Tshia kumpala, bualu bulelela ebu budi mua kukukolesha ku muoyo: Nzambi udi umona ntatu idi pa buloba lelu ne mmusue kuenza bualu kampanda bua kuyijikija. (Musambu 72:13, 14) Nzambi mmulaye mu Bible Dîyi diende ne: ‘badi bakengeshibua, Nzambi neabapeshe disulakana.’ Dîba kayi? “Ku dibuluibua dia Mukalenge Yezu pafumaye mu diulu ne banjelu bende ba bukole, padiye usombuela bantu badi kabayi bamanye Nzambi ne badi kabayi batumikila lumu luimpe lua bualu bua Mukalenge wetu Yezu.” (2 Tesalonike 1:7, 8) Dibuluibua dia Yezu edi nedienzeke mu matuku atshidi alua kumpala eku; tshikondo tshidi Bible ubikila ne: “mvita ya dituku dinene dia Nzambi Wa Bukole Buonso,” anyi Armagedone.​—Buakabuluibua 16:14, 16.

Nzambi kakutuma bantu mu mvita itshidi ilua ayi to, kadi neatume Muanende Yezu Kristo ne banjelu bende ba bukole bua kuluisha bantu babi. Tshiluilu tshia mu diulu etshi netshijikije makenga onso aa.​—Yeshaya 11:4; Buakabuluibua 19:11-16.

Too ne lelu, Nzambi ki mmushintulule mushindu udiye umona mvita to. Utshidi anu uyimona bu mushindu mujalame wa kujikija makenga ne malu mabi. Kadi, anu muvuabi katshia ku kale, Nzambi nkayende ke udi wamba dîba didi mvita ya nunku ne bua kuenzeka ne bantu badi ne bua kuluangana. Anu mutukadi bamone, Nzambi ukadi muambe ne: mvita yajikija malu mabi ne yasungila bantu badibu bakengesha eyi neyenzeke mu  matuku atshilualua ne nebayiluangane kudi Muanende Yezu Kristo. Bidi bileja ne: Nzambi kena wanyisha mvita idi bantu baluangana lelu eu, nansha bobu bikale ne bualu kayi budi bubasaka bua kuluangana.

Tshilejilu: Elabi meji ne: bana ba muntu babidi badi batuadija kuluangana tatuabu kayi kumbelu. Badi banji kulekela mvita, babikila tatuabu ku telefone. Umue wabu udi wamba ne: mukuabu ke uvua muyituadije, mukuabu pende ne: uvua munkebe bilumbu. Yonso wa kudibu udi ukeba bua tatuabu atue ku tshiende mu tshilumbu etshi. Kadi, padi tatu ubateleja bonso babidi, udi ubambila bua kulekela mvita ne kuindila too ne papinganaye kumbelu bua kukosa tshilumbu atshi. Bana bonso babidi badi banji kuindila katantshi. Kadi, minite mikese pashishe badi batuadija kabidi kuluangana. Padi tatu ufika kumbelu, kena usanka to, udi ubanyoka bonso bua mudibu kabayi bamutumikile.

Lelu eu, bisamba bia bungi bidi biluangana bitu misangu ya bungi bilomba Nzambi diambuluisha. Nzambi kena wela dîyi mu mvita ya lelu to. Kadi, udi wamba patoke mu Bible Dîyi diende ne: “Kanupingajidi muntu bubi ku bubi” ne “kanudisombuedi.” (Lomo 12:17, 19) Kabidi, mmumanyishe ne: bukua bantu budi ne bua ‘kumuindila ne lutulu’ bua adiangatshile malu mu bianza, ke tshienzaye ku Armagedone. (Musambu 37:7) Padi bisamba biditua mu mvita kabiyi bindila Nzambi, udi umona mvita ya mushindu eu bu didienzela dia malu dibi ne kabiena bimusankisha to. Nunku, Nzambi nealeje tshiji tshiende ne neakose bilumbu bia bisamba bidi biluangana, ku mvita ya Armagedone, musangu umue bua kashidi pikalaye mua ‘kulekesha mvita too ne ku mfudilu kua buloba.’ (Musambu 46:9; Yeshaya 34:2) Nunku, Armagedone neikale mvita yajikija mvita yonso.

Dijika dia mvita ndimue dia ku mabenesha adi afumina ku Bukalenge bua Nzambi. Yezu wakakula bua Bukalenge ebu mu disambila didi bantu ba bungi bamanye edi: “Bukalenge buebe bulue. Disua diebe dienzeke kabidi pa buloba muomumue ne mu diulu.” (Matayi 6:10) Bukalenge bua Nzambi kabuakujikija anu mvita nkayayi to, nebujikije kabidi malu mabi adi ayikebesha. * (Musambu 37:9, 10, 14, 15) Kabiena bikemesha bua mudi bayidi ba Yezu bindile ne muoyo kuulu kuulu mabenesha a Bukalenge bua Nzambi atshilualua.​—2 Petelo 3:13.

Kadi netuindile too ne dîba kayi bua Bukalenge bua Nzambi kujikijabu ntatu, makenga ne malu mabi? Dikumbana dia mêyi a buprofete a mu Bible didi dileja ne: tudi mu “matuku a ku nshikidilu” wa ndongoluelu wa malu eu. (2 Timote 3:1-5) * Mu katupa kiipi emu, Bukalenge bua Nzambi nebushikije matuku a ku nshikidilu aa ne mvita ya Armagedone.

Anu mutukavua bamone ku ntuadijilu, bantu “badi kabayi batumikila lumu luimpe lua bualu bua Mukalenge wetu Yezu” ke babutulabu mu mvita ya ndekelu eyi. (2 Tesalonike 1:8) Kadi vuluka ne: Nzambi kena usanka bua lufu lua muntu to, nansha lua muntu mubi. (Yehezekele 33:11) Bu mudiye ‘kayi musue bua muntu nansha umue abutudibue’ mu mvita ya ndekelu eyi, udi utabalela lelu eu bua lumu luimpe lua bualu bua Mukalenge wetu Yezu ‘luyishibue pa buloba bujima budi bantu basombe bua luikale bujadiki kudi bisamba bionso’ kumpala kua nshikidilu kuluaye. (2 Petelo 3:8, 9; Matayi 24:14; 1 Timote 2:3, 4) Bushuwa, mudimu wa kuyisha pa buloba bujima wa Bantemu ba Yehowa udi wambuluisha bantu lelu bua kufika ku dimanya Nzambi, kutumikila lumu luimpe lua bualu bua Yezu ne kushala ne muoyo bua kumona dituku dikala mvita kayitshiyiku kabidi.