Yelemiya 7:1-34
7 Edi ndîyi diakalua kudi Yelemiya difuma kudi Yehowa, diamba ne:
2 “Imana mu tshiibi tshia nzubu wa Yehowa ne manyisha mukenji eu: ‘Umvuayi dîyi dia Yehowa, nuenu bantu ba mu Yuda bonso badi babuela mu biibi ebi bua kuinamina Yehowa.
3 Mona tshidi Yehowa wa biluilu, Nzambi wa Isalele, wamba: “Longololayi njila yenu ne bienzedi bienu, ne nennuanyishile bua kutungunuka ne kusombela muaba eu.+
4 Kanueyemenyi mêyi a dishima, nuamba ne: ‘Eu ke* ntempelo wa Yehowa, ntempelo wa Yehowa, ntempelo wa Yehowa!’+
5 Bualu binuikala bushuwa balongolole njila yenu ne bienzedi bienu; binuikala bushuwa bimanyine kulumbuluisha kuakane pankatshi pa muntu ne muinende;+
6 binuikala kanuyi nukengesha bantu badi basombe buenyi, bana ba nshiya,* ne bakaji bakamba;+ binuikala kanuyi nuela mashi a bantu badi kabayi ne bualu panshi muaba eu; ne binuikala kanuyi nulonda nzambi mikuabu bua kudikebela dikenga;+
7 nunku nennuanyishile bua nutungunuke ne kusombela muaba eu, mu buloba bumvua mupeshe bankambua benu bua kashidi.”’”*
8 “Kadi nudi nueyemena mêyi a dishima,+ kaakunupetesha dikuatshisha nansha dimue.
9 Nudi mua kuiba,+ kushipa, kuenda masandi, kuditshipa ne malu a dishima,+ kulambula Bâla milambu,*+ ne kulonda nzambi inuvua kanuyi bamanye,
10 ne pashishe kulua, kuimana kumpala kuanyi mu nzubu eu udi ne dîna dianyi, nuamba ne: ‘Netupandishibue,’ nansha munudi nuenza malu onso mabi aa anyi?
11 Nzubu udi ne dîna dianyi eu mmulue tshisokomenu tshia banyengianganyi ba bintu ku mêsu kuenu anyi?+ Mmeme eu mudimuene bualu ebu nkayanyi,” ke mudi Yehowa wamba.
12 “‘Kadi, mpindieu ndayi muaba wanyi ku Shilo,+ muaba umvua muanji kuenza bua dîna dianyi disombele,+ ne numone tshimvua muwenzele bua bubi bua bantu banyi bena Isalele.+
13 Kadi nuakatungunuka ne kuenza malu onso aa,’ ke mudi Yehowa wamba, ‘nansha mumvua munuambile njila ne njila,* kanuvua bateleje to.+ Ngakatungunuka ne kunubikila, kadi kanuvua nuitaba to.+
14 Ke mungenzela nzubu udi ne dîna dianyi,+ unudi nueyemena,+ ne muaba eu umvua munupeshe nuenu ne bankambua benu, anu bu mumvua muenzele Shilo.+
15 Nennuipate ku mêsu kuanyi, anu bu mumvua muipate bana benu bonso, ndelanganyi yonso ya Efelayima.’+
16 “Kadi wewe, kusambidi bua bantu aba. Kuedi dîyi anyi kuenji disambila peshi kunsengeledi bua bualu buabu,+ bualu tshiakukuteleja to.+
17 Kuenaku mumone malu adibu benza mu bimenga bia Yuda ne mu misesu ya Yelushalema anyi?
18 Bana badi bangula nkunyi, batatu badi batemesha kapia, ne bamamu badi basopa bukula bua kuenzela Mukalenge Mukaji wa Diulu*+ mikata ya mulambu, ne badi bapongoluela nzambi mikuabu milambu ya bia kunua bua kumfiikisha munda.+
19 ‘Kadi meme ke udibu benzela bibi* anyi?’ ke mudi Yehowa ukonka. ‘Kabena badienzela nkayabu bibi bua bundu buabu bobu bine anyi?’+
20 Nunku mona tshidi Mukalenge Mutambe Bunene Yehowa wamba: ‘Tangilayi! Nempongolole tshiji tshianyi ne tshiji tshianyi tshikole muaba eu,+ pa bantu ne nyama, pa mitshi ya mu mpata ne pa mamuma a buloba; netshiteme kadi katshiakujima to.’+
21 “Mona tshidi Yehowa wa biluilu, Nzambi wa Isalele, wamba: ‘Tuyayi! Sakidilayi milambu yenu ya kuosha mijima ku milambu yenu mikuabu, ne diayi munyinyi.+
22 Bualu dituku dimvua mupatule bankambua benu mu buloba bua Ejipitu, tshivua muakule nabu anyi mubatumine dîyi bua bualu bua milambu ya kuosha mijima ne bua milambu mikuabu+ to.
23 Kadi mvua mubatumine dîyi edi ne: “Tumikilayi dîyi dianyi ne meme nendue Nzambi wenu, ne nuenu nenulue bantu banyi.+ Nudi ne bua kuendela mu njila yonso undi nnuambila bua kuendela, bua malu ende bimpe buenu nuenu.”’+
24 Kadi kabakateleja anyi kuinyika ditshi diabu;+ kadi bakendela mu meji abu avuabu baluke,* balonda ne mutu mukole muoyo wabu mubi,+ ne bakapingana tshianyima, kabakaya kumpala to,
25 kumbukila ku dituku divua bankambua benu bapatuke mu buloba bua Ejipitu too ne lelu eu.+ Nunku mvua mutungunuke ne kunutumina bena mudimu banyi bonso baprofete, mbatuma dituku dionso, njila ne njila.*+
26 Kadi bakabenga kunteleja, ne bakabenga kuinyika ditshi diabu.+ Kadi bavua ne mutu mukole,* ne bakenza malu mabi matambe kupita bankambua babu!
27 “Neubambile mêyi onso aa,+ kadi kabakukuteleja to; neubabikile, kadi kabakukuitaba to.
28 Neubambile ne: ‘Etshi ke tshisamba tshivua katshiyi tshitumikile dîyi dia Yehowa Nzambi wabu ne tshivua tshibenge bua kuitaba dinyoka. Lulamatu ndujimine, kalutshiena nansha lutedibua munkatshi muabu.’*+
29 “Kosa nsuki yebe idi kayiyi mikosa,* uyimanshe, ne wela kasala ka muadi* pa mikuna idi kayiyi ne tshintu, bualu Yehowa mmulekele ne neabenge tshipungu tshia bantu etshi tshidi tshimufiikishe munda.
30 ‘Bualu bantu ba Yuda mbenze malu adi mabi ku mêsu kuanyi,’ ke mudi Yehowa wamba. ‘Mbajadike mpingu yabu ya muendi mu nzubu udi ne dîna dianyi, bua kumunyanga.+
31 Mbibake miaba mitumbuke ya Tofete, udi mu Tshibandabanda tshia Muana wa Hinoma,*+ bua kuoshabu bana babu ba balume ne bana babu ba bakaji mu kapia,+ bualu bumvua tshiyi mubatumine dîyi bua kuenza ne butu mene kabuyi nansha buanji kunduila ku muoyo.’*+
32 “‘Nunku monayi! matuku adi alua,’ ke mudi Yehowa wamba, ‘ikalabu kabayi mua kumubikila kabidi ne: Tofete anyi ne: Tshibandabanda tshia Muana wa Hinoma,* kadi ne: Tshibandabanda tshia Dishipangana. Nebajiike bantu mu Tofete too ne pikalaku kakuyi muaba mushale.+
33 Bitalu bia bantu aba nebilue biakudia bia nyunyi ya muulu ne bia nyama ya pa buloba, kakuyi muntu wa kuyitshinyisha bua inyeme.+
34 Nengimanyike tshiona tshia disanka dikole ne tshiona tshia masanka, dîyi dia musedianganyi ne dîyi dia mukaji udibu basela+ mu bimenga bia Yuda ne mu misesu ya Yelushalema, bualu buloba nebubutudibue.’”+
Note
^ Ku mua.: “Eyi ke,” bakula bua ntempelo ne nzubu yende yonso.
^ Anyi “bana badi bafuishe batatuabu.”
^ Anyi “katshia ku bikondo bia tshiendelele too ne ku bikondo bia tshiendelele.”
^ Anyi “kufuimishila Bâla muishi wa mulambu.”
^ Ku mua.: “njuka patshiatshia, ngakula.”
^ Muanzu wa nzambi mukaji uvuabu batendelela kudi bena Isalele batontolodi; pamuapa nzambi mukaji wa bufuke.
^ Anyi “bafiikisha munda; bayobola.”
^ Anyi “ngenyi yabu.”
^ Ku mua.: “dituku dionso njuka patshiatshia, mbatuma.”
^ Ku mua.: “bavua bakoleshe nshingu.”
^ Ku mua.: “ndumbushibue mukana muabu.”
^ Anyi “milambula.”
^ Anyi “musambu wa madilu.”
^ Anyi “butu kabuyi nansha buanji kunduila mu lungenyi.”
