Anu bu muudi mumanye, kushima nkuamba bualu buudi mumanye ne: ki mbulelela to. Kutuku muanji kushima anyi?— * Nansha bamue bantu bakulumpe bavua banange Nzambi bakashima. Udi mua kuikala mumanye muntu kampanda wa mu Bible uvua mushime. Dîna diende m’Petelo, umue wa ku bapostolo 12 ba Yezu. Tukonkonone mushindu uvuaye mushime.

Bobu bamane kukuata Yezu, bakaya nende ku nzubu kua muakuidi munene. Tukavua bapite mundankulu. Petelo udi ubuela mu lupangu lua muakuidi munene kabayi bamumone. Bua dinkenke dia kapia, nsongakaji muena mudimu wa muakuidi munene udi umona Petelo. Udi wamba ne: “Wewe pebe uvua ne Yezu.” Bua buôwa, Petelo udi wamba ne: ki meme to.

Bible udi wamba ne: pashishe “nsongakaji mukuabu wakamumona.” Wakamba pende ne: “Muntu eu uvua ne Yezu.” Petelo udi uvila kabidi. Mutantshi mukese pashishe, bantu bakuabu bakaya kudi Petelo ne kumuambila ne: “Bushuwa, wewe pebe udi umue wa kudibu.”

Petelo udi umvua buôwa. Nunku bua musangu muisatu, udi ushima wamba ne: “Tshiena mumanye muntu au to!” Tshitala kusama. Yezu kukudimuka kutangila Petelo, ne Petelo kuvuluka ne: mêba makese kumpala, Yezu uvua mumuambile ne: “Kumpala kua tshitala kusama, wewe neumvile misangu isatu.” Petelo udi utuadija kudila. Bidi bimutonda bikole!

Bualu bua mushindu eu budiku mua kukufikila anyi?— Udi mua kuikala mu kalasa ne balongi benu umvua bakula bua Bantemu ba Yehowa. Umue wamba ne: “Kabatu bakosela dibendele mpala.” Mukuabu wamba pende ne: “Kabatu baluanganyina ditunga diabu mvita to.” Mukuabu pende wamba ne: “Ki bena Kristo balelela to, bualu kabatu benza Nowele.” Pashishe mukuabu ukutangila ukuebeja ne: “Wewe pebe udi Ntemu wa Yehowa anyi?” Newandamune tshinyi?—

 Udi ne bua kudilongolola bua kufila diandamuna dimpe kumpala kua bualu bua mushindu eu kukufikilabu. Petelo kavua mudilongolole to. Pavua lutatu lumufikile, uvua mushime! Kadi uvua munyingalale bikole bua tshivuaye muenze, ne Nzambi wakamufuila luse.

Ananiya muyidi mukuabu wa Yezu wa mu bidimu lukama bia kumpala, uvua pende mushime. Kadi Nzambi kavua mumufuile luse ne kavua kabidi mufuile mukajende Sapila luse to. Uvua muitabe lungenyi lua bayende bua bobu kushima. Tukonkonone bua tshinyi Nzambi kavua mufuile Ananiya ne Sapila luse.

Matuku dikumi Yezu mumane kushiya bapostolo bende ne mupingane mu diulu kudi Nzambi, bantu batue ku 3 000 bakabatijibua mu Yelushalema. Ba bungi ba kudibu bavua bafume miaba ya kule bua kulua kuenza tshibilu tshia Pentekoste, ne bobu bamane kulua bayidi ba Yezu bavua basue kushala ndambu wa matuku bua kulonga malu a bungi avua atangila ditabuja diabu dipiadipia. Nunku bamue bayidi ba Yezu bavua bafila makuta bua kuambuluisha benyi aba.

Ananiya ne mukajende badi bapana bintu biabu bua kupeta makuta a kuambuluisha nawu bena Kristo bapiabapia aba. Padi Ananiya uya ne makuta kumpala kua bapostolo, udi wamba ne: ke onso avuabu bapete ku bintu bivuabu bapane. Kadi ki mmuomu to! Uvua musokoke makuta makuabu buende yeye! Nzambi udi wenza bua Petelo amune bualu ebu, ne nunku Petelo udi wambila Ananiya ne: “Kuena mushime bantu to, kadi udi mushime Nzambi.” Pakumvua Ananiya mêyi aa, wakakuluka panshi, kufuaye! Mêba bu asatu pashishe, mukajende kuluaye pende. Kayi mumanye tshivua tshifikile bayende to. Udi pende ushima ne ukuluka panshi ufua.

Dilongesha dinene mu bualu ebu didi ne: kuamba bulelela kudi ne mushinga! Eyowa, tuetu bonso tudi ne bua kupetela dilongesha ku bualu ebu! Tuetu bonso tudi mua kuenza bilema nanganangana patudi bana. Kuenaku umvua disanka bua mudi Yehowa mukunange ne muikalaye mua kukufuila luse bu muvuaye mufuile Petelo anyi?— Kadi vuluka ne: tudi ne bua kuamba bulelela. Tuetu benze tshilema tshinene tshia kushima, tudi ne bua kulomba Nzambi bua kutufuilaye luse. Ke tshivua Petelo mua kuikala muenze, ne bakamufuila luse. Tuetu badienzeje bua kubenga kushima, Nzambi neatufuile petu luse!