Tshidimu tshionso, tutu tupatula ne tuabanya miliyo ne miliyo ya Bible ne mikanda idi imumvuija. Tudi tuibaka ne tulongolola biro bietu bidi bilombola matunga ne miaba ya kupatuila mikanda pa buloba bujima. Bisumbu bia Bantemu bipite pa binunu lukama bidi bidisangisha bua kutendelela mu nzubu miasa bimpe ku mushinga mukumbanyine idibu babikila ne: Nzubu ya Bukalenge. Nnganyi utu ufila makuta bua kuenza bionso ebi?

Mudimu wetu udi wenda ku diambuluisha dia mapa adi bantu bafila ku budisuile. (2 Kolinto 9:7) Mu 1879, bakamba mu nimero muibidi wa tshibejibeji etshi ne: “Tudi batuishibue ne: YEHOWA ke udi ukuatshisha dipatuka dia ‘Tshibumba tshia Nsentedi tshia Siona,’ [muvuabu batshibikila kale] ne bu mudibi nanku, katuena mua kulomba dikuatshisha dia kudi bantu bu dibanza tunana to.” Katuena bashintuluke mu bualu ebu to.

Batu batuma mapa buludiludi ku biro bietu bidi bilombola midimu mu ditunga anyi baela mu kasheta ka mapa kadi mu Nzubu wa Bukalenge yonso. Kadi katutu tulomba tshia dikumi, tusangisha makuta anyi tufutshisha bantu makuta bua kubapesha mikanda yetu to. Patutu tuyisha anyi tulongesha mu tshisumbu peshi tuambuluisha mu dibaka dia miaba ya kutendelela kabatu batufuta to, bualu Yezu uvua muambe ne: “Nuvua bapete tshianana, nufile tshianana.” (Matayi 10:8) Bantemu bonso badi benza mudimu mu biro bietu bidi bilombola mudimu pa buloba bujima anyi bidi biulombola mu matunga, pamue ne bena mu kasumbu kaludiki ka Bantemu ba Yehowa, kabatu babafuta bua mudimu udibu benzela Nzambi to.

Batu bangata kabidi mapa aa bua kuambuluisha nawu bantu badi bikumina bikuate. Bena Kristo ba kumpala bavua basanka bua kuambuluisha bantu bavua mu lutatu. (Lomo 15:26) Tutu petu tuambuluisha bantu badi mu ntatu pa kubibakila nzubu yabu idi miupuke ne miaba ya kutendelela, tutu tubapesha kabidi biakudia, bilamba ne manga a luondapu.