SULA MAR 61
Ne Gitamore Kulore ne Sanamu
Bang’ kinde moko ka Ruoth Nebukadneza ne oseleko e wi sanamu moler e sula mokalo, noloso sanamu moro maduong’ ahinya mar dhahabu. Noketo sanamuno e paw Dura, kae to noluongo ji duto ma ne imiyo duong’ e pinyno mondo obi ochokre e nyim sanamuno. Joma noluongogo noriwo nyaka Shadrak, Meshak, gi Abednego. Kae to nogolo chik kama: ‘Ka uwinjo thumbe mopogore opogore ka ywak, to ukulru ne sanamuni! Ng’ato ang’ata ma ok otimo mano, ibiro bole e mach.’ Be Shadrak gi jowetene ariyo ne dhi kulore ne sanamuno, koso ne gidhi makore mana gi Jehova kende?
Ruoth ne ogolo chik mondo otug thum. Ji duto ne okulore ne sanamuno, to Shadrak, Meshak, gi Abednego ne ok okulore. Chwo moko ne ofwenyo mano mi ginyiso ruoth niya: ‘Jo-Yahudi adekka otamore kulore ne sanamu.’ Nebukadneza ne ooro wach mondo oluongne Jo-Yahudigo, kendo ne onyisogi kama: ‘Amiyou thuolo mogik mondo ukulru ne sanamu. Ka ok utimo kamano, abiro bolou e mach. Onge nyasaye moro amora ma biro resou.’ Ne gidwoke niya: ‘Kik ithagri gi miyowa thuolo machielo. Nyasachwa nyalo resowa. To kata ka ok oresowa, pod ok wabi kulore ne sanamuno.’
Mirima nomako Nebukadneza. Nonyiso joge niya: ‘Chwakuru majno obed maliet mohingo mapile nyadibiriyo!’ Kae to ne ochiko jolwenyge niya: ‘Tueuru Shadrak, Meshak, kod Abednego mondo ubolgi e mach.’ Majno ne liet ha, ma ka jolweny ma ne dhi bolo yawuoyigo ne ochopo achopa but majno ni i, jolwenygo ne otho kanyo gi kanyo. Jo-Yahudi adekgo to ne olwar e mach. Ka ne Nebukadneza ong’iyo i majno, ne oneno ji ang’wen ka wuotho e iye kuno. Nobedo maluor ahinya mopenjo joge niya: ‘Aneno wang’a koso aneno ang’o? Donge ji adek e ma ne wabolo e mach? Obet nade ni sani koro aneno ji ang’wen, to kendo achiel kuomgi chalo mana malaika?’
Nebukadneza nodhi machiegni gi kama mach ne nitiereno monyiso Shadrak gini niya: ‘Jotich Nyasaye ma Malo Chutho, wuoguru oko!’ Ji ne owuoro ahinya ka ne gineno Shadrak, Meshak, kod Abednego kowuok e mach ka ok gihinyore kata matin. Pien dendgi, yie wigi, kod lepgi ne ok orewore kata matin, kendo kata mana much mach ne onge kuomgi.
Nebukadneza ne owacho niya: ‘Nyasach Shadrak, Meshak, kod Abednego duong’ miwuoro. Ne ooro malaika mondo oresgi. Onge Nyasaye moro amora ma chal kode.’
Kuom adier, Jo-Yahudi adekgo nong’ado ni ne gidhi siko ka gimakore gi Jehova kata weche tek manade. To nade in?
“Jehova Nyasachi e ma nyaka ilam kendo en kende e ma nyaka itine.”—Mathayo 4:10
