Be kinde duto iyudo ka yotni winjo jonyuolni?— Seche moko timo kamano tek. Be ing’eyo ni kinde duto Yesu ne winjo Jehova kendo ne owinjo jonyuolne?— Ranyisine nyalo konyi winjo jonyuolni kata e kinde ma timo kamano ok yot. We wapuonjre weche moko e wi wachni.

Ka pok ne Yesu obiro e piny, ne odak gi Jehova Wuon mare e polo. Kata kamano, ne en gi jonyuol e pinyka bende. Ne iluongogi ni Josef gi Maria. Be ing’eyo kaka ne gibedo jonyuol Yesu?—

Jehova nodaro ngima Yesu e polo mokete e i Maria mondo onyuole kendo odag e pinyka. Mano ne en hono! Yesu ne odongo e i Maria mana kaka nyithindo duto dongo e i minegi. Bang’ dweche ochiko kama ne onyuol Yesu. Mano e kaka Maria gi Josef nobedo jonyuol Yesu e pinyka.

Kane Yesu en mana jahigni 12, notimo gimoro ma ne onyiso kaka nohero Jehova Wuon mare gadier. Mano notimore kane Yesu gi joodgi odhi mabor e dala mar Jerusalem mondo gitim nyasi mar Pasaka. Ka gin e yo giduogo, Josef gi Maria ne ofwenyo ni Yesu ne onge. Be ing’eyo kama Yesu ne nitie?—

Josef gi Maria ne odok Jerusalem mapiyo kendo ne gimanyo Yesu kamoro amora. Luoro nomakogi ahinya nikech ne ok giyude. To bang’ ndalo adek, ne giyude kobet e hekalu! Be ing’eyo gimomiyo Yesu ne ni e i hekalu?— Nikech ka en kuno nonyalo puonjore e wi Jehova Wuon mare. Ne ohero Jehova kendo nodwaro puonjore kaka ne onyalo more. Kata ka nosedongo ma obedo ng’at maduong’, Yesu ne pod odhi nyime winjo Jehova. Yesu nowinjo Wuon mare kata mana e kinde ma timo kamano ne tek kendo ne dhi miyo osandre. Be Yesu ne winjo Josef gi Maria bende?— Ee, Muma wacho ni notimoga kamano.

Ang’o minyalo puonjori kuom ranyisi mar Yesu?— Onego iwinj jonyuolni kinde duto kata e kinde ma timo kamano ok yot. Be mano e gima ibiro timo?—