Mukanda wa Kumpala wa Kulondolola 22:1-19
22 Ke Davidi kuamba ne: “Eu nnzubu wa Yehowa Nzambi mulelela, ne etshi ntshioshelu bua mulambu wa kuosha bua Isalele.”+
2 Pashishe Davidi wakatuma dîyi bua basangishe bantu bavua basombe buenyi+ mu buloba bua Isalele, ne wakabateka bua bikale bapandi ba mabue bua kupanda mabue ne kuasonga bua dibaka dia nzubu wa Nzambi mulelela.+
3 Davidi wakalongolola kabidi biamu bifiike bia bungi menemene bua kuenza nabi misonso ya biibi bia ku biibi binene ne bua kuenza nabi kabidi biamu bia kukuata nabi bintu, ne biamu bia mitaku bia bungi menemene, kakuyi mushindu wa kupima bujitu buabi,+
4 kabidi ne mitshi ya sedre+ bungi kabuyi kubala, bualu bena Sidona+ ne bena Tulo+ bavua batuadile Davidi mitshi ya sedre ya bungi menemene.
5 Davidi wakamba ne: “Muananyi Solomo utshidi muana ne kena ne dimanya dia bungi to,*+ ne nzubu wibakilabu Yehowa neikale muimpe mutambe,+ bienza bua ne: lumu luende ne bulengele buende+ bimanyike mu maloba onso.+ Ke bualu kayi nemmulongoluele bintu.” Ke Davidi kulongolola bintu bia kuibaka nabi nzubu bia bungi menemene kumpala kua kufuaye.
6 Pashishe wakabikidisha muanende Solomo, kumuambilaye bua kuibakila Yehowa Nzambi wa Isalele nzubu.
7 Davidi wakambila muanende Solomo ne: “Meme mvua ne dijinga mu muoyo wanyi dia kuibaka nzubu bua dîna dia Yehowa Nzambi wanyi.+
8 Kadi dîyi dia Yehowa diakalua kundi diamba ne: ‘Wewe udi muele mashi a bungi panshi, ne udi muluangane mvita minene. Kuakuibaka nzubu bua dîna dianyi to,+ bualu udi muele mashi a bungi panshi kumpala kuanyi.
9 Tangila! Neupete muana+ wikala muntu wa ditalala,* ne nemmupeshe dikisha kudi bena lukuna bende bonso badi bamunyunguluke,+ bualu dîna diende nedikale Solomo*+ ne nempeshe Isalele ditalala ne dikisha mu matuku ende.+
10 Yeye ke muntu wibaka nzubu bua dîna dianyi.+ Nealue muananyi ne meme nengikale tatuende.+ Nenjadike nkuasa wa bukalenge buende ku mutu kua Isalele bikole, bua kashidi.’+
11 “Mpindieu muananyi, Yehowa ikale nebe, ne malu ebe ende bimpe ne wibake nzubu wa Yehowa Nzambi webe anu bu muvuaye muambe bua bualu buebe.+
12 Yehowa akupeshaku anu budimu ne lungenyi+ padiye ukupesha bukokeshi ku mutu kua Isalele bua ulame mukenji wa Yehowa Nzambi webe.+
13 Dîba adi malu ebe neende bimpe wewe mutumikile bimpe mêyi ne mikandu+ ne mêyi a dilumbuluisha bivua Yehowa mutumine Mose dîyi bua kupesha Isalele.+ Ikala ne dikima ne bukole. Kutshinyi anyi kuikadi ne buôwa to.+
14 Mona, ndi muditatshishe bikole bua kulongoluela nzubu wa Yehowa ntalanta* binunu 100 ya or ne ntalanta muliyo umue ya arjan ne biamu bia mitaku ne biamu bifiike bia bungi menemene+ bidibu kabayi mua kupima, ne ndi mulongolole mitshi ne mabue,+ kadi wewe neukumbajaku bikuabu.
15 Udi ne bena mudimu ba bungi menemene: bapandi ba mabue, bantu badi bibaka ne mabue,+ bena mabaya, ne bena mudimu bapiluke ba mishindu yonso.+
16 Or, arjan, biamu bia mitaku, ne biamu bifiike bidi bungi kabuyi kupima.+ Juka, utuadije mudimu, ne Yehowa ikale nebe.”+
17 Pashishe Davidi wakatumina bakokeshi bonso ba mu Isalele dîyi bua bambuluishe muanende Solomo wamba ne:
18 “Yehowa Nzambi wenu kena nenu anyi? Ki mmunupeshe dikisha ku nseke yonso anyi? Bualu yeye uvua mufile bantu ba mu buloba mu bianza bianyi, ne buloba mbukokeshibue kumpala kua Yehowa ne kumpala kua tshisamba tshiende.
19 Nunku disuikayi ne muoyo wenu wonso ne anyima* wenu yonso bua kukeba Yehowa Nzambi wenu,+ ne tuadijayi kuibaka muaba munsantu wa Yehowa Nzambi mulelela,+ bua kulua ne mushete wa tshipungidi tshia Yehowa ne bintu bia tshijila bia Nzambi mulelela+ ku nzubu muibaka bua dîna dia Yehowa.”+
Note
^ Anyi “ki muanji kukumbana to.”
^ Ku mua.: “wa dikisha.”
^ Dîna didi diumbukila ku muaku wa tshiena Ebelu udi umvuija “Ditalala.”
^ Ntalanta uvua ne kilo 34,2. Tang. Tshis. B14.
