Nzambi kavua mufuke Diabolo to. Kadi Nzambi wakafuka muanjelu uvua mulue kulua pashishe Diabolo ne Satana. Yezu uvua muleje ne: mu tshikondo kampanda Diabolo uvua ne lulamatu kayi ne kalema to. Ku ntuadijilu, Diabolo uvua muanjelu, muana wa Nzambi uvua muakane.​—Bala Yone 8:44.

Muanjelu uvua mulue Diabolo eu uvua mutombokele Nzambi ne kusaka bena dibaka ba kumpala bua kutua ku tshiende. Pavuaye muenze nunku, uvua mudivuije nkayende Satana, dîna didi diumvuija “Muluishi.”​—Bala Genese 3:1-5; Buakabuluibua 12:9.

Anu bu bifukibua bikuabu bia Nzambi bia meji, muanjelu uvua mulue Diabolo eu uvua ne budikadidi bua kusungula tshidi tshimpe anyi tshidi tshibi, kadi wakalekela dijinga divuaye nadi dia bantu bamutendelela dikola mu muoyo wende. Dijinga diende dia kumutumbishabu dia kakola kupita dijinga diende dia kusankisha Nzambi.​—Bala Matayi 4:8, 9; Yakobo 1:13, 14.

Mmunyi mudi Diabolo utungunuka ne kupambuisha bantu? Udiku mua kumutshina anyi? Udi mua kupeta mandamuna a nkonko eyi mu Bible.