Ndi ne disanka nansha mundi mulema

Muyuki mulonda kudi Paulette Gaspar

Nansha mumvua ne kilo mitue ku 3 pavuabu bandela, doktere wakammona ne disama kampanda dikole. Dîba diandedibu ngakatshibuka imue mifuba. Mvua ne disama dia mifuba itshibuka bikole, didibu babikila mu Mfualansa ne: Ostéogenèse imparfaite. Buobu kuntuma muaba udibu buondopela bantu badi ne masama makole, kadi badoktere bavua bela meji ne: ntshia kupanda to. Bavua batekemene ne: mvua mua kufua pa kuamba dituku dijima dijike.

MVUA mulelela mu tshimenga tshia Canberra (tshimenga tshikulu tshia ditunga dia Australie) mu dia 14 ngondo 6 tshidimu tshia 1972. Nansha muvuabu batekemene ne: nemfue, tshiakafua to. Pashishe meme kukuatshika disama divua dipatshisha bisulusulu mpangila mua kupuyakana. Bu muvua badoktere bela meji ne: mvua anu ne bua kufua, bobu kubenga bua kungondapa ne kundekelabu bua ndipuekele ne mâyi. Kadi, ngakapanda.

Ndi ngela meji a dikenga divua baledi banyi mua kuikala nadi tshikondo atshi. Bu muvuaku ditekemena dikese dia meme kupanda, baminganga ba muoyo muimpe bakabela baledi banyi bua kabatambi kusomba pabuipi nanyi to. Bavua bakandike baledi banyi bua kundengabu mu ngondo yonso isatu ya kumpala imvua mu lupitadi ayi. Bualu bivua bipepele bua kuntshibulabu. Pakamuenekabi ne: ntshivua mua kufua kabidi, badoktere kuambilabu baledi banyi bua baye kunshiya mu nzubu wa bana badi ne bulema.

Kadi baledi banyi bakapangadija bua kuya nanyi kumbelu. Pabi, mamu utshivua utuadijilaku kulonga Bible ne Bantemu ba Yehowa. Malu avuaye mulonge, akamuambuluisha bua kuangata bujitu buende bua kumbeja. Kadi bivua bimukolele bua kulamakanangana nanyi, bualu bivua bimulomba bua adifile ne lungenyi luende luonso ne bukole buende bonso bua kuntabalela. Bavua pa tshibidilu baya nanyi ku lupitadi. Mifuba yanyi ivua mua kutshibuka too pavuabu bangowesha nansha mâyi tshianana. Mifuba ivua mua kutshibuka nansha pamvua ngela nyashi.

Ngakashala kabungama

Pangakakola, mvua ngendela anu mu dikalu dia balema. Meme tshiakalonga mua kuenda nansha. Nansha mundi mulema, baledi banyi bavua bakumbaja majinga anyi mu mushindu muimpe wa dikema.

Mamu uvua kabidi udienzeja bua kundongesha mêyi a busambi a mu Bible. Tshilejilu, wakandongesha ne: matuku kumpala eku, Nzambi neavuije buloba mparadizu muikale bantu mu malanda mimpe menemene nende, ne lungenyi luimpe ne bukole bua mubidi tumatuma.  (Musambu 37:10, 11; Yeshaya 33:24) Kadi, mamu wakangambila ne: kuakupeta disanka mu nsombelu webe to, anu pavuija Nzambi buloba mparadizu.

Ku ntuadijilu, ngakabuela mu kalasa ka balema. Balongeshi banyi kabavua bangelela meji a tshimvua mua kuenza mu nsombelu wanyi, meme panyi kubenga kudifundila bualu kampanda bua kuenza. Bivua bualu bukole bua meme kujikija kalasa. Balongi betu bavua bangenzela malu a luonji. Pashishe, meme kubuela mu kalasa ka bana bonso, balema ne bavua kabayi balema basangile. Bua kuibidilangana ne balongi nanyi bivua bingangata makanda a bungi ne binsamisha lungenyi bikole. Nansha naku, mvua mudisuike bua kulonga too ne mumvua ne bua njikija tulasa tua bikadilu.

Pamvua mu tulasa tua bikadilu, meme kuelela meji pa nsombelu wa balongi betu, e kumumona wa patupu. Meme kuelela kabadi meji ku malu a mu Bible avua mamu mundongeshe. Meme kumona ne: malu avuaye wamba avua malelela. Kadi tshikondo atshi, malongesha a mu Bible kaavua manji kuntua ku muoyo to. Meme kuditua mu dienza dia bilela ne malu avua asekeshangana, ntshiyi ngela meji a makelele nansha.

Pamvua ne bidimu 18 meme kumbuka kuetu kuya kusombela mu nzubu umue ne balema bakuabu. Mvua ne disanka dia kumuka ku mbelu, kadi muikale kabidi ne buôwa. Bivua bisankisha bikole bua kuikale mudikadile, mudilekelele, kupeta balunda ne bantu ba bungi ba kusomba nabu. Balunda banyi ba bungi bakaselangana. Meme kumvua panyi dijinga dia kuikala ne mulume ne kuikala munangibue. Kadi bivua bualu bukole bua bulema buanyi, ntshivua mua kusedibua to. Bualu ebu buakambungamija.

Kadi, ntshitu muanji kubanda Nzambi bua lutatu luanyi elu nansha. Bu mukavuabu bandongeshe malu a Nzambi a bungi, mvua mumanye ne: Yeye katu mua kuenza malu mabi nansha. (Yobo 34:10) Ngakadienzeja bua kuitaba nsombelu umvua nende au. Nansha nanku, meme kubungama bikole.

Mungakalua kupetulula disanka

Diakalenga dianyi, mamu kumanyaye nsombelu umvua nende, yeye kumanyisha bakulu ba tshisumbu tshia Bantemu tshivua pabuipi ne muaba umvua musombele. Kungelaye nshinga ungambila bua meme kuya kubuela mu bisangilu ku Nzubu wa Bukalenge wa Bantemu ba Yehowa uvua pabuipi apu. Ntemu mukuabu wa bakaji kutuadijaye kundongesha Bible lumingu luonso.

Meme kuvuluka malu malelela a mu Bible avua mamu mundongeshe kukavua bidimu bia bungi bipite, nsombelu kutuadija kushintuluka wenda ulengela. Mvua ne disanka dia kumanyangana ne bena Kristo bakuabu. Kadi, ntshivua mumanye mua kuambila bantu bimvua ngumvua to, bualu mvua ntshina bua kabalu kuntapa ku muoyo. Ndi ngela meji ne: ke bualu buvua bumpangishe bua kunanga Nzambi bikole. Nansha nanku, mvua mumanye ne: bivua ne mushinga bua meme kudilambula kudiye. Nanku, meme kutambula mu ngondo wa 12 wa 1991 bua kuleja patoke mumvua mudilambule kudi Nzambi.

Meme kumbuka mu nzubu mutuvua ne balema nanyi bakuabu, kuya kusombela muaba wa nkayanyi. Kadi meme kupeta malu mimpe ne mabi. Tshilejilu, mvua mudisombele nkayanyi. Ne mvua ne buôwa bua ne: bantu balume bavua mua kumbuelela mu nzubu. Matuku makese meme kulua kuteketa kabidi ku muoyo bikole. Nansha mumvua ndienzeja bua kuikala ne tshimuenekelu tshia disanka, mvua mufua nayi munda. Mvua ne dijinga dia mulunda muimpe wa kueyemena.

Meme kumona ne: Yehowa Nzambi wakampesha mulunda umvua nkeba. Bakulu ba mu tshisumbu tshimvua mbuela bisangilu kutumabu Suzie (Ntemu mukaji mukuabu ukavua kuende) bua kutungunuka ne kundongesha Bible. Suzie kavua anu undongesha Bible patupu to, kadi wakalua mulunda wanyi wa pa muoyo umvua munange bikole.

Suzie kundongesha mua kuambila bantu bakuabu malu amvua ndonga, ku nzubu ne ku nzubu nansha pavua mpunga umueneka. Meme  kutuadija kuanyisha bikole ngikadilu minene ya Nzambi. Kadi, nansha munkavua mutambule, ntshivua muanji kunanga Nzambi ne muoyo wanyi mujima to. Dimue dituku meme kuela meji bua kulekela kuenzela Nzambi mudimu. Pangakakuatshila Suzie bualu abu, yeye kunkuatshisha mu tshikondo atshi tshikole.

Suzie kungambuluishaye bua kumvua ne: mvua mujimije disanka bualu mvua ne tshibidilu tshia kusomba ne bantu bavua kabayi banange Yehowa ne muoyo mujima to. Meme kutuadija kutantshila bena Kristo bavua batendelela Nzambi ne muoyo mujima, nangananga bantu bakulumpe. Bu mumvua ntshiyi mpetangana kabidi bimpe ne mamu ne mukuluanyi, meme kutuadija kupunga nabu kabidi. Meme kupeta disanka dimvua katshia ntshiyi muanji kupeta to. Bantemu nanyi bakuabu ne bana betu ne nangananga Yehowa, bakangambuluisha bua kupeta disanka ne bukole.​—Musambu 28:7.

Mudimu mupiamupia

Mu tshisangilu tshinene tshia Bantemu ba Yehowa tshia matuku asatu (anyi mpungilu wa distrike) tshingakabuela, ngakumvua muyiki uvua wakula bua masanka a mu mudimu wa kuyisha mêba a bungi. Meme kudiambila ne: ‘Si ndi mua kuwenza panyi!’ Kadi, mvua mujadike ne: mvua mua kupeta ntatu ya bungi. Panyima pa meme mumane kuelangana meji a bualu ebu ne musambile, meme kulomba panyi bua kuenza mudimu au, ngakautuadija mu ngondo 4 wa 1998.

Mmushindu kayi undi nkumbaja mudimu wanyi eu nansha mundi ne bulema? Ntu musue kudienzela malu bua ntshikadi bujitu kudi bantu bakuabu to, kadi bua ditambakana ne malu makuabu mvua dijinga ne diambuluisha dia bakuabu. Ke Suzie ne bayende Michael kungambilabu bua meme kusumba moto. Mmunyi mumvua mua kuwendesha? Anu munudi bamone mu foto udi muaba eu, moto au mmuenze wa pa buawu anu buanyi meme. Ne ntshivua nansha nkumbane bua kujuka mu dikalu dianyi dia balema pinapu meme ne kilo 19.

Moto wanyi eu udi ungambuluisha bua kuya kutangila bantu ne kubalongesha Bible mêba atudi tumvuangana nabu. Ndi musue kuendesha moto wanyi eu ne ngumvua mutu kapepa katutaku ku mêsu, ngumvuaku panyi mutu panuapa palenga!

Ndi ne disanka dia kutuadija miyuki ne bantu mu njila, bantu abu badi ne bukalanga ne kanemu kundi. Ndi ne disanka dia kuambuluisha bantu bakuabu bua bamanye pabu Bible. Ndi mvuluka musangu mukuabu umvua nyisha ku nzubu ne ku nzubu ne muena Kristo netu mukuabu mule be! Wakela mamu muena kumbelu kukuabu muoyo, ne mamu au kushalaye mundengamena ukatshila, e kuebejaye utuvua nende buanyi meme ne: “Utu wakula anyi?” Tuetu kutudika ne tuseku. Pangakajikija kumuyisha, mamu au kujadikaye ne: ndi ngakula bushuwa.

Ndi mpindieu ne disanka ne ndi mulonge mua kunanga Yehowa Nzambi. Ndi ngela mamu tuasakidila bua muvuaye mundongeshe malu malelela a mu Bible ne ndi mutekemena ne dishindika ne: matuku kumpala eku, Nzambi ‘neavuije bintu bionso bipiabipia’ nansha ka mubidi kanyi ka kakese aka kabidi.​—Buakabuluibua 21:4, 5.

[Lungenyi lunene lua mu dibeji 26]

“Ngakadienzeja bua kuitaba nsombelu umvua nende au. Nansha nanku, meme kubungama bikole”