Yobo 15:1-35
15 Elifaza+ muena Temana wakandamuna ne:
2 “Muena meji neandamune ne ngenyi ya patupu* anyi?Peshi neuwuje difu diende ne lupepele lua ku est anyi?
3 Kubela anu ne mêyi tshianana kakuena ne diambuluisha to,Ne kuakula nkayaku kakuena ne dikuatshisha to.
4 Bualu wewe udi utekesha ditshina dia Nzambi,Ne udi ukepesha diditatshisha dionso bua Nzambi.
5 Bualu tshilema tshiebe tshidi tshikuambila biudi wamba,*Ne udi usungula ngakuilu wa budimu.
6 Mukana muebe muine mudi mukupisha, ki mmeme to;Mishiku yebe mine idi ikutuisha.+
7 Wewe ke muntu wa kumpala wakaledibua anyi?Peshi diledibua diebe diakadianjidila dia mikuna anyi?
8 Utu uteleja muyuki wa mu musokoko wa Nzambi anyi?Peshi anu wewe nkayebe ke udi ne meji anyi?
9 Ntshinyi tshiudi mumanye tshitudi tuetu katuyi bamanye?+
Ntshinyi tshiudi mujingulule tshitudi tuetu katuyi bajingulule?
10 Bena nsuki mitoke ne banunu badi bonso munkatshi muetu,+Bantu bakulumpe bikole kupita ne tatuebe.
11 Busambi bua kudi Nzambi ki mbukukumbane anyi?Peshi mêyi adibu bakuambile ne bulenga ki mmakukumbane anyi?
12 Bua tshinyi muoyo webe udi uya nebe kule?Bua tshinyi mêsu ebe adi atema ne tshiji?
13 Bualu udi ufiikila Nzambi munda,*Ulekela mêyi a mushindu au apatuka mukana muebe.
14 Muntu ufuafua eu nnganyi bua yeye kuikala mukezuke,Peshi yonso udibu balele kudi mukaji bua kuikalaye muakane?+
15 Tangila! Yeye kena weyemena bansantu bende,Nansha diulu dine kadiena dikezuke ku mêsu kuende to.+
16 Nebikale mushindu kayi padi muntu muikale mubipe ne munyanguke,+Muntu udi unua malu mabi anu bu mâyi!
17 Nenkumanyishe; nteleja!
Nenkulondele tshindi mumone,
18 Tshidi bena meji balonde tshia kudi batatuabu,+Malu adibu kabayi basokoke.
19 Bobu nkayabu mbavuabu bapeshe buloba,Ne muenyi kakapita munkatshi muabu.
20 Muntu mubi udi utata ne dikenga matuku ende onso,Mu bidimu bionso bidibu bakosele mfumu wa tshikisu.
21 Mêyi adi enza buôwa bukole adi umvuika mu matshi ende;+Mu tshikondo tshia ditalala, benzavi badi bamubunda.
22 Kena witaba ne: neapanduke ku mîdima to;+Yeye mmulama bua muele wa mvita.
23 Yeye udi utambakana eku ne eku ukeba tshiakudia,* tshidi penyi?
Mmumanye bimpe ne: dituku dia mîdima dikadi pabuipi.
24 Dikenga ne kanyinganyinga bidi bitungunuka ne kumukuatshisha buôwa bukole;Bidi bimupita bukole bu mukalenge mudilongolole bua kuelangana mvita.
25 Bualu yeye udi ujudila Nzambi tshianza tshiendeNe ukeba bua kueleshangana mpata ne* Wa Bukole Buonso;
26 Udi uya lubilu kudiye ne mutu mukole bua kumuluisha,Muikale ne ngabu wende mukole wa mupimbu;*
27 Mpala wende mmubuikila kudi mafuta,Ne tshifuka tshiende tshidi tshinyenya mafuta;
28 Mmusombele mu bimenga bialuabu kubutula,Mu nzubu yikala muntu kayi mua kusombela,Yikala mua kulua mishiki ya mabue.
29 Kakulua mubanji to, ne biuma biende kabiakuvulangana to,Nansha bintu biende kabiakutangalaka mu buloba.
30 Kakupanduka ku mîdima to;Ludimi lua kapia nelumishe lutonga* luende,Ne yeye neafue ku mupuya wa mukana mua Nzambi.*+
31 Kapambuki bua kueyemena tshintu tshidi katshiyi ne mushinga to,Bualu tshidiye upetaku katshiakuikala ne mushinga;
32 Nebienzeke kumpala kua dituku diende,Ne matamba ende kaakutumpuka nansha.+
33 Neikale bu muonji wa tumuma tua mvinyo udi umatshisha tumuma tuawu tutshidi tubishi,Ne bu mutshi wa olive udi ukulula bilongo biawu.
34 Bualu tshisumbu tshia badi babenga Nzambi* ntshiatuke+Ne kapia nekoshe ntenta ya mbuejilu.
35 Badi bimita tshimvundu, balela malu adi mabi,Ne mafu abu adi alela dishima.”
Note
^ Anyi “ne dimanya dia mutoyi.”
^ Anyi “tshilema tshiebe tshidi tshilongesha mukana muebe.”
^ Ku mua.: “udi ukudimuina Nzambi nyuma webe bua kumuluisha.”
^ Ku mua.: “diampa.”
^ Anyi “uteta bua kutshimuna.”
^ Ku mua.: “mapondo ende a mupimbu a ku ngabu.”
^ Mmumue ne: ditekemena dionso dia kujukuluka.
^ Ku mua.: “muende.”
^ Anyi “dia batontolodi.”
