Bua kusankisha Nzambi bidi bikengela tshinyi? Kudiku mulongolongo wa mikenji itudi ne bua kulonda anyi? Diakalenga, diandamuna didi ne: tòo. Bilondeshile Yezu Kristo Muana wa Nzambi, malu adi Nzambi utulomba mmasuikakaja mu dîyi dimue.​—Bala Mâko 12:28-31.

Tuanji kukonkonona dîba divua Yezu muambe mêyi ende. Uvua ulongesha mu ntempelo mu dia 11 a ngondo wa Nisana, matuku makese kumpala kua yeye kufua. Baluishi bende bavua bamuela nkonko ya buteyi bua kupeta pakumukuatshila ku mêyi. Misangu yonso uvua ubapuwisha ne mandamuna ende. Pashishe bakela Yezu lukonko elu: “Mmukenji kayi udi wa kumpala ku yonso?”​—Mvese 28.

Lukonko elu kaluvua lukonko lua bilele to. Bamue bena Yuda bavua bakokangana bua kumanye munkatshi mua mikenji mipite pa 600 idi yenza mikenji ya Mose nguepi uvua wa kumpala, anyi uvua mupite mikuabu. Bua bakuabu, bivua bimueneka ne: mikenji yonso ivua mushindu umue ne kabivua bimpe kuamba ne: mukenji kampanda uvua ne mushinga kupita mikuabu to. Mmunyi muvua Yezu muakuandamuna lukonko elu?

Bua kubandamuna, Yezu kakakula bua mukenji umue to, kadi wakakula bua ibidi. Tshia kumpala, wakamba ne: “Udi ne bua kunanga Yehowa Nzambi webe ne muoyo webe wonso ne anyima webe yonso ne lungenyi luebe luonso ne bukole buebe buonso.” (Mvese 30; Dutelonome 6:5) Miaku eyi “muoyo,” “lungenyi,” “anyima” ne “bukole” kayena ibengangana to. * Bibi biumvuija ne: padi muntu unanga Yehowa udi ne bua kudifila ne bumuntu buende buonso, bieledi biende bia meji ne bintu bionso bidiye nabi. Mumanyi kampanda wa malu a Bible udi wamba ne: “Bidi bikengela kunanga Nzambi ne muoyo mujima.” Wewe munange Nzambi, newenze muebe muonso bua kuenza malu dituku dionso mu mushindu udi umusankisha.​—1 Yone 5:3.

Tshibidi, Yezu wakamba ne: “Udi ne bua kunanga muntu nebe bu muudi mudinange.” (Mvese 31; Lewitiki 19:18) Kunanga Nzambi ne kunanga muntu nebe kudi bu mukaba ne tshilamba. Dinanga muntu nebe didi difumina ku dinanga Nzambi. (1 Yone 4:20, 21) Tuetu banange bantu netu bu mutudi badinange, netubenzele malu mu mushindu utudi basue ne: batuenzele. (Matayi 7:12) Tuetu benze nunku, netuleje ne: tudi banange Nzambi udi mutufuke tuetu ne bobu mu tshimfuanyi tshiende.​—Genese 1:26.

Mukenji wa kunanga Nzambi ne wa kunanga muntu netu idi ne mushinga kayi? Yezu wakamba ne: “Kakuena mukenji mukuabu udi munene kupita eyi.” (Mvese 31) Mu muyuki udi upetangana ne eu, Yezu wakamba ne: mikenji mikuabu yonso mmisuikakaja ku mikenji ibidi eyi.​—Matayi 22:40.

Kusankisha Nzambi ki nkukole to. Malu onso adi Yehowa ulomba batendeledi bende mmasuikakaja mu dîyi dimue edi: dinanga. Nzambi utshidi anu ulomba basadidi bende bua kumunangabu ne neatungunuke ne kubalomba. Dinanga edi ki ndia kumishiku to, ndia mu tshienzedi. (1 Yone 3:18) Bua tshinyi kuena mua kulonga mua kuikala ne dinanga ne kuleja muudi munange Yehowa, Nzambi “udi dinanga”?​—1 Yone 4:8.