Tuetu bonso tudi dijinga ne makuta bua kukumbaja majinga a bena mu mêku etu. (Nsumuinu 30:8) Anu mudi Bible wamba, ‘makuta adi bukubi.’ (Muambi 7:12) Bidi mua kukolela bena dibaka bua kuyukila malu a makuta, kadi kulekedi bua makuta abueje bilumbu mu dibaka diebe to. (Efeso 4:32) Bena dibaka badi ne bua kueyemenangana ne kuyukila mushindu udibu mua kutula makuta abu.

TSHIDI BIBLE WAMBA: “Nnganyi wa kunudi udi, yeye musue kuibaka tshibumba, kayi wanji kusomba bua kumanya bungi bua makuta adiye ne bua kutula bua kumona ni udi ne bintu bikumbane bua kutshijikija?” (Luka 14:28) Bidi ne mushinga bua kuyukila pamue bua mushindu unuikala nutula makuta enu. (Amosa 3:3) Angatayi dipangadika pamue bua tshinudi basue kusumba ne bungi bua makuta anudi ne bua kutula. (Nsumuinu 31:16) Nansha wewe ne makuta a kusumba tshintu kampanda, kabiena bisua kuleja ne: udi ne bua kutshisumba. Epuka mabanza. Tula makuta anu audi nawu.—Nsumuinu 21:5; 22:7.

TSHIUDI MUA KUENZA:

• Wewe muikale ne ndambu wa makuta ku ndekelu kua ngondo, yukilayi tshinudi mua kuenza nawu

• Wewe kuyi ne makuta makumbane to, kepesha mushindu wa kuatula. Tshilejilu, pa mutu pa kuya kudia mu restoran, udi mua kulambisha biakudia kumbelu

TSHIDI BIBLE WAMBA: Wenze “malu onso ne muoyo mutoke, ki nganu ku mêsu kua Yehowa, kadi ne ku mêsu kua bantu kabidi.” (2 Kolinto 8:21) Ambila muena dibaka nebe makuta audi upeta ne audi utula kuyi umushima.

Ikala ne tshibidilu tshia kuyukila ne muena dibaka nebe bua mapangadika manene audi ukeba kuangata bua makuta enu. (Nsumuinu 13:10) Kuyukidilangana malu a makuta nekunuambuluishe bua kuikala ne ditalala mu dibaka dienu. Kumonyi makuta audi upeta bu makuta ebe nkayebe to, uamone bu makuta a dîku.—1 Timote 5:8.

TSHIUDI MUA KUENZA:

• Umvuanganayi bungi bua makuta budi yonso wa kunudi mua kutula kayi webeja mukuabu

• Kuindidi bua bilumbu bijuke bua nushishe kuakula bua makuta to