Nyuma muimpe mbukole butudi nabu dijinga

PAVUA Mukalenge Davidi muenze tshilema tshinene, wakalomba ne muoyo mujima ne: ‘Kungipatshi bua tshikadi kumpala kuebe, kungumushidi nyuma webe muimpe.’​—Musambu 51:11.

Davidi wakadimuena bukole bua nyuma muimpe mu nsombelu wende matuku a bungi. Patshivuaye nsonga, bukole ebu buakamuambuluisha bua kutshimuna Goliata uvua musalayi wa dilambu. (1 Samuele 17:45-50) Buakamuambuluisha kabidi bua kufunda imue ya ku misambu milenga ya katshia ne katshia. Davidi wakamba ne: ‘Nyuma wa Yehowa wakungakuisha, dîyi diende diakadi pa ludimi luanyi.’​—2 Samuele 23:2.

Yezu Kristo nkayende wakajadika mudimu uvua nawu nyuma muimpe mu nsombelu wa Davidi. Dituku dikuabu, Yezu wakambila bateleji bende ne: ‘Davidi mene wakamba mu nyuma muimpe ne: Yehowa wakambila Makalenge wanyi ne: Shikama ku tshianza tshianyi tshia balume too ne pangateka badi nebe lukuna muinshi mua makasa ebe.’ (Mâko 12:36; Musambu 110:1) Yezu uvua mumanye ne: nyuma wa Nzambi uvua mulombole Davidi bua kufundaye misambu. Nyuma muimpe au udiku mua kutuambuluisha petu anyi?

Nutungunuke ne ‘kulomba, nebanupe’

Nansha mudi kuyi mua kufunda musambu mu Bible, kadi udi mua kupeta ntatu idi itshingisha anu bu muvua muntu wa mpolondo Goliata utshingisha bantu. Tuangate tshilejilu tshia mamu mukuabu diende Isabel. * Bayende wakamubenga bua kusela mukaji utshivua nsongakaji. Wakamushiya ne dibanza dinene ne kavua umupesha nansha makuta a kudisha bana babidi ba bakaji bavuabu balele to.  Isabel udi wamba ne: “Ndi ndiumvua muedibue mâyi ku makasa ne ndimona bu tshintu tshia patupu. Kadi katshia wanshiya, ndi mumone mudi nyuma wa Nzambi unkolesha.”

Isabel uvuaku mutekemene bua nyuma muimpe aditulukile nkayende anyi? Tòo, uvua ulomba Nzambi dituku dionso bua amutumine nyuma wende. Uvua mumanye ne: uvua dijinga ne bukole bua kudi Nzambi bua kutantamenaye malu avua mua kumukuata ne dikima, kulama bana bende bimpe ne bua kulua kudiangata kabidi ne mushinga. Wakatumikila mubelu wa Yezu wa ne: ‘Nulombe, nebanupe; nukebe, nenumone; nukokole, nebanunzuluile.’​—Matayo 7:7.

Roberto pende uvua dijinga ne nyuma wa Nzambi kadi bua bualu bukuabu. Uvua ku bupika bua makanya ne diamba, bualu uvua ubinua kayi wikisha. Wakaluangana bua kulekela bintu ebi bidimu bibidi bijima, kadi uvua anu upinganamu kabidi. Udi wamba ne: “Padi muntu ulekela kunua makanya anyi diamba, udi udiumvua anu bu udi usama. Mubidi udi utungunuka ne kubijinga dituku dionso edi.”

Roberto udi utungunuka wamba ne: “Kadi mvua mudisuike bua kushintuluka bua mfika ku dienzela Nzambi mudimu mu mushindu udiye musue. Ngakadienzeja bua kuuja meji anyi ne malu mimpe a mu Bible. Mvua nsambila dituku dionso ne muoyo mujima, ndomba Nzambi bukole bua meme kulengeja nsombelu wanyi. Mvua mumanye ne: mu meme nkayanyi tshia kuenza bualu bua nsongo to. Ngakamona muvua Yehowa wandamuna masambila anyi, nangananga pamvua ngumvua bibi pavuabi bimfikila bua kunua diamba anyi makanya. Ndi mutuishibue ne: nyuma wa Nzambi uvua umpesha bukole bupiabupia; bu kabuyi bua nyuma au, tshivua mua kulekela makanya ne diamba to.”​—Filipoi 4:6-8.

Kubuuka ‘ne mapuapua bu nyunyi ya mikanku’

Bantemu ba Yehowa miliyo mivule mbadimuene ne abu abidi bukole bua nyuma muimpe mu nsombelu wabu anu bu Isabel ne Roberto. Wewe musue, udi pebe mua kupeta bukole buenzeji bua Yehowa, buvuaye mufuke nabu diulu ne buloba. Wewe mulombe Nzambi nyuma wende ne muoyo mujima, kakukupalaye to. Kadi bua kupeta nyuma eu, tudi ne bua kuanji kulonga bua kumanya Nzambi mu bulelela ne kudienzeja bua kuenza disua diende ne muoyo mujima.​—Yeshaya 55:6; Ebelu 11:6.

Wewe muikale ne bukole bua nyuma muimpe, neupete makanda a kuenzela Nzambi mudimu bimpe ne neutantamene ntatu nansha yoyi ya mushindu kayi mu nsombelu webe. Ke tshidi Bible utujadikila padiye wamba ne: ‘Yehowa udi ukolesha badi bapanga, udi ukumbaja bukole bua muntu udi kayi ne ngulu. Badi bindila Yehowa nebasangaje bukole buabu; nebabande mulu ne mapuapua bu nyunyi ya mikanku, nebanyeme lubilu ne kabena bapungila, nebende ne kabena bateketa.’​—Yeshaya 40:28-31.

[Mêyi adi kuinshi]

[Lungenyi lunene lua mu dibeji 8]

‘Mvua nsambila dituku dionso ne muoyo mujima, ndomba Nzambi bukole. Mvua mumanye ne: mu meme nkayanyi tshia kuenza bualu bua nsongo to. Ngakamona muvua Yehowa wandamuna masambila anyi’

 [Kazubu/​Tshimfuanyi mu dibeji 7]

NYUMA MUIMPE UDI WENZA MUDIMU

Nzambi wakenza mudimu ne nyuma muimpe bua kufuka buloba ne bintu bikuabu bionso. Mufundi wa Misambu wakakatshila wamba ne: ‘Yehowa, mona mudi bungi bua mishindu ya midimu yebe! Wewe wakenza buonso buayi ne lungenyi luebe; buloba budi buule tente ne bintu biwakufuka. Udi utumaku nyuma webe, bidi bifukibua.’​—Musambu 104:24, 30; Genese 1:2; Yobo 33:4.

Nyuma muimpe wakambuluisha basadidi ba Nzambi bua kufunda Bible. Mupostolo Paulo wakafunda ne: ‘Dîyi dionso dia mu Mukanda wa Nzambi didi difume munda mua Nzambi bu mupuya wende, ne didi ne mudimu muimpe.’ (2 Timote 3:16) Mupuya wa Yehowa anyi nyuma wende wakalombola meji a bafundi ba Bible, ke bualu kayi bakafunda anu ‘dîyi dia Nzambi.’​—1 Tesalonike 2:13.

Nyuma muimpe wakambuluisha basadidi ba Nzambi bua kumanyisha malu adi alue kumpala ne dishindika dionso. Mupostolo Petelo wakamba ne: ‘Kakuena diyisha dia baprofete dia mu Mukanda wa Nzambi didi difuma ku dijingulula dia muntu. Bualu bua kakuena diyisha dia baprofete diakanji kulua ku disua dia muntu; kadi bantu bakamba dîyi dia kudi Nzambi benzeja kudi nyuma muimpe.’​—2 Petelo 1:20, 21; Yoele 2:28.

Nyuma muimpe wakambuluisha Yezu ne bantu bakuabu ba ditabuja bua kuyisha lumu luimpe lua Bukalenge bua Nzambi ne kuenza bishima. Yezu wakamba ne: ‘Nyuma wa Nzambi udi pambidi panyi, bualu bua yeye wakangela manyi pa mutu ne: Ambila bantu bapele lumu luimpe; yeye wakuntuma ne: Ambila bena lukanu bualu bua dikopoka diabu, ne bafofo bualu bua kutabeja kua mêsu abu.’​—Luka 4:18; Matayo 12:28.

 [Kazubu/​Tshimfuanyi mu dibeji 9]

MUDI NYUMA MUIMPE MUA KUTUAMBULUISHA

Nyuma muimpe udi mua kukuambuluisha bua kutantamena mateta ne kulekela bibidilu bibi. Mupostolo Paulo wakamba ne: ‘Nzambi udi mua kueyemenyibua, ngudi kayi witabuja bua nuenu nutetshibue ne diteta didi dinupita bukole; kadi palua diteta, yeye neanuenzele njila wa kupandukila, bua nuenu numanye mua kutantamana mu diteta.’​—1 Kolinto 10:13.

Nyuma muimpe udi mua kukuambuluisha bua kuikala ne ngikadilu idi isankisha Nzambi. ‘Mamuma a nyuma adi dinanga, disanka, ditalala, lutulu, luse, buimpe, bunanukidi bua lulamatu, kudipuekesha, kudikanda.’​—Galatia 5:22, 23.

Nyuma muimpe udi mua kukukolesha bua kunanukila mu makenga. “Ndi mua kuenza bionso ebi mu dina dia Kristo udi umpesha bukole.”​—Filipoi 4:13, MMM.