DILONGESHA 03
Mbimpe kuitaba malu adi Bible wamba anyi?
Bible udi utulaya malu a bungi ne utupesha mibelu ya bungi. Pamuapa udi musue kumanya malongesha adimu, kadi eku welakana pamuapa kabidi bua kuitaba. Mbia meji bua wewe kuitaba milayi ne mibelu idi mu mukanda wa kale eu anyi? Tshidi Bible wamba bua kushala ne muoyo mpindieu ne mu matuku atshilualua, udi utshitaba anyi? Bantu miliyo ya bungi badi batshitaba. Tumonabi ni udi mua kutshitaba pebe.
1. Malu adi Bible wamba mmalelela anyi?
Bible udi wamba mudiye ne “mêyi majalame a bulelela.” (Muambi 12:10) Bible udi ulonda malu malelela a bantu bavua ne muoyo kale. (Balayi Luka 1:3; 3:1, 2.) Bamanyi ba malu a kale ba bungi ne ba malu a bintu bia muinshi mua buloba mbajadike pabu ne: matuku, bantu, miaba, ne malu adi Bible ulonda, bionso mbilelela.
2. Bible mmukanda wa kale; kadi bua tshinyi tudi tuamba ne: utshidi anu ne diambuluisha?
Misangu ya bungi Bible udi wakula bua malu avua kaayi manji kumanyika tshikondo tshivuabu bamufunda to. Tshilejilu, udi wakula bua malu a mamanya a bia panu. Bantu bavule kabavua bitaba bia bungi bivua Bible wamba pa malu aa tshikondo tshivuabu bamufunda to. Kadi mamanya a bena meji a matuku etu aa adi ajadika ne: tshidi Bible wamba ntshilelela. Mêyi a mu Bible adi “misangu yonso majalame, mpindieu ne bua kashidi.”—Misambu 111:8.
3. Bua tshinyi mbimpe tuitabe tshidi Bible wamba bua matuku atshilualua?
Bible udi ne mêyi a buprofete a akavua madianjile kumanyisha “malu avua kaayi manji kuenzeka to.” (Yeshaya 46:10) Bible ukavua mudianjile kumanyisha malu a kale a bungi ne bujalame buonso bidimu bia bungi kumpala kua owu kuenzeka. Ukavua kabidi mudianjile kumanyisha malu a bungi adi enzeka lelu pa buloba. Mu dilongesha edi, netumone mêyi a buprofete adi mu Bible. Mushindu uvuabu bafunde mêyi au ne bujalame udi ukemesha bikole!
BUELA MU BUONDOKE
Longa mudi mamanya a bia panu a matuku etu aa apetangana ne tshidi Bible wamba, ulonge kabidi mêyi a buprofete adi akemesha adi mu Bible.
4. Mamanya a bia panu adi apetangana ne tshidi Bible wamba
Kale, bantu ba bungi bavua bela meji ne: buloba buvua busombe pa tshintu. Tangilayi FILME.
Mona tshikavuabu bafunde mu mukanda wa Yobo bidimu bitue ku 3 500 kumpala. Balayi Yobo 26:7, pashishe nuandamune lukonko elu:
-
Bua tshinyi mêyi a ne: buloba mbulembeleja “kabuyi bukudika ku tshintu” adi akemesha?
Bantu bakalua kumvua bimpe mudi luendu lua mâyi mu diulu ne pa buloba anu panyima pa bidimu bia 1800. Kadi mona tshikavua Bible yeye muambe bidimu binunu ne binunu kumpala. Balayi Yobo 36:27, 28, pashishe nuandamune nkonko eyi:
-
Bua tshinyi diumvuija dipepele edi dia luendu lua mâyi didi dikemesha?
-
Mvese iudi ufuma ku dibala eyi mmikoleshe dishindika diudi nadi bua malu a mu Bible anyi?
5. Bible uvua mudianjile kumanyisha malu a mushinga
Balayi Yeshaya 44:27–45:2, pashishe nuandamune lukonko elu:
-
Mmalu kayi avua Bible mudianjile kumanyisha bidimu 200 kumpala kua dikuluka dia Babilona?
Malu a kale adi ajadika ne: Kolesha, mukalenge wa Pelasa, ne tshiluilu tshiende bakakuata tshimenga tshia Babilona mu 539 K.Y. b Bakatuma mâyi avua akuba tshimenga kua tshianana. Pakabuelelabu mu tshimenga ku biibi bivua bena Babilona bashiye bikangula, bakatshikuata kakuyi mvita to. Babilona utshidi anu bikulu too ne lelu ukadiku bidimu bipite pa 2 500 eu. Mona tshivua Bible mudianjile kumanyisha.
Balayi Yeshaya 13:19, 20, pashishe nuandamune lukonko elu:
-
Tshivua tshifikile Babilona tshidi tshijadika dikumbana dia mulayi wa buprofete eu mushindu kayi?
Bikulu bia Babilona lelu mu ditunga dia Irak
6. Bible ukavua mulaye malu atudi tumona enzeka lelu
Bible udi utuambila ne: tudi mu “matuku a ku nshikidilu.” (2 Timote 3:1) Mona malu akavua Bible muambe bua matuku a ku nshikidilu atudi aa.
Balayi Matayi 24:6, 7, pashishe nuandamune lukonko elu:
-
Mmalu kayi manene avua Bible muambe avua ne bua kuenzeka mu matuku a ku nshikidilu?
Balayi 2 Timote 3:1-5, pashishe nuandamune nkonko eyi:
-
Mbikadilu kayi bidi Bible uleja bivua bantu ba bungi ne bua kuikala nabi mu matuku a ku nshikidilu?
-
Mu bikadilu bionso ebi, mbiepi biudi umona ne ebe abidi?
BAMUE BATU BAMBA NE: “Bible mmukanda wa mianu ne malu a tshiena kale.”
-
Ntshinyi tshidi tshikujadikila wewe ne: malu adi Bible wamba mmalelela?
TSHIA KUKUATA
Malu a kale, mamanya a bia panu, ne mêyi a buprofete adi atusaka bua kuitaba tshidi Bible wamba.
Diambulula
-
Malu adi Bible wamba mmalelela anyi?
-
Mmu malu kayi mudi mamanya a bia panu apetangana ne tshidi Bible wamba?
-
Buebe wewe, Bible udiku utumanyisha malu enzeka kumpala eku anyi? Bua tshinyi udi wamba nanku?
BIA KUTANGILA KABIDI
Kudiku miaba idi Bible mutupakane mu bidiye wamba bia mamanya a bia panu anyi?
“Mamanya a bia panu adi apetangana ne tshidi Bible wamba anyi?” (Tshiena-bualu tshia mu jw.org)
Mmalu kayi adi ajadika ne: tudi mu “matuku a ku nshikidilu”?
“Milayi 6 ya mu Bible iudi umona yenda ikumbana” (Tshibumba tshia Nsetendi 1/7/2011)
Mona muvua mêyi a buprofete avua atangila bukokeshi bua bena Greke makumbane.
Mona muvua mêyi a buprofete mambuluishe muntu bua kushintulula muvuaye wangata Bible.
“Buanyi meme Nzambi kavuaku to” (Tshibumba tshia Nsentedi No. 5 2017)
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
