilame ku makole a nyuma mibi

JAMES uvua mukolele mu musoko wa kule mu tshidila anyi tshisanga tshia Malaita tshimue tshia ku bidila bia ditunga dia Salomon. Bavua bamulongeshe bua kuikala kunemeka bakishi katshia ku buana buende. Udi wamba ne: “Ntshivua muanji kubikila bakishi bua kuenzelabu muntu mukuabu bualu bubi to, kadi mvua ngela meji ne: bua meme kuikala ne nsombelu muimpe, mvua ne bua kuenza rarafono [ntshilele tshia kuabu tshia kulomba diambuluisha kudi bakishi] bua kudilama ku njiwu.”

Anu mutu bantu ba mu matunga makuabu a bungi bitaba ne: bakishi badi mua kuambuluisha muntu wa muoyo anyi kumuenzela bibi, ke mudi bena mu bidila bia Salomon bitaba pabu. Bantu ba bungi ba mu tshidila tshia Mélanésie batu banange bakishi batubu babikila bu bakishi bimpe, kabatu babatshina to.

Bantu badimu batu baleja mu mishindu mishilashilangane mudibu bitaba mutu bakishi benzelangana malu. Tshilejilu, patshivua James muana, bamamu ba mu musoko wabu bavua babueja bana babu mu nzubu lukasa lukasa pavuabu bumvua nyunyi udibu babikila kuabu ne: korokoro (muenze bu nyunyi wa mukuku) udila. Mbua tshinyi? Bavua bamba ne: padi nyunyi au udila, ntshimanyinu tshia ne: bakavua pa kuenzela muntu bibi.

Bamue bena misoko batu bateka dibue kampanda ditoke dia pa buadi mu mushiku wa mbelu wa nzubu yabu. James uvua muenze pende nanku wela meji ne: dibua adi divua mua kubakuba ku nyuma mibi. Ne pavua James udila biakudia ku mudimu, yeye mujikija uvua ukongoloja tusunsukila tua biakudia tuonso tuvua tumata ne tushale, utulama bua kutuimansha dîba dikuabu. Uvua utshina ne: muena manga kalu kutuangula ne kuenza natu manga bua kumubikidila bakishi bua bamutue disama.

Nansha bilele bia nunku kabiyi bienzeka muaba unudi basombele, pamuapa anu bu James udi umvua ne: bidi bikengela kulonda bilele bia ba nkambua bua bikukube ku nyuma mibi. Udi mua kuikala mutuishibue ne: kutumikila bilele ebi kudi mua kukuepula ku ntatu.

Wewe muikale unemeka Bible, udi musue kumanya mudiye wandamuna nkonko idi ilonda eyi: 1) Mmushindu kayi udi bakishi mua kukuenzela bibi? 2) Kulonda bimue bilele bia bankambua kudi mua kukufikisha ku dishala mupika wa bademon anyi? 3) Mmunyi muudi mua kudilama ku nyuma mibi ne kuikala ne disanka?

 Mutu nyuma mibi yenzela bantu bibi

Bible udi uleja ne: bakishi ki anyima ya bafue anyi nyuma idi ishala ne muoyo padi bantu bafue to. Bible udi wamba ne: ‘Bualu bua badi ne muoyo badi bamanye ne: Netufue; kadi bafue kabena bamanye bualu bumue.’ (Muambi 9:5) Nyuma mibi eyi anyi bakishi, mbanjelu batomboke bavua balamate Satana bua kupambula bantu.​—Buakabuluibua 12:9.

Bible udi wamba malu patoke ne: tudi dijinga ne bukubi ku nyuma mibi. Mupostolo Paulo wakafundila bena Kristo ba ku Efeso ne: “Bualu bua diluangana dietu dia bibula kadiena dia kufuilangana ne munyinyi ne mashi . . . kadi ne bisumbu bia nyuma mibi bidi mu miaba ya mu diulu.” Mupostolo Petelo wakafuanyikija Satana Diabolo udi mfumu wa nyuma mibi yonso ne “nyama wa ntambue udi ukungula, ukeba bantu ba kudiaye.”​—Efeso 6:12; 1 Petelo 5:8.

Mushindu wa kumpala udi Satana wenzela bantu bibi ngua kubapambuisha, kubadinga anyi kubateta bua benze malu adi Nzambi kayi musue to. Bible udi wamba ne: Satana ‘udi udiandamuna bu muanjelu wa munya.’ (2 Kolinto 11:14) Utu udileja bu nyuma wa bukubi, pende muikale ne meji mabi munda. Satana udi ufofomija lungenyi lua bantu bua kabamanyi bulelela pa bidi bimutangile ne pa bidi bitangila Nzambi to. (2 Kolinto 4:4) Bua tshinyi utu upambuisha bantu?

Satana udi anu ukeba bua bantu bamutendelele, kabidi mmusue bua bamutendelele nansha bobu bamanye anyi kabayi bamanye ne: nyeye udibu batendelela. Pavua Yezu Muana wa Nzambi pa buloba apa, Satana uvua ukeba bua Yezu ‘atue binu biende panshi amukukuile.’ Yezu wakamuandamuna ne: ‘Satana, umuka; bualu bua bakufunda dîyi ne: Kukuila Mukalenge Nzambi webe.’ (Matayo 4:9, 10) Yezu wakabenga bua kuenza bualu bonso buvua mua kumufikisha ku ditendelela Satana.

Yehowa ke udi ne bukole bupite bua bifukibua bionso bia mu nyuma ne kakulekela benzele bantu badi bamutumikila bualu bubi budi kabuyi mua kujika to. (Musambu 83:18; Lomo 16:20) Tuetu basue kusankisha Yehowa Nzambi bu muvua Yezu muenze, tudi ne bua kuepuka tshienzedi tshionso tshidi tshileja ne: tudi tutendelela Satana anyi bademon bende. Bua kuenza nanku, mbimpe tuanji kumanya bilele bia bankambua bidi bu kunemekela kua nyuma mibi. Mmunyi muudi mua kubimanya?

Manya bilele bidi kabiyi bisankisha Nzambi

Yehowa Nzambi uvua mukandike bena Isalele bua kubenga kuidikija bimue bilele bia bankambua bia bisamba biena mutumba nabu. Kubambilaye ne: ‘Muntu kikadi munkatshi muenu udi mutempi wa mbuku, nansha muena dijimbu nansha muena bilengulengu, nansha muena buloji, nansha musesuishi wa bantu ne milowo yende.’ Bible udi wamba bua bantu badi balonda bilele ebi ne: ‘Muntu yonso utu wenza malu au udi bu tshintu tshibi ku mêsu kua Yehowa.’​—Dutelonome 18:10-12.

Nunku, paudi ukonkonona bilele bidi bitangalake muaba uudi musombele, udikonka ne: Tshilele etshi tshidi tshisaka bantu ku lubuku anyi? Tshidi tshipesha bintu bidi kabiyi ne muoyo bukole bua mu mîdima bua kukuba bantu anyi? Mudiku lungenyi lua kuelelangana manga anyi kudilama bua buanga kabukukuatshi anyi? Mudiku lungenyi lua kukokela bakishi pamutu pa kukokela Yehowa peshi Yezu muleji mpala wende anyi?​—Lomo 14:11; Filipoi 2:9, 10.

Mbia mushinga bua wewe kuepuka tshilele tshionso tshidi tshisaka bantu ku ngenzelu ya nunku. Bua tshinyi? Nyuma wa Nzambi wakenzeja mupostolo Paulo bua kufunda ne: ‘Kanuena mua kudisanga ku mesa a Mukalenge [Yehowa] ne ku mesa a bademon popamue.’ Wakadimuija bantu bavua bakeba kusankisha Nzambi popamue ne nyuma mikuabu ne: bavua bajula Yehowa ‘mukawu.’ (1 Kolinto 10:20-22) Yehowa mmukumbane bua kumutendelela anu yeye nkayende ne ke tshidiye ukeba.​—Ekesode 20:4, 5.

Elabi kabidi meji bua lukonko elu: Tshilele kampanda tshidi tshisakangana ku lungenyi lua se: bujitu bua bienzedi bia muntu kabuena pambidi pende anyi? Tshilejilu, mu bisamba bia bungi kabatu basue masandi a basela anyi a bajike to, nansha Bible mmuakandike pende. (1 Kolinto 6:9, 10) Kadi, mu bimue bidila bia  mu mbuu wa Pasifike, badi mua kulekela nsongakaji wenza malu aa bikalaye wamba muvuabu bamuelele misenga anyi bisonsa, * mbuena kuamba ne: udi umvua anu dijinga dia kuenda masandi bua manga avuabu bamuenzele au.

Kadi Bible udi ulongesha ne: tudi tuambula bujitu bua bienzedi bietu. (Lomo 14:12; Galatia 6:7) Tshilejilu, Satana wakadinga Eva bua kutombokelaye Nzambi; Eva kuambaye: ‘nyoka wakundinga, ngakadia.’ Kadi, Yehowa wakanyoka Eva bua bienzedi biende. (Genese 3:13, 16, 19) Udi kabidi utufuta bua bienzedi bietu.​—Ebelu 4:13.

Tshia wewe kuenza ntshinyi?

Wewe musue kusankisha Nzambi ne kutumikila mikenji ya mu Bible, udi ne bua kuenza muebe muonso bua kukandamena Satana ne bademon. Bantu ba kale ba mioyo mitoke ba mu tshimenga tshia Efeso mbatushile tshilejilu tshimpe. Bua bobu kudiumbusha ku bukokeshi bua nyuma mibi, bakasangisha mikanda yabu yonso ya malu a manga ne majimbu, “bakayosha ku mesu kua bantu bonso.”​—Bienzedi 19:19.

Kumpala kua bantu aba kuoshabu mikanda ayi “bakadi balua, batonda basokolola malu abo.” (Bienzedi 19:18) Bu muvua dilongesha dia Kristo divua Paulo mubalongeshe dibalenge ku muoyo, bakuosha mikanda yabu ya majimbu. Bobu kushintulula kabidi ne ngelelu wabu wa meji pa bivua bitangila bilele bivuabu balamate.

Bushuwa, kabitu bipepele bua kulekela bilele bituvua balamate to. James utukavua batele kulu eku, wakapeta pende lutatu elu. Bantemu ba Yehowa bakatuadija kumulongesha Bible, yeye kunanga malu avuaye ulonga nabu. Kadi uvua mutungunuke ne tshilele tshia kuenza rarafono. Pakadikonkononaye mu bualu bua tshienzedi etshi, wakamona ne: uvua witabuja malu adi Yehowa mulaye bua matuku atshilualua, kadi bua yeye kudilama ku nyuma ya makoya, uvua ne bua kutungunuka anu ne kulamata ku bilele bia bankambua bende kabidi.

Ntshinyi tshiakambuluisha James bua kushintulula meji ende au? Udi wamba ne: “Ngakasambila Yehowa bua kunkubaye ne kungambuluisha bua meme kumueyemena. Panyima pa disambila, meme kulekela bilele abi.” Kudiku bualu bubi budi bumuenzekele anyi? James udi wamba ne: “Too. Bualu bunene budi bungenzekele mbua ne: ndi mulonge mua kueyemena Yehowa, mumone ne mudiye mua kulua mulunda wa pa muoyo.” James mmuenze mudimu wa kuyisha mêba a bungi bidimu 7 bishale ebi, wambuluisha bakuabu bua kulonga malu adi Bible ulongesha.

Kuenaku mua kuidikija pebe tshilejilu tshia James anyi? Konkonona bilele bia bankambua bitu bantu benza mu tshisamba tshienu, wenze mudimu ne bukole bua ‘meji’ ebe bua kumona ni bidi biumvuangana ne “disua dia Nzambi.” (Lomo 12:1, 2) Pashishe, wikale ne dikima dia kulekela bilele bidi mu diumvuangana ne nyuma mibi. Wewe muenze nanku, neweyemene Yehowa mujadike ne: ‘neakuitabuje’ ne neakulame. (2 Kolinto 6:16-18) Anu bu James, neumone mudi mulayi wa mu Bible eu ukukumbanyina, wa ne: ‘Dîna dia Yehowa didi tshibumba tshikole; muntu muakane udi unyemenaku, udi upanduka.’​—Nsumuinu 18:10.

[Mêyi adi kuinshi]

[Tshimfuanyi mu dibeji 13]

“Korokoro”

[Mêyi a dianyisha]

Ne dianyisha dia Dr. Bakshi Jehangir

[Tshimfuanyi mu dibeji 13]

Nsongakaji ukongoloja tusunsukila tua biakudia tudi panshi bua kabalu kuenza natu manga bua kubenzela bibi