Weche Michakogo
“Ubed jo ma kawo kit jogo ma yudo gik ma Nyasaye nosingo, kuom yie gi timo kinda.”—JO HIBRANIA 6:12.
1, 2. Jarit moro malworo ne neno nade jotich Nyasaye miwuoyo kuomgi e Muma, to ang’o momiyo jogo nyalo bedonwa osiepe mabeyo ahinya?
BANG’ winjo twak moro mar jarit malworo ma hike oniang’, dhako moro ma Jakristo nowacho niya: “Owuoyo e wi joma nie Muma mana ka gima ne gin osiepene machon.” Ne en kare kuom wacho kamano nimar owadwano nosebedo ka puonjore Wach Nyasaye kendo puonjogo kuom higni pieche e okang’ ma koro chwo gi mon ma nonyiso yiego kendo miwuoyo kuomgi e Muma ne chalo mana osiepe ma ne osebedogo e ngimane duto.
2 Donge joma iwuoyo kuomgi e Muma nyalo bedo osiepe mabeyo ahinya? Be ikawogi kaka moko kuom osiepeni? Parie kaka dibed maber ka inyalo yudo thuolo mar wuotho kendo goyo mbaka gi chwo gi mon kaka Noa, Abraham, Ruth, Elija, kod Esther. Par ane kaka ginyalo konyi gi puonj mabeyo koda kaka ginyalo jiwi.—Som Ngeche 13:20.
3. (a) Wanyalo timo ang’o mondo wayud ber kuom joma nonyiso yie miwuoyo kuomgi e Muma? (b) Gin penjo mage mwabiro nono?
3 Onge kiawa ni kinde “chier mar jo makare,” wabiro bedo gi osiepe mabeyo kaka mago. (Tich 24:15) Kata kamano, gie sani bende wanyalo yudo kony mowuok kuom joma nonyiso yie ma iwuoyo kuomgi e Muma. E yo mane? Jaote Paulo nyisowa niya: “Ubed jo ma kawo kit jogo ma yudo gik ma Nyasaye nosingo, kuom yie gi timo kinda.” (Hib. 6:12) Kapok wachako puonjore e wi chwo gi mon ma ne onyiso yie, we wanon ane penjo moko ma weche Paulogo kelo e pachwa: Yie en ang’o, to ang’o momiyo dwarore ni wabed gi yie? Ang’o mwanyalo timo mondo waluw yie mar jotich Nyasaye machon?
Gima Yie En kod Gimomiyo Odwarore
4. Ji mang’eny paro ni yie en ang’o, to ang’o momiyo parono ok nikare?
4 Yie en kido majaber ma chwo gi mon duto mwabiro puonjore e wigi e bugni nokawo mapek. Ji mang’eny kindegi ok ong’eyo tiend yie madier, giparo ni en yie ayiea gimoro maonge gimomiyo. Paro ma kamano ok nikare. Nyiso yie madier ok en yie kuom gimoro mayot; ok en mana gima ng’ato winjo e chunye; kendo ok en yie ayiea ni gimoro nitie. Bedo ng’at mayie mayot kuom gimoro maonge gimomiyo nyalo kelo hinyruok; chunywa bende siko lokore; kendo kodok korka Nyasaye, yie ayiea ok oromo nimar kata “jochiende bende yie, ka gikirni.”—Jak. 2:19.
5, 6. (a) Yiewa oriwo gik moko ariyo mage maok ne? (b) Yiewa onego obed motegno e okang’ mane? Chiw ranyisi.
5 Yie madier en gima tut. Ne kaka Muma lero gima yie en. (Som Jo Hibrania 11:1.) Paulo nowacho ni yie madier oriwo gik moko ariyo maok wanyal neno. Achiel kuomgi en gik ma nitie to “ok ne.” Wengewa ok nyal neno gik roho manie polo—kaka Jehova Nyasaye, Wuode, kata Pinyruodhe ma sani locho e polo. Mar ariyo, yie oriwo gik mwageno kata “mikiyo”—gin gik mapok otimore. Gie sani ok wanyal neno piny manyien ma Pinyruodh Nyasaye biro kelo. Be mano koro nyiso ni onge mise mar yie ma wan-go kuom gik ma kamago?
6 Ooyo ngang’! Paulo nolero ni yie madier nigi mise motegno. Kane owacho ni yie en “bedo gadiera,” e yo moro, nowacho ni yie en kaka “barup puodho.” Kuom ranyisi, par ane ni ng’ato dwaro miyi puodho. Onyalo miyi barup puodhono konyisi ni, “Ne, ma e puothi.” Kuom adier, ong’eyo ni ok inyal dak e kalatasno; tiend gima onyisi en ni baruano miyi ratiro chuth mar kawo puodhono owuon. E yo machalo kamano, gik ma wayie kuomgi gin adier e okang’ machalo mana ka gima waseyudogi.
7. Yie madier oriwo ang’o?
7 Omiyo, yie madier oriwo bedo gadier chuth kuom Jehova Nyasaye. Yie miyo waneno Jehova kaka Wuonwa ma jahera kendo miyo wabedo gadier ni gigo duto mosingo biro chopo kare. Kata kamano, mondo yie madier osiki, nyaka tege. Bende, nyaka nyis yie kuom tim, ka ok kamano to otho.—Jak. 2:26.
8. Ang’o momiyo yie en gima dwarore ahinya?
8 Ang’o momiyo yie dwarore ahinya? Paulo nonyiso maler gimomiyo. (Som Jo Hibrania 11:6.) Ok wanyal dhi ir Jehova kendo ok wanyal more ka waonge yie. Omiyo, nyaka wabed gi yie mondo wachop ting’ ma ne omiyo ochwewa ma en miyo Jehova, Wuonwa me polo duong’, kendo sudo machiegni kode.
9. Jehova osenyiso nade ni ong’eyo kaka yie en gima dwarore ahinya kuomwa?
9 Jehova ong’eyo ni dwarore ni wabed gi yie. Kuom mano, ochiwonwa ranyisi manyalo puonjowa kaka wanyalo tego kendo nyiso yie marwa. Nyasaye omiyo kanyakla mar Jokristo chwo matayo kendo maketo ranyisi maber mar yie. Onyisowa kama e Wachne: “Luwuru yie margi.” (Hib. 13:7) E wi mago, omiyowa ranyisi mamoko bende. Paulo nowuoyo kuom “oganda mang’ongo mar joneno” ma ne gin chwo gi mon machon ma noketonwa ranyisi mabeyo korka yie. (Hib. 12:1) Kata kamano, e bug Jo Hibrania sula mar 11, Paulo ne ok oketo kwan ji duto ma ne onyiso yie. Muma opong’ gi sigendni mag chwo gi mon, joma tindo kod joma dongo ma ne chalgi opogore opogore to nonyiso yie e ngimagi, kendo ranyisigi nyalo konyowa ahinya e kindegi ma yie tin ahinya e piny.
Ang’o Mwanyalo Timo Mondo Waluw Ranyisi mar Yie ma Jomoko Noketo?
10. Ere kaka puonjruok Muma ma marwa wawegi nyalo konyowa luwo ranyisi mag chwo gi mon moluoro Nyasaye mowuo kuomgi e Muma?
10 Mondo iluw ranyisi mar ng’ato, nyaka ikwong ine gik motimo. Sama isomo bugni, ibiro fwenyo ni osetim nonro mang’eny mondo okonyi ng’eyo maber chwo gi mon ma ne onyiso yie. In bende inyalo timo nonro momedore e wi jogi. Sama itimo puonjruok mari iwuon, non Muma matut kitiyo gi gige timo nonro ma in-go. Sama iparo matut kuom gik mipuonjori e wi sigand ng’ato e Muma, tem paro kama wechego ne timoree koda kaka ngima ng’atno ne chalo. Tem ka gima ineno gik ma ne oneno, iwinjo koko ma ne nitie, kata iwinjo suya ma ne nyalo betie. To moloyo, tem fwenyo kaka joma iwuoyo kuomgi ne winjo e chunygi. Kaka imedo ketori e chalgi, e kaka ibiro medo ng’eyo chwo gi mon-go, kendo moko kuomgi biro chalo mana ka gima ne gin osiepeni.
11, 12. (a) Ang’o minyalo timo mondo Abram gi Sarai obed osiepeni? (b) Ranyisi mag Hanna, Elija, kata Samuel nyalo konyi nade?
11 Kaka imedo ng’eyogi e kaka ibiro medo dwaro timo kaka ne gitimo. Kuom ranyisi, wawach ni riwruok mar Jehova omiyi migawo manyien mondo iti ne Nyasaye e okang’ momedore. Nyalo bedo ni onyisi ni idhi ilend e alwora ma jolendo dwaroree moloyo, kata okwayi ni ilend e yo mapok ing’iyogo kata maok in-go thuolo. Donge nyalo bedo maber ka iparo ranyisi mar Abram sama iparo kendo lemo e wi migawono? Abram kaachiel gi Sarai ne oyie weyo ngima mayom e piny Ur kendo Nyasaye ne ogwedhogi ahinya nikech mano. Kaka imedo luwo ranyisigi, e kaka ibiro medo ng’eyogi maber.
12 To nade ka ng’at migeno obedo mamon kodi kata onyisi achaye kendo mano nyoso chunyi mamiyo idwaro kata weyo dhi e chokruoge? Paro kaka Hanna ne ok oweyo tiyo ne Jehova nikech chuny marach ma ne Penina nyise, biro konyi dhi nyime tiyo ne Nyasaye kaka dwarore—kendo mano biro miyo Hanna obed kaka osiepni. Bende, kapo ni seche moko chunyi nyosore kiparo ni in ng’at manono, puonjruok e wi chal mar Elija koda kaka Jehova ne ohoye nyalo konyi. Rowere mayudo tembe mang’eny mawuok kuom joskul wetegi manyalo dwaro rwakogi e timbe mag terruok, nyalo puonjore kuom kaka Samuel notimo e kinde ma ne yawuot Eli timo gik maricho e hekalu.
13. Be luwo ranyisi mar ng’at miwuoyoe e Muma miyo ibedo ng’at maok ti gi pache owuon? Ler ane.
13 Be en adier ni luwo ranyisi mag joma iwuoyo kuomgi e Muma miyo ibedo mana ng’at maluwo aluwa ji kendo maok ti gi pache owuon? Mano ok adier! Ng’e ni Wach Jehova jiwowa mondo waluw ranyisi mag jogo ma ne onyiso yie. (1 Kor. 4:16; 11:1; 2 Thess. 3:7, 9) E wi mano, moko kuom joma wabiro puonjore kuomgi e bugni bende ne oluwo ranyisi mag joma ne onyiso yie ma ne odak motelonegi. Kuom ranyisi, e Sula mar 17 mar bugni, wayudo ni Maria nohulo achiel kachiel moko kuom weche ma ne Hanna owacho, ka Maria nyisogo ni Hanna noketone ranyisi maber. Be mano nyiso ni yie mar Maria ne yom yom? Ooyo! Kar mano, ranyisi mar Hanna nokonyo Maria oteg yie mare kendo olos nying maber gi Jehova Nyasaye.
14, 15. Gin weche mage mayudore e bugni, kendo wanyalo timo ang’o mondo bugni okonywa?
14 Ogo bugni mondo okonyi tego yie mari. Sula ma bugni wuoyoe ochok kowuok e wich mawacho ni “Luw Yie Margi” mosebedo ka yudore e Mnara wa Mlinzi e kind higni mag 2008 kod 2013. Kata kamano, nitie weche momedi. Sula ka sula nigi penjo manyalo konyowa wuoyo kendo tiyo gi gik ma wapuonjore. Nitie piche mang’eny manyien manie bugni kendo piche ma ne yudore chon e sulagi oket madongo kendo manenore maber moloyo. Gik mamoko makonyo e puonjruok kaka map koda kinde ma ne gik moko otimoree, bende omedi. Buk mar Luw Yie Margi olos mondo otigo e timo puonjruok mar ng’ato owuon, puonjruok mar joot, kata puonjruok e kanyakla. Joot moko bende biro bedo mamor somo sigendnigi gi dwol ka gin kamoro achiel.
15 Mad bugni konyi luwo yie mar jotich Jehova ma ne ochung’ motegno e kinde mokalo. Kendo mad bugni mi yie mari omed bedo motegno kaka imedo sudo machiegni gi Wuonwa me polo, Jehova!
