Minganga idi yondopa masama a mitu idi utuambila ne: bua bantu kuikalabu ne disanka badi dijinga ne malu a Nzambi. Bidi nanku bualu bantu batu basue kukumbaja tshipatshila kampanda anyi kuenzela muntu udi mubapite mudimu. Bua kukumbaja dijinga edi, bamue bantu batu badifila bikole mu bufuki, mu dienza bintu kampanda, mu mizike anyi mu bintu bikuabu. Kadi bantu ba bungi batu bamona ne: bipeta bidibu bapeta mu malu aa kabiena binenga to.

Lungenyi lua ne: muntu udi uledibua ne dijinga dia malu a Nzambi ki mbualu buenyi kudi babadi ba Bible to. Nshapita ya kumpala ya mukanda wa Genese idi ileja ne: pavua Nzambi mufuke bena dibaka ba kumpala, uvua uyukila nabu misangu yonso, ubambuluisha bua kuikalabu nende mu malanda mimpe. (Genese 3:8-10) Nzambi kavua mufuke bantu bua bikale badienzela malu to, bavua dijinga ne kuyukila ne Mufuki wabu. Bible udi wakula bua dijinga edi misangu ya bungi.

Tshilejilu Yezu wakamba ne: “Badi bamanye ne: mbapele mu malu a mu nyuma mba diakalenga.” (Matayi 5:3) Ku diambuluisha dia mêyi aa tudi mua kuamba ne: bualu bunene budi mua kutupetesha disanka ne nsombelu muimpe ndijinga ditudi baledibue nadi dia malu a Nzambi. Mmunyi mutudi mua kuenza bualu ebu? Yezu wakafila diandamuna pakambaye ne: “Muntu kena ne bua kuikala ne muoyo anu bua diampa nkayadi, kadi mbua dîyi dionso didi dipatuka mukana mua Yehowa.” (Matayi 4:4) Mmunyi mudi mêyi ne mibelu bia Nzambi bidi mu Bible mua kutuambuluisha bua kuikala ne nsombelu muimpe ne disanka? Tuakulayi bua mishindu minene isatu.

Lelu eu kudi bamanyi bapiluke ba bungi badi bafila mibelu ya mu malu a mu nsombelu, ya mua kunangangana, mu dîku, ya mua kujikija bilumbu, ya mua kuikala ne disanka ne nsombelu muimpe. Kadi nnganyi mukuabu udi mua kufila bulombodi buimpe butambe bua nkatshinkatshi mu malu onso aa, pakumbusha Mufuki wa bantu Yehowa Nzambi?

 Bua kumvua bualu ebu bimpe, tuangate tshilejilu etshi: paudi usumba tshintu kampanda tshipiatshipia bu mudi: Kamera anyi Ordinatere, udi mumanye ne: nebakupeshe kamukanda kadi kaleja mushindu uudi mua kuenza mudimu bimpe ne biamu ebi. Bible udi anu bu kamukanda aka. Bible mmukanda udi Nzambi Mufuki wa bantu mutupeshe bua kukuata nawu mudimu bua kumona mua kuikala ne nsombelu muimpe. Mukanda eu udi uleja tshidibu bafukile muntu ne mudiye mua kuenza nawu mudimu bua kuikala ne nsombelu muimpe.

Anu bu mukanda wonso udi ufila mibelu ya mua kuenza mudimu ne tshintu kampanda, Bible udi udimuija bantu badi bamubala bua malu adi mua kunyanga nsombelu wabu. Mibelu anyi njila ya bikoso idibu mua kutuleja bidi mua kumueneka bu bidi bimpe, kadi ki mbimpe bua kulonda buludiki bua Mufuki wetu bua kupeta bipeta bimpe ne kuepuka bilumbu anyi?

Nansha mudi Yehowa Nzambi utupesha bulombodi ne mibelu, katu utuenzeja bua kubitaba to. Kadi bua mudiye mutunange ne musue kutuambuluisha, udi utudimuija ne muoyo mujima ne: ‘Meme ndi Yehowa Nzambi webe, udi ukuyisha bua wewe wikale ne diakalengele, udi ukulombola mu njila uudi ne bualu bua kuendelamu. Aka! Bu wewe mumvue mikenji yanyi, ditalala diebe diakadi kuikala bu musulu, ne buakane buebe buakadi kuikala bu mavuala a mâyi manene!’ (Yeshaya 48:17, 18) Mu tshikoso, tuetu balonde bulombodi bua Nzambi, netuikale ne nsombelu muimpe. Mu mêyi makuabu tudi mua kuamba ne: bua kuikala ne nsombelu muimpe ne disanka, tudi dijinga ne Nzambi.

Bamue badi bela meji ne: kabena dijinga ne Nzambi bualu badi batuilangana ne malu a bungi mu nsombelu adi aleja mudi Nzambi kayi ne dinanga. Tshilejilu, badi mua kudiebeja ne: ‘Bua tshinyi bantu bimpe badi bakenga?’ ‘Bua tshinyi bamue bana badi kabayi benze bualu badi baledibua ne bulema?’ ‘Bua tshinyi mu nsombelu mudi malu a kansungansunga?’ Eyi nkonko ya mushinga mukole, kupeta mandamuna mimpe kudi mua kushintulula nsombelu wetu. Kadi pamutu pa kuela Nzambi tshilumbu pambidi bua malu aa, tumonayi mudi Bible Dîyi dia Nzambi mua kututokeshela bualu ebu.

Mu nshapita muisatu wa mukanda wa Genese, tudi tupetamu muyuki wa Satana uvua mukuate mudimu ne nyoka bua kusaka bena dibaka ba kumpala bua kubenga kutumikila mukenji uvua Yehowa mubelele bua kabadi tshimuma tshia ku mutshi wa dimanya dia malu mimpe ne malu mabi. Satana uvua muambile Eva ne: ‘Kanuena nufua bulelela; bualu bua Nzambi udi mumanye ne: Panuadia mamuma au, mêsu enu neabuluke, nenuikale bu Nzambi, nenumanye malu mimpe ne malu mabi.’​—Genese 2:16, 17; 3:4, 5.

Mu mêyi aa, Satana kavua musue kuamba anu ne: Nzambi mmuena dishima patupu, kadi uvua kabidi musue kuleja ne: mushindu udi Nzambi ulombola ki mmuimpe to. Diabolo uvua usua kuamba ne: bantu bobu bamuteleje yeye, malu abu avua mua kuenda bimpe. Munyi muvua Nzambi mua kujikija tshilumbu etshi. Yehowa mmusungule bua kulekela tshikondo kampanda tshianji kupita bua kuambuluisha bantu bonso bua bamone bikala malu avua Satana mumubande nawu ni mmalelela ni nga dishima.  Nzambi uvua mupeshe Satana ne bantu bavua ku luseke luende mpunga bua kuleja bikala bantu badi mua kudilombola bimpe kakuyi ku diambuluisha dia Nzambi.

Diandamuna kayi diudi mua kufila bua tshilumbu tshidi Satana mujule etshi? Bantu badiku mua kuikala ne nsombelu muimpe ne kudilombola bimpe Nzambi kayi ubambuluisha anyi? Makenga, kansungansunga, masama, lufu, malu a tshikisu, dinyanguka dia malu, mvita, dishipa dia bantu ba tshisa tshimue ne malu makuabu mabi adi makuate bantu munkatshi mua bidimu bia bungi adi aleja ne: dijinga dia muntu dia kudilombola kabiyi ku diambuluisha dia Nzambi kadiena dipatula bipeta bimpe to. Bible kena wamba ne: Nzambi ke udi ukebesha ntatu idi nayi bantu to, kadi udi uleja bualu bunene budi bukebesha ntatu padiye wamba ne: ‘Muntu udi ukokesha mukuabu bua kumukengesha.’​—Muambi 8:9.

Bilondeshile mvese eu, kabienaku bimueneka ne: tudi dijinga ne Nzambi bua kupeta mandamuna a nkonko bua ntatu idi bantu batuilangana nayi ne mushindu wajikayi anyi? Ntshinyi tshienza Nzambi?

Kukadi bidimu bia bungi bidi bantu baluangane bua kujikija masama, bukulakaje ne lufu. Mbajimije mêba abu, makanda ne bintu biabu mu bualu ebu, kadi kabena ne tshia nsongo tshidibu bapete. Bamue bantu badi bela meji ne: dinua dia manga a mishindu mishilashilangane anyi dinua dia mâyi kampanda peshi kusomba muaba kampanda kudi mua kubashadisha bansonga. Malu onso aa mbilota patutu.

Nzambi mmusue bua bantu bikale ne nsombelu muimpe wa disanka. Ntshivuaye mulongolole katshia ku tshibangidilu tshia bufuki bua bantu, ne ki mmutshipue muoyo to. (Genese 1:27, 28; Yeshaya 45:18) Yehowa Nzambi udi utujadikila ne: bualu buonso budiye wamba neabukumbaje kakuyi mpata. (Yeshaya 55:10, 11) Bible udi utuambila bua mulayi wa Nzambi wa kupingaja nsombelu muimpe uvua mu Mparadizu uvua baledi betu ba kumpala bajimije. Mu mukanda wa ndekelu wa mu Bible tudi tusanganamu mêyi aa: “Yeye [Yehowa Nzambi] neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha miadi, nansha bisama kabiakuikalaku kabidi. Malu a kale ajiminyi.” (Buakabuluibua 21:4) Mmunyi muikala Nzambi mua kupingaja nsombelu wa mushindu eu? Mushindu kayi udi mulayi eu mua kutuambuluisha?

Yezu Kristo Muana wa Nzambi wakalongesha bayidi bende bua basambile bua disua dia Nzambi dienzeke. Bantu ba bungi mbamanye disambila edi anyi misangu ya bungi batu badiambulula, bamue batu badibikila ne: Disambila dia tatu wetu. Disambila edi didi mushindu eu: “Tatu wetu udi mu diulu, dîna diebe ditumbishibue. Bukalenge buebe bulue. Disua diebe dienzeke kabidi pa buloba muomumue ne mu diulu.” (Matayi 6:9, 10) Bushuwa, Yehowa Nzambi neakuate mudimu ne Bukalenge buende bua kumbusha malu mabi onso adi bukokeshi bua bana ba bantu bukebeshe ne kupingaja pa muaba wabu bulongolodi bupiabupia bua buakane budiye mulaye. *  (Danyele 2:44; 2 Petelo 3:13) Ntshinyi tshitudi mua kuenza bua mulayi wa Nzambi kutuambuluishawu?

Yezu Kristo wakaleja tshitudi ne bua kuenza mu mêyi aa: “Bualu ebu budi bumvuija muoyo wa tshiendelele: bafike ku dikumanya wewe, Nzambi umuepele mulelela, ne yeye uuvua mutume, Yezu Kristo.” (Yone 17:3) Bulelela, ku diambuluisha dia Nzambi, bantu nebapete muoyo wa tshiendelele udi Nzambi mulaye mu buloba bupiabupia. Mulayi eu udi ne bua kukutuisha bua umone mua kuandamuna bimpe lukonko lua ne: Tudiku dijinga ne Nzambi anyi?

Bidimu binunu bibidi bimane kupita, mu Atena ku Aleopago, mupostolo Paulo wakambila bena Atena mêyi aa: “Yeye muine ke udi upesha bantu bonso muoyo, ne mueyelu ne bintu bionso. Bualu tudi ne muoyo, tudi tuenda, ne tudiku bua bualu buende, anu muvua bafundi bakuabu ba tusala ba munkatshi muenu bambe ne: ‘Bualu tudi kabidi bana bende.’”​—Bienzedi 17:25, 28.

Mêyi avua Paulo muambile bena Atena atshidi ne mushinga too ne lelu. Mufuki wetu udi utupesha mueyelu utudi tueyela nawu, biakudia bitudi tudia ne mâyi atudi tunua. Katuvua mua kuikala ne muoyo bu Yehowa kayi mutupeshe bintu bimpe bitudi nabi ebi. Kadi bua tshinyi Nzambi udi utungunuka ne kupesha bantu bonso bintu ebi too ne aba badi kayi bela meji bua bualu buende? Paulo wakamba ne: “bua bobu bakebe Nzambi bikalabu mua kumukeba benda babubuta ne bikalabu mua kumupeta bulelela, nansha mudiye kayi kule ne yonso wa kutudi.”​—Bienzedi 17:27.

Udiku musue kumanya Nzambi bimpe, mbuena kuamba ne: kulonga malu a bungi bua disua diende ne bua mibelu yende idi yambuluisha muntu bua kuikala ne nsombelu muimpe mpindieu ne kashidi anyi? Biobi nanku, tudi tukulomba bua uyukile ne muntu uvua mukupeshe tshibejibeji etshi anyi ufundile bapatudi batshi. Nebakuambuluishe ne disanka.