Ne onyuola e taon moro miluongo ni Mulhouse, e piny France kama joma omew e ma nodakie, kendo ne en gweng’ mong’ere nikech timbene mag mahundu. Kane pod atin, ne asiko aneno ka joot mang’eny e alworano gore. Mon ne ocha ahinya kendo chwo ne ok hiny penjo mon pachgi ka pok ging’ado wach moro. Ne opuonja ni mon gin joma onego obed e jokon ka gitedo ne chwogi kod nyithindgi.

Ne apon e ngima matek. Kane an ja higni apar, kong’o nonego babana. Higni abich bang’e, achiel kuom owetena ma dongo nodere. E higa achielno bende, naneno ka inego achiel kuom joodwa nikech ywaruok moro. Wachno nobuoga ahinya. Joodwa nopuonja kaka anyalo tiyo gi pala kod bunde samoro amora ma lweny otugore. Nachako goro piche e denda (tattoo) kendo madho kong’o nikech piny ne obaga.

Kane aromo higni 16, koro nanyalo madho chupni 10 kata 15 mag kong’o pile ka pile kendo mapiyo nachako tiyo gi yedhe mamero. Mondo ayud pesa mar nyiewo gigo, ne chuna ni aus chumbe moti kendo kwelo. Kapok naromo higni 17 noyudo asebilo ngima mar jela. E ngimana duto ne otweya nyadi 18 e jela nikech kuwo kod timbe mag mahundu.

Kane achako higni mag 20, timbena nomedo bedo maricho ahinya. Namadhoga njaga rolls 20 e odiechieng’ kendo natiyoga gi yedhe mamero kaka heroin kod mamoko ma chik sirkal okwero. Kinde mang’eny, nachiegni tho nikech madho yedhe ma merogo mokalo tong’. Nachako uso yedhe mamero omiyo ne ajamanora gi pala kod bunde. Nitie kinde moro ma ne atemo goyo ng’ato gi bunde, kata kamano gima ber en ni lisasi nogoyo mana wi msip ma ng’atno notweyo. Kane ajahigni 24, minwa notho kendo mano nomedo mirimba ahinya. Ji ne baronaga gi mabor ka ginena nikech ne giluora. Nikech nahero lweny ahinya, mano ne miyo kinde mang’eny e giko juma ne iteraga e jela kata e osiptal mondo otwang’a.

Kane ajahigni 28, ne akendo. To mana kaka asewacho nachayo chiega ahinya. Nayanyega kendo goye. Onge gima ne watimoga kanyachiel. Naparoga ni gimaduong’ monego atimne moloyo ne en mana kelone gik dusruok mokwal. Kae to gimoro notimore apoya. Jaoda nochako puonjore Muma gi Joneno mag Jehova. Bang’ puonjruok mare mokwongo noweyo madho ndawa, ne odagi  kawo pesa makwalo, kendo noduokona gige dusruok ma ne asemiye. Iya nowang’ ahinya. Nakwere ni kik opuonjre Muma, kendo sama namadho ndawa nafuong’oga iro e wang’e. Bende, nakethoga nyinge ahinya e alwora ma ne wadakieno.

Otieno moro achiel kane amer swaya, nawang’o odwa ma ne wadakie. Jaoda noresa kaachiel gi nyarwa ma jahigni abich kuom majno. Kane kong’o orumo e wang’a, nawinjo malit ahinya. E chunya ma iye, naparo ni Nyasaye ok nyal weyona richona. Nanyalo paro chieng’ moro ka padri moro wacho ni joma richo iwang’oga e mach ma nyaka chieng’. Kata mana laktar moro ma dhiedhoga tuwoche mag obwongo nonyisa niya: “In, kari oserumo chuth! Onge kaka inyalo konyi.”

Bang’ masira mar majno, ne wadar ma wadhi dak korgi chiega. Kane Joneno mag Jehova obiro puonjore gi jaoda, napenjogi niya, “Be Nyasaye nyalo weyona richona duto?” Ne gisomona Ndiko mar 1 Jo-Korintho 6:9-11. Ndikono wuoyo kuom timbe ma Nyasaye kwedo, kae to otieko niya: “To mano e kaka moko kuomu ne chal.” Wechego nokonya neno ni kare nanyalo loko kit ngimana. Kae to Jonenogo nosomona 1 Johana 4:8 mondo gikonya neno kaka Nyasaye ohera ahinya. Mbakano nojiwa ahinya mi akwayogi ni gibi diriyo e juma ka juma mondo gipuonja Muma, kendo nachako dhi e chokruogegi. Nasiko kasayo Jehova pile.

Bang’ dwe achiel, naweyo tiyo gi yedhe mamero kod kong’o. Mapiyo nono, nachako winjo ka denda chanda ahinya nikech weyo tiyo gi gigo! Nalekoga lek maricho, wiya ne baraga matek, kendo leche mag denda bende ne siko ka rama. Kata kamano, e kindego bende naneno kaka Jehova ne sira kendo miya teko. Nawinjo mana kaka jaote Paulo bende nowinjo. Kowuoyo e wi teko ma Nyasaye nomiye, jaoteno nowacho kama: “E weche duto, an gi nyalo kokalo kuom jalno ma miya teko.” (Jo-Filipi 4:13) Bang’ kinde moko, naweyo madho ndawa chuth.—2 Jo-Korintho 7:1.

Muma nokonya ahinya mondo adag e ngima maber, kendo puonj me iye nokonyowa kaka joot. Paro ma ne an-go kuom jaoda nolokore. Nachako miye luor, kendo tiyo gi weche kaka “asayi, kiyie” kod “erokamano ahinya.” Bende, nachako bedo wuoro maber ne nyara. Bang’ puonjora Muma kuom higa achiel, an bende nachiwo ngimana ne Jehova kendo nobatisa mana kaka jaoda noyudo osetimo.

An gadier ni puonj mag Muma e ma noresa. Kata mana wedena ma ok gin Joneno wachoga ni dine asetho chon nikech yedhe mamero kod lweny.

Puonj mag Muma ma wuoyo kuom migawo ma an-go kaka wi ot kendo wuoro osekonyo odwa ahinya. (Jo-Efeso 5:25; 6:4) Ne wachako timo gik moko kanyachiel kaka joot. Ndalogi kar weyo mondo jaoda oti mana e jokon, ariwega lwedo mondo ochop migawo ma en go kaka jaland injili ma tiyo ne Nyasaye gi thuolone duto. En bende omor konya chopo migepena kaka mar bedo jaduong’-kanyakla.

Hera kod ng’wono ma Jehova Nyasaye osenyisa, osekonya ahinya. Amorga ahinya sama anyiso joma onge geno moro amora e ngima kido mabeyo mag Nyasaye nikech an bende chon ne achal kamano. An gi adier ni Muma ni gi teko mar konyo ng’at ang’ata dak e ngima maler kendo maber. Muma osepuonja hero ji duto kendo miyogi luor, joma chwo kod mon, kendo Muma osepuonja kik achara.