Par ane wachni: Dakika apar kende e mosekalo nyaka ne Karen chop e nyasi moro ma ogwelee. Matin nono, owinjo dwol moro mong’eyo ka penje kama:

Karen lokore kae to oneno Jessica koting’o chupe ariyo mag kong’o ma oseyaw. Jessica miyo Karen chupa achiel kae to owachone niya: “Donge tinde in ng’ama duong’ ma inyalo madho amadha gini?”

Karen dwaro tamore, kata kamano, nikech Jessica en osiepne ahinya, ok doher chwanye. E wi mano, Jessica en achiel kuom nyiri ma timbegi beyo. To ka Jessica e ma madho kong’o, to kare nenore ni ok en tim marach ahinya. Karen wacho e chunye niya: ‘Bende en mana gima imadho, ok nyal pime gi yedhe ma mero ji.’

Ka dine bed ni in Karen, ditimo nang’o?

Mondo ing’ad paro makare sama gima kamano oyudi, nyaka ikwong ing’e ni in ng’at machal nade. Kido mabeyo ma in-go kod gik ma iyiego e ma biro konyi ng’eyo ni in ng’at machal nade. Ka iseng’eri maber, to ok ibi weyo jomoko e ma ochik ngimani.—1 Jo-Korintho 9:26, 27.

Ere kaka inyalo chiko ngimani iwuon? Dwoko penjo ang’wen maluwogi nyalo konyi chako ng’eyo kaka inyalo timo kamano.

Ng’eyo nyalo ma in-go kod kido mabeyo ma in-go biro miyo ibed gi chir.

RANYISI MANIE MUMA: Jaote Paulo nondiko kama: “Kata kapo ni ok alony e wuoyo, kuom adier, an gi ng’eyo.” (2 Jo-Korintho 11:6) Nikech Paulo nong’eyo ndiko e yo maber, mano nokonye chung’ motegno sama jomoko ne kete e tem. Ne ok oweyo mondo paro mobam ma jomoko ne nigo oketh yiene.—2 Jo-Korintho 10:10; 11:5.

NONRI IWUON: Ndik ane talent kata nyalo ma in-go piny kae.

Koro ler ane kido maberie mogik ma in-go. (Kuom ranyisi, be idewo jomoko? Be ijachiwo? Be inyalo geni? Be iritoga sa?)

Ka iweyo nyawo magi mondo ochik ngimani, to yot mondo ibed jasamwoyo, kendo mano nyalo moni rito kido mabeyo kod mako yie motegno ma in-go.

RANYISI MANIE MUMA: Paulo nong’eyo nyawo ma ne en-go, omiyo nondiko niya: “Kuom adier, ka luwore gi kaka an e dhano ma iye, amor ahinya gi chik Nyasaye, to e ringra, nitiere chik moro ma kedo kod chik manie pacha, kendo otera mondo abed e tuech mar chik mar richo.”—Jo-Rumi 7:22, 23.

NONRI IWUON: Gin nyawo mage ma diher ng’eyo kaka inyalo geng’o?

Be inyalo donjo e taksi kae to iwacho ne dereva mondo olwor kodi pap moro nyaka petrol rum e mtoke? Donge mano en fuwo kendo ketho pesa?

Puonj en mane? Bedo gi gik ma idwaro timo e ngimani biro konyi mondo kik iyie gimoro ochochi ma ichal gi ng’ama ketho seche ka lworore alwora gi taksi e pap.

RANYISI MANIE MUMA: Paulo nondiko niya: “Yo ma aringogo ok en ka ng’at ma riwo gi kiawa; yo ma agoyogo ngum ok en ni mondo ago yamo.” (1 Jo-Korintho 9:26) Paulo ne ok buogrega gi timo gimoro kodwaro neno kaka weche biro dhine e ngimane, kar mano, noketo chenro mag gik modwaro timo kendo neno ni otemo matek mondo ochopgi kare.—Jo-Filipi 3:12-14.

NONRI IWUON: Ndik ane gik moko adek ma diher timo kuom higa achiel.

Ka onge gima iyiego, to ibiro bedo ng’ama bagni. Mana kaka ong’ongruok (haniaf) ma lokoga rangine kaluwore gi kama entiere, e kaka in bende ibiroga loko timbeni mondo obed machal gi mag rowere weteni sama gichuni timo gima ok owinjore. Mano nyalo nyiso ni kare pod ok ing’eyo ni in ng’at machalo nade.

Mopogore gi mano, ka ichung’ kar tiendi, ibiro timo gik moko kaluwore gi kido mabeyo ma in-go kod gik mabeyo ma iyiego kata ka po ni jomoko timo mopogore.

RANYISI MANIE MUMA: Nenore ni ka janabi Daniel ne pod rawera “nosingore ei chunye” ni obiro luwo chike Nyasaye, kata obedo ni ne otere e tuech mabor gi jonyuolne kod wedene. (Daniel 1:8) Gima notimono, nonyiso ayanga ni nong’ere maber. Daniel nodak kaluwore gi kido mabeyo kod yie motegno ma ne en-go.

NONRI IWUON: Gin ang’o gini ma iyiego? Kuom ranyisi: Be iyie kuom Nyasaye? Ka en kamano, ang’o momiyo iyie kuome? Gin ang’o ma nokonyi bedo gi yie ni Nyasaye nitie?

Be iyie ni bedo gi timbe mabeyo ma Nyasaye dwaro ni wabedgo nyalo konyi in iwuon? Ka en kamano, ang’o momiyo iyie gi wachno?

In diher bedo ng’at machal nade? Diher bedo kaka oboke ma kata mana yamo ma kutho mos nyalo ting’o mater mabor, koso kaka yath mochung’ motegno ma yamo mager ok nyal goyo piny? Ka imedo nyago kido mabeyo kendo gero yie ma in-go mondo obed motegno, to ibiro bedo machal gi yadhno. Timo kamano biro miyo ing’e ni in ng’at machal nade.