“Yehowa udi utangila mu mutshima”
Semena pabuipi ne Nzambi
“Yehowa udi utangila mu mutshima”
TSHIMUENEKELU tshidi mua kutudinga. Tshidi muntu kuisu katshiena tshileja menemene tshidiye munda anyi tshidi mu muoyo wende to. Bantu batu batangila anu tshimuenekelu tshia muntu patupu. Kadi Yehowa Nzambi yeye udi utangila tshidi munda mua muntu. Mêyi adi mu 1 Samuele 16:1-12 adi ajadika bualu ebu.
Ela meji ku tshivua tshienzeke paudi wende ubala muyuki udi ulonda eu. Yehowa udi ukeba kusungula mukalenge mupiamupia bua kulombola tshisamba tshia Isalele. Udi wambila muprofete Samuele ne: ‘Nenkutume kudi Yishai, muena Beteleheme, bualu bua ngakadisunguila mukalenge munkatshi mua bana bende ba balume.’ (Mvese 1) Yehowa kena utela dîna dia uvuaye musungule to, kadi udi wamba anu ne: muntu au uvua umue wa ku bana ba Yishai. Pavua Samuele uya mutangile ku Beteleheme, uvua mua kuikala udikonka ne: ‘Mmunyi mungamanya muana wa Yishai udi Yehowa musungule?’
Padi Samuele ufika ku Beteleheme udi wambila Yishai ne bana bende bua badilongolole bua kulambula mulambu ne kudia pamue. Padi Eliaba muanabute ubuela, tshimuenekelu tshiende tshidi tshikoka diakamue ntema ya Samuele. Ke yeye kuela meji ne: bu muvua Eliaba muimpe ne mule uvua mukumbane bua kuikala mukalenge. Yeye kudiambila ne: ‘Bulelela, udi Yehowa musungule udi kumpala kuende.’—Mvese 6.
Kadi Yehowa yeye udi umona malu mushindu mukuabu. Udi wambila Samuele ne: ‘Kutangidi mpala wende anyi bule buende, bualu bua meme ngakamupidia.’ (Mvese 7) Bule bua Eliaba ne buimpe bua mpala wende kabiena bikemesha Yehowa nansha. Yehowa udi utangila muntu mu kabujima kende ne udi utangila buimpe budi mu mutshima wende.
Yehowa udi wambila Samuele ne: “Yehowa kena utangila bu mudi bantu batangila, bualu bua bantu badi batangila anu mubidi, kadi Yehowa udi utangila mu mutshima.” (Mvese 7) Bushuwa, Yehowa udi utangila yeye muoyo wa muntu, mbuena kuamba ne: tshitu tshimusaka bua kuela meji, kuenza malu ne kudiumvua mushindu kampanda. Yehowa utu “uteta mitshima” udi ubenga Eliaba ne bana bakuabu basambombo ba Yishai badi balua kumpala kua Samuele.—Nsumuinu 17:3.
Yishai udi kabidi ne muana mukuabu wa mukala diende: Davidi. Yeye udi “ulama mikoko.” (Mvese 11) Ke kubikidishabu Davidi mu mpata mudiye bua kuluaye kumpala kua Samuele. Ke Yehowa kuambila Samuele ne: ‘Bika umuele manyi pa mutu, eu nyeye mene.’ (Mvese 12) Bushuwa, Davidi udi ne ‘mêsu mimpe ne muakane kumona.’ Kadi muoyo wende ke udi usankisha mêsu a Nzambi bikole.—1 Samuele 13:14.
Nansha mutudi mu bulongolodi mudi bantu batamba kuangata buimpe bua mpala ne mushinga, bidi bitukolesha ku muoyo patudi tumanya ne: Yehowa Nzambi yeye kena utangila tshimuenekelu patupu. Nansha wewe mule anyi bantu bakuabu bakuamba muudi muimpe kabiena bimuenzela yeye bualu. Yehowa udi yeye utangila tshiudi munda, mbuena kuamba ne: muoyo webe. Dimanya edi kadienaku dikusaka bua kuikala ne ngikadilu mimpe yakuvuija muntu muimpe ku mêsu kua Nzambi anyi?
