MIKAEL, ma en chwech mar roho, ok wuo kuome ahinya ei Muma. Kata kamano, seche ma iwuoyo kuome, kinde duto yudo ka en e tich moro. Ei bug Daniel, Mikael kedo gi malaike maricho; e barua mar Juda, opiem gi Satan; to ei Fweny, okedo gi Jachien kod jochiendene. Nikech okedo ni loch mar Jehova ka ogoyo lweny gi josik Nyasaye, Mikael timo tich ma luwore gi tiend nyinge, ma en ni, “En Ng’ano Machalo gi Nyasaye? ” Kata kamano, Mikael en ng’a?

Nitie joma seche moko ong’ere gi nyinge makalo achiel. Kuom ranyisi, Jakobo machon, iluongo bende ni Israel, to jaote Petro bende ong’ere kaka Simon. (Chakruok 49:1, 2; Mathayo 10:2) Kamano bende, Muma nyiso ni Mikael en nying machielo mar Yesu Kristo, ka en e ngima mare ka podi ok obiro e piny, kaachiel gi bang’ wuokne e piny. We wane ane Ndiko manyiso gimomiyo wawacho ni Mikael en Yesu Kristo.

 Malaika Motelo. Wach Nyasaye luongo Mikael ni “malaika motelo.” (Juda 9) Tiend wachni en ni en “malaika maduong’.” Ne ni kae, iluongo Mikael ni malaika motelo. Mani nyiso ni nitie mana malaika achiel kende ma kamano. Kuom adier, kinde duto ma Muma tiyo gi nying mar “malaika motelo,” otiyo gi nyingno mana kowuoyo kuom ng’ato achiel. E wi mano, iwuoyo kuom Yesu kaka ng’at ma nigi migawo mar malaika motelo. Ka owuoyo kuom Ruoth Yesu Kristo ma osechier, 1 Jo Thessalonika 4:16 wacho kama: “Ruoth owuon biro lor koa e polo gi luong matek, gi dwond malaika maduong’.” Ee, dwond Yesu iwacho ni en mar malaika maduong’, kata malaika motelo. Kuom mano, Ndikoni nyiso ni Yesu owuon e Mikael malaika maduong’, kata motelo.

Jatend Lweny. Muma wacho ni ‘Mikael gi malaikane ne kedo gi Thuol. Thuol gi malaikane bende nokedo lweny.’ (Fweny 12:7) Kuom mano, Mikael e Jatend oganda lweny mar malaike makare. Fweny bende nyiso ni Yesu e Jatend oganda lweny mar malaike makare. (Fweny 19:14-16) Jaote Paulo to nyiso ratiro ni “Ruoth Yesu” nikod “malaika mage man gi teko.” (2 Jo Thessalonika 1:7) Kuom mano, Muma wuoyo kuom Mikael gi “malaikane,” kendo kuom Yesu gi “malaikane.” (Mathayo 13:41; 16:27; 24:31; 1 Petro 3:22) To nikech onge kama Wach Nyasaye ni nitie ogend lweny ariyo mag malaike makare—ma achiel otelne gi Mikael, to machielo otelne gi Yesu—en gima winjore ni kuom adier, Mikael en Yesu Kristo ka en e migawo mare mar polo. *