SOMO MAR 7
Pinyruodh Nyasaye En Ang’o?
1. Pinyruodh Nyasaye en ang’o?
Ang’o momiyo Yesu e Ruoth mowinjore?—MARIKO 1:40-42.
Pinyruodh Nyasaye en sirkal ma ni e polo. Obiro kawo kar sirkande duto kendo obiro miyo dwaro mar Nyasaye otimre e polo gi piny. Bedo ni Nyasaye biro tiyo gi Pinyruodhe e yo ma kamano en wach maber. Machiegnini, Pinyruodh Nyasaye biro kelo ne dhano sirkal maber. Obiro miyo ji duto modak e piny obed gi winjruok.—Som Daniel 2:44; Mathayo 6:9, 10; 24:14.
Pinyruoth nyaka bed gi ruoth. Jehova noketo Yesu Kristo Wuode mondo obed Ruoth e Pinyruodh Nyasaye.—Som Fweny 11:15.
Ne vidioni: Pinyruodh Nyasaye En Ang’o?
2. Ang’o momiyo Yesu e Ruoth mowinjore?
Wuod Nyasaye e Ruoth mowinjore nikech ong’won kendo ohero tim makare. (Mathayo 11:28-30) Bende, en gi teko mar konyo ji nikech obiro locho e wi piny ka en e polo. Ka ne osechiere, ne odhi e polo kendo nobet e bad Jehova korachwich korito mondo okete Ruoth. (Jo-Hibrania 10:12, 13) Gikone, Nyasaye ne omiye teko mar locho.—Som Daniel 7:13, 14.
3. Gin jomage ma biro locho gi Yesu?
Jomoko miluongo ni “jo maler” biro locho gi Yesu e polo. (Daniel 7:27) Joma ne okwong yier kaka joma ler ne gin joote Yesu ma ne omakore kode. Jehova osebedo ka yiero chwo kod mon momakore kode mondo obed joma ler nyaka e ndalowagi. Mana kaka Yesu, gin bende ichierogi gi del mar roho.—Som Johana 14:1-3; 1 Jo-Korintho 15:42-44.
Gin ji adi ma dhi e polo? Yesu ne oluongogi ni “kueth matin.” (Luka 12:32) Gikone, kwan-gi biro chopo 144,000. Gibiro locho e wi piny kaachiel gi Yesu.—Som Fweny 14:1.
4. Ang’o ma ne otimore ka ne Yesu ochako locho?
Pinyruodh Nyasaye ne ochako locho e higa mar 1914. * Okang’ mokwongo ma Yesu ne okawo kaka Ruoth ne en wito Satan kaachiel gi jochiendene e piny ka. Satan nobedo gi mirima mochako kelo chandruok e piny. (Fweny 12:7-10, 12) Chakre kanyo, chandruok osemedore ahinya. Lwenje, kech, tuoche, kod yiengni mag piny gin “ranyisi” ma nyiso ni Pinyruoth chiegni kawo okang’ mar tayo gik moko duto e pinyni.—Som Luka 21:7, 10, 11, 31.
5. Pinyruodh Nyasaye timo ang’o?
Kokalo kuom lendo mitimo e piny mangima, Pinyruodh Nyasaye osechako riwo oganda maduong’ mowuok e pinje duto e winjruok achiel. Joma muol tara gi tara bedo e bwo loch mar Yesu. Pinyruodh Nyasaye biro ritogi chieng’ ma Pinyruodhno kethoe piny marachni. Omiyo, jogo duto ma dwaro yudo gueth ma Pinyruodh Nyasaye biro kelo, onego opuonjore bolore e bwo loch mar Yesu.—Som Fweny 7:9, 14, 16, 17.
E kinde loch Pinyruodhno mar higni 1,000, obiro chopo dwaro mokwongo ma ne Nyasaye nigo ne dhano. Piny duto biro bedo paradiso. Gikone, Yesu biro dwoko loch ne Wuon mare. (1 Jo-Korintho 15:24-26) Be nitie ng’at ma diher wuoyogo e wi Pinyruodh Nyasaye?—Som Zaburi 37:10, 11, 29.
^ par. 6 Mondo iyud weche momedore e wi weche ma ne okor e Muma kuom higa mar 1914, ne ite mag 216-217, e bug Gima Muma Puonjo.
