Irma, dhako modak e piny Germany en jahigni 90 kama. Oseyudo aksident maricho ahinya diriyo, kendo osetimne yeng’o ding’eny. Mano osemiyo tinde ok onyal dhi yalo wach Nyasaye ot ka ot kaka notimoga chon. Kuom mano, sani olendoga gi barupe mondikonega wedene kod osiepene. Ji oheroga barupe ma Irma ndikoga kojiwogigo kendo ohoyogigo sama osiepegi kata wedegi otho, kendo ng’enygi goyonega simu ka gipenje ni obiro oronegi barua machielo karang’o. En bende ji ndikonega barupe mang’eny ka gigoyonego erokamano, kendo ginyisega ni oornegi barupe moko kendo. Irma wacho niya: “Mago e gik ma miya mor kendo konya dhi nyime yalo wach Nyasaye.”

 Bende, Irma oroga barupe ne joma oti. Owacho niya: “Chieng’ moro miyo moro moti nogoyona simu monyisa kaka barua ma nandikone nojiwe ahinya ka ne jaode otho. Miyono okanoga baruano e Mumbe kendo kinde ka kinde osomega godhiambo. Miyo machielo ma bende jaode notho machiegni, nowacho ni barua ma nandikone nojiwe moloyo weche ma pastagi nonyise. Ne en gi penjo mang’eny ahinya, kendo nokwaya konyalo lima.”

 Osiep Irma moro ma ok en Janeno nodar modhi mabor, omiyo, nokwayo Irma mondo obi ondiknega barupe. Irma wacho niya: “Miyono ne kanoga barupe te ma nandikonega. Ka ne otho, nyare nogoyona simu monyisa ni nosomo barupe duto ma ne andiko ne min-gi kendo nokwaya ka en be anyalo ndikone barupe moting’o puonj mag Muma.”

 Irma mor ahinya gi tij yalo wach maber. Owacho niya: “Akwayoga Jehova mondo odhi nyime miya teko mar tiyone. Kata obedo ni sani ok anyal lendo ot ka ot, atimo duto ma anyalo.”