We wapuonjre ane e wi rawera moro ma ne oreso ngima ner mare. Ner rawerano ne en jaote Paulo. Ok wang’eyo nying rawerano, to gima wang’eyo en ni ne en jachir ahinya. Be diher ng’eyo ni notimo ang’o?—

Paulo ne ni e od twech e dala mar Jerusalem. Ne omake nikech ne oyalo e wi Yesu. Joma richo moko ne ok dwar Paulo, omiyo ne giloso chenro mar nege. Ne giwacho niya: ‘We wanyis jatend jolweny mondo ochik jolweny oter Paulo e od ng’ado bura. Wabiro pondo e bath ndara mondo waneg Paulo sama jolweny kalo kode!’

Wuod nyamin Paulo ne owinjo chenro marachno. Ne otimo ang’o? Ne odhi e od twech monyiso Paulo wachno. Kanyo gi kanyo, Paulo nochike mondo odhi oful ne jotend lweny gima joma richogo ne chano timo. Be iparo ni ne en gima yot mondo rawerano owuo gi jatend lwenyno?— Ooyo, nikech jatelono ne en jatelo maduong’. Kata kamano, wuowino ne en jachir kendo nowuoyo gi jatelono.

Jatelono notimo gima owinjore. Nokawo jolweny ma dirom 500 mondo orit Paulo! Ne ochikogi ni mondo giter Paulo Kaisaria otienono. Be ne ores ngima Paulo?— Ee, joma richoka ne ok nyal monje! Chenrogi marachno ne ok otiyo.

Ang’o minyalo puonjori e siganani?— In be inyalo bedo jachir mana kaka wuod nyamin Paulo ne jachir. Onego wabed gi chir sama wawuoyo gi jomoko e wi Jehova. Be ibiro bedo jachir kendo idhi nyime wuoyo e wi Jehova?— Kitimo kamano, inyalo yudo ni ireso ngima ng’ato.