Udiku mumone bantu badi mu tshimfuanyi etshi anyi?— Mêna abu m’Matayi, Mâko, Luka, Yone, Petelo, Yakobo, Yuda, ne Paulo. Bantu aba bavua bonso ne muoyo mu tshikondo tshivua Yezu pende muikale ne muoyo panu, bobu kufunda malu a Yezu. Tuanji tumonabi malu abu makuabu.

Bantu basatu ba kudibu bavua bapostolo bavua bayisha ne Yezu. Udi mubamanye anyi?— Kuvua Matayi, Yone, ne Petelo. Mupostolo Matayi ne mupostolo Yone bavua bamanye Yezu bimpe menemene; yonso wa kudibu wakafunda  mukanda wa malu a Yezu. Mupostolo Yone wakafunda kabidi mukanda utu ne dîna dia Buakabuluibua ne mikanda isatu mibikila ne: Yone wa Kumpala, Yone Muibidi, ne Yone Muisatu. Mupostolo Petelo wakafunda mikanda ibidi idi mu Bible. Batu bayibikila ne: Petelo wa Kumpala ne Petelo Muibidi. Mu mukanda wa Petelo Muibidi, Petelo mmufundamu bua tshikondo tshivua Yehowa muakule bua Yezu mu diulu ne: ‘Eu ke muananyi meme. Ndi mumunange, kabidi ndi ndiumvua bua bualu buende.’

Bantu bakuabu badi mu tshimfuanyi etshi badi pabu batulongesha malu a Yezu mu mikanda ivuabu bafunde. Umue wa kudibu ke Mâko. Pamuapa uvuapu dîba divuabu bakuate Yezu, kumonaye ne malu onso avua menzeke. Mukuabu ke Luka. Yeye eu uvua doktere; pamuapa uvua mulue muena Kristo panyima pa lufu lua Yezu.

Bafundi bakuabu ba Bible babidi baudi mumone mu tshimfuanyi etshi bavua bakunyi ba Yezu ba balume. Utu mumanye mêna abu anyi?— Mêna abu n’Yakobo ne Yuda. Kumpala, kabavua bitabuja Yezu to! Bakafika too ne ku diela meji ne: mmujimije lungenyi. Kadi bakalua kuitabuja Yezu pashishe, bobu kulua bena Kristo.

Wa ndekelu wa ku bafundi ba Bible uudi mumone mu tshimfuanyi etshi ke Paulo. Kumpala kua kushalaye muena Kristo, dîna diende uvua Shaula. Uvua mukine bena Kristo, kabidi uvua ubakengesha bibi be! Kadi udi mumanye tshivua tshifikishe Paulo ku dilua muena Kristo anyi?— Dituku dikuabu, Paulo mu njila mutangile ku luendu, kumvuaye diakamue dîyi dia muntu diumbukila mu diulu dimuambila malu. Muntu au uvua Yezu. Wakebeja Paulo ne: ‘Udi ukengesha bantu badi bangitabuja bibi nunku bua tshinyi?’ Panyima pa bualu ebu, Paulo kushintuluka, kuluaye muena Kristo. Paulo wakafunda mikanda 14 ya mu Bible: kumbukila ku Lomo too ne ku Ebelu.

Tutu tubala Bible dituku dionso, ki mmuomu anyi?— Patudi tubala Bible, tudi tumanya malu a bungi adi atangile Yezu. Udiku musue kumanya malu makuabu adi atangile Yezu anyi?—