Ne patshiatshia ponso mu dia 24/02/2022 ditunga dia Russie ndibueje basalayi badi mu ditunga dia Ukraine ku bukole, nansha mudi bamfumu ba bukua matunga badienzeja bua mvita kayikadiku. Ntshinyi tshidi mvita ya matunga abidi aa mua kukebesha pa buloba bujima? Matuku makese adi panshi aa, António Guterres (sekretere munene wa Bulongolodi bua matunga masanga anyi ONU) ukavua muambe ne: “Bunene bua lutatu luikala dikenga dia bantu, kanyawu ne dinyanguka dia mianda ya bukubi ku Mputu ne pa buloba bujima mua kukebesha mbupitshidile ne mutudi mua kubufuanyikija mu meji.”

•   Yezu ukavua mudianjile kumanyisha dîba divua ‘tshisamba ne bua kuluisha tshisamba tshikuabu, bukalenge buluisha bukalenge bukuabu.’ (Matayi 24:7) Bua kumvua mudi Bible umvuija mvita idi yenda yenzeka mpindieu ikumbaja mêyi a buprofete a Yezu, bala tshiena-bualu tshia “Tshimanyinu tshia ‘matuku a ku nshikidilu’ anyi ‘bikondo bia ku nshikidilu’ ntshinyi?”

•   Mukanda wa Buakabuluibua udi ufuanyikija mvita ne muendeshi wa kabalu udi musombe pa kabalu “ka dikala dikunze kunzuu” udi ‘umbusha ditalala pa buloba.’ (Buakabuluibua 6:4) Bua kumvua mudi dîyi dia buprofete edi dipetangana ne mvita ya matuku etu aa, bala tshiena-bualu tshia “Bendeshi ba tubalu banayi mbanganyi?”

•   Mukanda wa Danyele ukavua mumanyishe dikokangana divua mua kulua pankatshi pa “mukalenge wa ku nord” ne “mukalenge wa ku sud.” (Danyele 11:25-45) Bua kumvua bua tshinyi mbikumbane bua kubikila ditunga dia Russie ne bena diabu bu mukalenge wa ku nord, tangila filme wa Mêyi a buprofete a mu Danyele 11 akadi makumbane. a

•   Mukanda wa Buakabuluibua udi wakula kabidi bua “mvita ya dituku dinene dia Nzambi Wa Bukole Buonso.” (Buakabuluibua 16:14, 16) Tshidibi, ayi ki mmvita ya matunga aluangana bu idi yenzeka mpindieu eyi to. Bua kumanya malu makuabu a bualu bua mvita ya matuku atshilualua ayi, bala tshiena-bualu tshia “Mvita ya Armagedone ntshinyi?”

•   Bible udi wamba ne: Nzambi “udi ujikija mvita pa buloba buonso bujima.” (Misambu 46:9) Bua kumanya malu makuabu adi Nzambi utulaya bua matuku adi kumpala, bala tshiena-bualu tshia “Ditekemena dilelela dia matuku atshilualua mimpe.”

•   Yezu uvua mulongeshe bayidi bende bua bikale balomba bua Bukalenge bua Nzambi bulue. (Matayi 6:9, 10) Bukalenge abu mmbulamatadi wa mu diulu wenzeja bidi Nzambi musue pa buloba. Mu bidi Nzambi musue abi mudi kabidi ditalala dia buloba bujima. Bua kumanya masanka akutuadila pebe Bukalenge bua Nzambi, tangila filme wa Bukalenge bua Nzambi ntshinyi?

 Mu ditunga dia Ukraine mudi Bantemu ba Yehowa bapite pa 129 000. Anu bu Bantemu ba mu matunga makuabu onso, bobu pabu badi bidikija Yezu pa kubenga kubuelakana mu malu a tshididi ne mu mvita. (Yone 18:36) Pa buloba bujima, Bantemu ba Yehowa mbatungunuke ne kumanyisha ‘lumu luimpe lua Bukalenge’ benda bumvuija bantu ne: Bukalenge abu ke buikala ndekelu wa makenga a bukua bantu ne wa mvita kabidi. (Matayi 24:14) Keba mua kupetangana netu bua umone mua kumanya malu a bungi a mukenji wa ditekemena udi mu Bible.