1, 2. Tudi mua kupeta muaba wa kusokomena penyi lelu?

ELA meji ne: udi wenda mu njila dituku dia tshipepele tshikole. Diulu didi dienda difikuluka. Mipenya idi ituadija kuela, makubakuba atuta ne pashishe mvula mukole udi ubangisha. Udi utuadija kunyema, kuyi umona kua kubuela to. Pashishe, udi umona muaba muimpe kumpenga kua njila ne udi ubuelamu. Newanyishe muaba eu bikole, ki mmuomu anyi?

² Tudi mu tshikondo tshibi lelu’eu. Nsombelu wa pa buloba udi wenda anu unyanguka. Kadi kudi muaba muimpe utudi mua kusokomena, muaba udi tshintu katshiyi mua kutuenzela bibi to. Mmuaba kayi au? Tangila tshidi Bible ulongesha: ‘Nengambe bua Yehowa ne: Yeye udi tshinyemenu [anyi tshisokomenu] tshianyi ne musoko wanyi munyunguluke ne Nzambi wanyi undi ngeyemena.’​—Musambu 91:2.

3. Mmunyi mudi Yehowa mua kulua tshisokomenu tshietu?

³ Anji elabi meji! Yehowa, Mufuki ne Mukalenge  Mutambe Bunene wa diulu ne buloba, udi mua kuikala tshisokomenu tshietu! Udi mua kutukuba bualu udi ne bukole bupite bua muntu anyi tshintu tshionso tshidi mua kutuenzela bibi. Nansha bobu batuenzele bibi, Yehowa udi mua kulongolola malu mabi onso au. Mmunyi mudi Yehowa mua kulua tshisokomenu tshietu? Mpatudi tumueyemena. Bible udi utuambila kabidi ne: ‘Nudilame mu dinanga dia Nzambi.’ (Yuda 21) Eyowa, tudi ne bua kushala mu dinanga dia Nzambi, tushala basuikakane nende. Apu, tudi mua kuikala bashindike ne: udi tshisokomenu tshietu. Kadi mmunyi mutudi mua kusuikakana nende?

4, 5. Ng’imue mishindu kayi idi Yehowa mutuleje dinanga?

⁴ Bua tuetu kushala mu dinanga dia Nzambi, tudi ne bua kumanya mushindu udi Yehowa mutuleje dinanga. Ela meji ku amue malu a mu Bible audi mulonge mu mukanda eu. Mufuki wetu Yehowa mmutupeshe buloba ebu bulenga bua tuetu kusombelapu. Mmuuje buloba tente ne biakudia, mâyi, bubanji, nyama mimpe ne miaba milenga ya kumona. Nzambi mmufundishe Bible ne mmutulejamu dîna diende ne ngikadilu yende. Bible udi uleja kabidi ne: wakatuma Muanende munanga Yezu pa buloba bua kukenga ne kutufuila. (Yone 3:16) Dituma dia Muanende edi didi ne mushinga kayi kutudi? Didi ditupesha ditekemena dilenga menemene bua matuku atshilualua.

⁵ Ditekemena dietu edi didi kabidi difumina ku tshintu tshikuabu tshidi Nzambi muenze. Yehowa mmujadike mbulamatadi wa mu diulu anyi Bukalenge bulombola kudi Masiya. Bukalenge ebu nebujikije makenga onso mu katupa kîpi emu ne nebuvuije buloba mparadizu. Anji ela meji tung! Netusombe mu ditalala ne disanka bua kashidi. (Musambu 37:29) Kadi bua mpindieu, Nzambi mmutuleje mushindu wa kuikala ne nsombelu mulenga. Mmutupeshe kabidi diakalenga dia kuyukila nende mu disambila dîba dionso ne muaba wonso. Eyi idi anu mishindu mikese tshianana idi Yehowa muleje  dinanga diende kudi bantu bonso, ne kuudi wewe muine.

6. Ntshinyi tshiudi mua kuenza bua dinanga didi Yehowa mukuleje?

⁶ Udi ne bua kudiela lukonko lua mushinga elu: Ndi ne bua kuenza tshinyi bua mushindu udi Yehowa munnange? Ba bungi nebandamune ne: “Ndi ne bua kumunanga panyi.” Ke muutu pebe wela meji anyi? Yezu wakamba ne: mukenji udi ulonda eu ke mukenji mutambe mikuabu yonso: ‘Nanga Yehowa Nzambi webe ne mutshima webe wonso ne muoyo webe wonso ne lungenyi luebe luonso.’ (Matayo 22:37) Bushuwa, udi ne malu a bungi audi ne bua kunangila Yehowa Nzambi. Kadi kumvua patupu ne: udi munange Yehowa nkukumbane bua kuleja muudi mumunange ne mutshima ne muoyo ne lungenyi luebe luonso anyi?

7. Kumvua patupu ne: udi munange Nzambi ke kudi kuleja muudi mumunange anyi? Umvuija.

⁷ Anu mudi Bible wamba, kumvua patupu ne: udi munange Nzambi kakuena kuleja muudi mumunange to. Kadi nansha mudiku ne mushinga, kudi anu ntuadijilu wa dinanga dilelela. Tshilejilu, lutete lua tshimuma ludi ne mushinga bua kupeta mutshi wa bimuma abi. Mpindieu, wewe ujinga kudia tshimuma, kadi muntu ukupesha lutete lua tshimuma, neumvue bimpe anyi? Nansha kakese! Bia muomumue, kumvua ne: tudi banange Yehowa nntuadijilu wa dinanga patupu. Bible utu ulongesha ne: ‘Bua edi ndinanga dia Nzambi, bua tuetu tutumikile mikenji yende; ne mikenji yende kayena itunemena bujitu.’ (1 Yone 5:3) Bua dinanga ditudi banange Nzambi kuikaladi dilelela, didi ne bua kupatula bimuma bimpe anyi kumuenekela mu bienzedi.​—Matayo 7:16-20.

8, 9. Mmunyi mutudi mua kuleja Yehowa dinanga ne dianyisha dietu?

⁸ Tudi tuleja ne: tudi banange Nzambi patudi tutumikila mikenji yende. Ki mbikole menemene bua kuyitumikila to. Mikenji ya Yehowa kayena itunemena bujitu to, kadi idi ituambuluisha bua kuikala ne nsombelu muimpe wa disanka.  (Yeshaya 48:17, 18) Patudi tutumikila mikenji ya Yehowa, tudi tuleja mutudi tuanyisha bionso bidiye mutuenzele. Pabi anu bantu bakese lelu ke batu baleja dianyisha edi. Katuena basue kupanga dianyisha bu bantu bakuabu ba mu matuku a Yezu to. Pakuondopa Yezu bena nsudi dikumi, anu umuepele ke uvua mupingane bua kumuela tuasakidila. (Luka 17:12-17) Bulelela, tudi basue kuikala bu eu wakela tuasakidila, ki mbu bantu tshitema bavua bapange dianyisha to!

⁹ Kadi mmikenji kayi ya Yehowa itudi ne bua kutumikila? Tukadi bamone imue ya kudiyi mu mukanda emu, kadi tuanji kuambulula anu mikese. Kutumikila mikenji ya Nzambi nekutuambuluishe bua kushala mu dinanga diende.

10. Umvuija bua tshinyi bidi bikengela kutungunuka ne kupeta dimanya dia Yehowa Nzambi.

¹⁰ Kulonga malu a Yehowa mbualu budi ne mushinga bua kudia nende malanda mimpe. Mbualu budi ne bua kutungunuka, ki mbua kuimanyika to. Tshilejilu, wewe muikale pambelu butuku mu mashika makole wota  mudilu, udi mua kuulekela wenda ukepela too ne muajimawu anyi? Tòo, newikale wela nkunyi bua mudilu wikale anu utema bikole. Bua wewe kumvua bimpe, udi ne bua kuikala usonsola mudilu au! Anu mutu diela nkunyi mu mudilu diwulama, ke mudi “dimanya dia malu a Nzambi” dilama dinanga ditudi banange nadi Yehowa dishala dikole.​—Nsumuinu 2:1-5.

11. Tshiakenzeka ntshinyi pavua Yezu mulongeshe bayidi bende babidi?

¹¹ Yezu uvua musue bua bayidi bende batungunuke ne kulama dinanga dia Yehowa ne dia Dîyi diende ditema bikole. Tshilejilu panyima pa dibishibua diende ku lufu, wakalongesha bayidi bende babidi amue malu a mu milayi ya mu Mifundu ya tshiena-Ebelu ivua imukumbanyina. Ntshinyi tshiakenzeka? Bayidi aba bakalua kuamba ne: ‘Mitshima yetu kayivua itema munda muetu anyi, pavuaye utuambila malu mu njila, pavuaye utujinguluila Mukanda wa Nzambi?’​—Luka 24:32.

12, 13. (a) Ntshinyi tshidi tshifikila dinanga dia Nzambi ne dia Bible lelu? (b) Tudi ne bua kuenza tshinyi bua dinanga dietu kadikepi?

¹² Pauvua mulonge bua musangu wa kumpala malu atu Bible ulongesha, kuvua mumvue disanka, muoyo usunsuma ne dinanga bua Nzambi anyi? Kakuyi mpata, ke muuvua mumvue. Ke mutu bantu ba bungi bumvua. Tshilumbu mpindieu ntshia kulama dinanga adi bua dikale dikole ne bua didiunde. Katuena basue kulonda nsombelu udi pa buloba lelu to. Yezu wakamba ne: ‘Dinanga dia ba bungi nedikepe.’ (Matayo 24:12) Kadi ntshinyi tshiudi ne bua kuenza bua dinanga diebe bua Yehowa ne bua Bible kadikepi?

¹³ Utungunuke ne kupeta dimanya dia Yehowa Nzambi ne dia Yezu Kristo. (Yone 17:3) Ikala welangana meji bikole pa malu audi ulonga mu Bible, udiebeja ne: ‘Bualu ebu budi bundongesha tshinyi pa bidi bitangila Yehowa Nzambi? Ndi mulonge bualu kayi bukuabu budi mua kunsaka bua kumunanga ne mutshima wonso, muoyo wonso ne lungenyi luonso?’ (1 Timote 4:15) Dielangana meji nunku nedilame dinanga diebe dia Yehowa ne luya.

14. Mmunyi mudi kusambila mua kutuambuluisha bua kukolesha dinanga dietu dia Yehowa?

 ¹⁴ Mushindu mukuabu wa kulama dinanga dietu dia Yehowa ditema bikole nkusambila pa tshibidilu. (1 Tesalonike 5:17) Tuvua balonge mu Nshapita wa 17 ne: disambila ntshintu tshia mushinga tshidi Nzambi mutupeshe. Anu bu mudi malanda a bantu alengela padibu ne tshibidilu tshia kuyukila ne kulejangana malu onso, ke mudi kabidi malanda etu ne Yehowa ashala makole patudi tumusambila pa tshibidilu. Ki mbimpe tuikale tuambulula anu malu amue amue adi kaayi ne mushinga ne kaayi afumina mu mutshima patudi tusambila to. Tudi ne bua kuakula ne Yehowa anu bu mutu muana wakula ne tatuende udiye munange bikole. Tudi ne bua kumuleja malu onso patoke ne kanemu ne kuakula ne muoyo mujima. (Musambu 62:8) Eyowa, didilongela Bible ne masambila menza ne muoyo umue mmalu a mu ntendelelu wetu adi atuambuluisha bua kushala mu dinanga dia Nzambi.

15, 16. Bua tshinyi tudi ne bua kumona mudimu wa kuyisha Bukalenge bu diakalenga dinene ne bu tshintu tshia mushinga mukole?

¹⁵ Didilongela Bible ne disambila mmalu a mu ntendelelu wetu atudi mua kudienzela pa nkayetu. Kadi tumone mpindieu bumue bualu bututu tuenza ku mêsu kua bantu bakuabu: kuambila bantu malu atudi tuitabuja. Ukadi muambilaku bakuabu malu audi mulonge mu Bible anyi? Biwikala ubambila, udi ne diakalenga dinene. (Luka 1:74, NW) Patudi tumanyisha bakuabu malu a Yehowa Nzambi atudi balonge, tudi tuenza mudimu mutambe bunene uvuabu bapeshe bena Kristo balelela bonso: mudimu wa kuyisha lumu luimpe lua Bukalenge bua Nzambi.​—Matayo 24:14; 28:19, 20.

¹⁶ Mupostolo Paulo uvua umona mudimu eu bu tshintu tshia mushinga mukole. (2 Kolinto 4:7) Kuambila bakuabu malu a Yehowa ne bidiye mulongolole bua kuenza mmudimu mutambe yonso. Tudi tuenzela Mfumu muimpe mutambe bonso mudimu, ne netupete difutu dipite makuabu onso.  Paudi wenza mudimu eu, udi wambuluisha bantu ba muoyo muimpe bua kudia malanda ne Tatu wetu wa mu diulu ne bua kupeta njila wa muoyo! Mmudimu kayi mukuabu udi mua kupita eu? Kumanyisha Yehowa ne Dîyi diende kudi kabidi kudiundisha ditabuja diebe ne kudi kukolesha dinanga  diudi nadi kudiye. Ndekelu wa bionso, Yehowa udi wanyisha muudi uditatshisha bua kuenza mudimu eu. (Ebelu 6:10) Kutungunuka ne kuenza mudimu eu kudi kukuambuluisha bua kushala mu dinanga dia Nzambi.​—1 Kolinto 15:58.

17. Bua tshinyi tudi ne bua kuenza mudimu wa buambi ne mitalu lelu?

¹⁷ Mbimpe tuikale tuvuluka ne: mudimu wa kuyisha Bukalenge mmudimu wa kuenza ne mitalu. Bible udi wamba ne: ‘Longesha bantu dîyi dia Nzambi, wamba amu kuamba.’ (2 Timote 4:2, MMM) Bua tshinyi tudi ne bua kuwenza ne mitalu nangananga lelu? Bible udi wamba ne: ‘Dituku dinene dia Yehowa didi pabuipi; didi pabuipi ne didi didiendesha lukasa!’ (Sefanya 1:14) Eyowa, tshikondo tshidi tshilua lukasa tshikala Yehowa ne bua kubutula ndongoluelu wa malu eu yonso. Tudi ne bua kudimuija bantu! Badi ne bua kumanya ne: etshi ke tshikondo tshia kusungula Yehowa bu Mukalenge wabu Munene. Nshikidilu ‘kakupanga kulua’ to.​—Habakuka 2:3.

18. Bua tshinyi tudi ne bua kutendelela pamue ne bena Kristo balelela?

¹⁸ Yehowa mmusue ne: tumutendelele pamue ne bena Kristo balelela. Ke bualu kayi Dîyi diende didi diamba ne: ‘Tudielelangane meji muntu ne muntu bua kuenzejangana ku dinanga ne ku dienza dia bienzedi bimpe, katuyi tulekela bietu didisangisha dietu pamue, bu mudi tshilele tshia bakuabu, kadi tukoleshangana mitshima, tutamba kuenza nunku bualu bua nudi numona dituku dia Mukalenge disemena pabuipi.’ (Ebelu 10:24, 25) Patudi tudisangisha ne bena Kristo netu mu bisangilu bia tshisumbu, tudi ne diakalenga dinene dia kutumbisha ne kutendelela Nzambi wetu utudi banange. Tudi kabidi tukoleshangana ne tukankamijangana.

19. Mmunyi mutudi mua kukolesha dinanga mu tshisumbu tshia bena Kristo?

¹⁹ Patudi tudisangisha pamue ne batendeledi bakuabu ba Yehowa, tudi tukolesha dinanga ne bulunda mu tshisumbu. Mbimpe tukebe ngikadilu mimpe idi nayi bakuabu anu bu mutu Yehowa ukeba malu mimpe adi munda muetu. Katuikadi tukeba bua bana betu bikale bapuangane to. Uvuluke ne: bonso kabena ne makanda a muomumue mu nyuma ne kabidi tuetu bonso tutu tuenza bilema. (Kolosai 3:13) Udie  bulunda ne aba badi banange Yehowa ne muoyo umue ne neukole mu nyuma. Eyowa, kutendelela Yehowa pamue ne bana benu ba mu nyuma nekukuambuluishe bua kushala mu dinanga dia Nzambi. Ntshinyi tshitu Yehowa upesha aba badi bamutendelela ne lulamatu ne badi bashala mu dinanga diende?

20, 21. “Muoyo” wa bushuwa ntshinyi? Bua tshinyi nditekemena dimpe dia dikema?

²⁰ Yehowa utu upesha basadidi bende muoyo, kadi mmuoyo wa mushindu kayi? Amba tung, kuena ne muoyo mpindieu anyi? Ba bungi ba kutudi nebambe ne: badi nawu bualu badi bapuyakana, badia ne banua. Kakuyi mpata, tudi ne muoyo. Patu bantu mu masanka, batu bela meji ne: badi ne muoyo wa bushuwa. Pabi, Bible udi uleja ne: kakuena muntu udi ne muoyo wa bushuwa lelu to.

²¹ Dîyi dia Nzambi didi ditubela bua ‘kulamata muoyo wa bushuwa.’ (1 Timote 6:19) Mêyi aa adi aleja ne: “muoyo wa bushuwa” ntshintu tshitudi batekemene bua kupeta mu matuku atshilualua. Eyowa, patuikala bapuangane, netuikale ne muoyo mu ngumvuilu mulelela, bualu netuikale ne nsombelu uvua Nzambi musue bua tuikale nende. Patuikala ne bukole bua mubidi bupuangane, ditalala ne disanka dia kashidi mu mparadizu pa buloba, apu netuikale ne “muoyo wa bushuwa,” mbuena kuamba ne: muoyo wa tshiendelele. (1 Timote 6:12) Edi ki nditekemena dimpe dia dikema anyi?

22. Mmushindu kayi uudi mua ‘kulamata muoyo wa bushuwa’?

²² Mmushindu kayi uudi mua ‘kulamata muoyo wa bushuwa’? Paulo wakalomba bena Kristo bua ‘benzele bakuabu bimpe’ ne ‘bikale ne bubanji bua bienzedi bimpe.’ (1 Timote 6:18) Nunku, bidi bilondesha mushindu utudi tutumikila bulelela butudi balonge mu Bible. Kadi Paulo uvua musue kuamba ne: badi batufuta “muoyo wa bushuwa” patudi tuenza malu mimpe anyi? Tòo, bualu ditekemena dilenga edi tudi tudipeta bua ‘bulenga bua Nzambi budi kabuyi butuakanyine.’ (Lomo 5:15, NW) Kadi Yehowa mmusue kupesha  bantu badi bamuenzela mudimu ne lulamatu tshintu kampanda. Mmusue kukumona ne “muoyo wa bushuwa.” Bantu badi bashala mu dinanga dia Nzambi nebapete muoyo eu wa disanka, wa ditalala ne wa tshiendelele.

23. Bua tshinyi bidi bikengela kushala mu dinanga dia Nzambi?

²³ Muntu ne muntu udi ne bua kudiebeja ne: ‘Ndiku ntendelela Nzambi mushindu udiye muleje mu Bible anyi?’ Tuetu bikale tudikonkonona dituku ku dituku ne tumona ne: ke mutudi tuenza, tudi mu njila muimpe. Tudi mua kuikala batuishibue ne: Yehowa udi tshisokomenu tshietu. Neakube basadidi bende ba lulamatu mu matuku mabi aa a ku nshikidilu wa ndongoluelu wa malu eu wa kale. Yehowa neatupandishe kabidi bua tuetu kubuela mu ndongoluelu wa malu mulenga ukadi pabuipi. Ndisankapu kayi dia kumona tshikondo atshi! Netuikale kabidi ne disanka bua mushindu utuvua bangate mapangadika malenga mu matuku a ku nshikidilu. Wewe wangata mapangadika mimpe aa mpindieu, neupete “muoyo wa bushuwa,” muoyo uvua Yehowa musue bua tuikale nawu bua kashidi ne tshiendelele!