1-2. Ang’o momiyo samoro wanyalo paro ni Jehova ok dwok lamowa?

 “YUD mor maduong’ kuom Jehova, to obiro miyi gik moko duto ma chunyi gombo.” (Zab. 37:4) To mano doko singo ma jaber! Kata kamano, be onego wagen ni Jehova biro miyowa gimoro amora ma wakwaye mana gikanyono? Ang’o momiyo seche moko wapenjorega penjono? Ne ane ranyisi ma luwogi: Nyaminwa moro ma pok okendi lamo Jehova ka okwaye mondo odhi e Skul mar Joland-Injili mar Pinyruoth. Kata kamano, higni mang’eny kalo ka pok ogwele e skundno. Owadwa moro ma rawera ma tuore, kwayo Jehova ni ochange mondo otim momedore e kanyakla. Kata kamano, tuoneno medore ameda. Jonyuol moko ma Jokristo kwayo Jehova mondo okony nyathigi osik e adiera. Kata kamano, nyathigino weyo tiyo ne Jehova.

² Nyalo bedo ni in bende isekwayo Jehova mondo omiyi gimoro to pok omiyigo. Mano nyalo miyo ipar ni Jehova dwokoga mana lamo mag jomamoko, to ok magi. Kata, inyalo chako paro ni nitie gimoro marach ma nyaka bed ni isetimo. Mano e kaka nyaminwa moro miluongo ni Janice b nowinjo. En gi jaode ne gisebedo ka ginyiso Jehova gombogi mar dhi tiyo e Bethel. Owacho kama: “Ne an gadier ni ne idhi gwelwa mapiyo e Bethel.” Higni mang’eny nokalo ka pok ogwelgi. Janice wacho kama: “Nakuyo kendo nakia gima nonego atim. Nachako paro ni nyaka bed ni nasechwanyo Jehova e yo moro, nikech naselamo Jehova ka anyise achiel kachiel gima nadwaro. Nawuoro gimomiyo pok nodwoko lamoga!”

3. Ang’o ma wabiro nono e sulani?

 ³ Nitie sama wanyalo chako penjore ka be Jehova winjo lamowa. Mano wach ma nochando kata mana jotich Jehova machon. (Ayub 30:20; Zab. 22:2; Hab. 1:2) Ang’o ma nyalo konyi bedo gadier ni Jehova biro dwoko lamogi? (Zab. 65:2) Mondo wayudo dwoko mar penjono, biro dwarore ni wanon penjogi: (1) Ang’o monego wagen ni Jehova biro timonwa? (2) Ang’o ma Jehova dwaro ni watim? (3) Ang’o momiyo nyalo dwarore ni walok moko kuom gik ma wakwayo?

4. Ka luwore gi Jeremia 29:12, ang’o ma Jehova singo ni obiro timo?

⁴ Jehova singo ni obiro winjo lamowa. (Som Jeremia 29:12.) Nyasachwa ohero jotichne ahinya, omiyo, kinde duto obiro winjo lamogi. (Zab. 10:17; 37:28) Kata kamano, mano ok nyis ni obiro miyowa gimoro amora ma wakwaye. Nyalo dwarore ni warit nyaka e piny manyien mondo e ka wayud moko kuom gik ma wasebedo ka wakwaye.

5. Ang’o ma Jehova nonoga ka pok odwoko lamowa? Ler ane.

⁵ Jehova nonoga kaka kwayo magwa otudore gi dwache maduong’. (Isa. 55:8, 9) Achiel kuom gik modwaro en ni piny opong’ gi dhano ma tiyone ka gimor e bwo lochne. Kata kamano, Satan to oramo ni dhano nyalo bedo mamor ka gibedo gi lochgi giwegi. (Cha. 3:1-5) Mondo Jehova onyis ni Jachien riambo, oseweyo mondo dhano oloch e wigi giwegi. Kata kamano, loch dhano osemedo mana chandruoge e kindegi. (Ekl. 8:9) Wang’eyo ni gie sani Jehova ok bi golo chandruoge ma waromogo. Ka po ni onyalo timo mano, jomoko nyalo paro ni loch dhano ni kare, kendo ni dhano nyalo tieko chandruogegi giwegi.

6. Ang’o momiyo dwarore ni wabed gadier ni kinde duto Jehova timoga giko moko e yor hera kendo e yo makare?

⁶ Jehova nyalo dwoko kwayo machalre e yore mopogore. Kuom ranyisi, ka ne Ruoth Hezekia tuo ahinya, nokwayo Jehova mondo ochange. Jehova nodwoko kwayono, mochange. (2 Ru. 20:1-6) To komachielo, ka ne jaote Paulo okwayo Jehova mondo ogolne ‘kudho moro ma ne chwoyo ringrene,’ ma nyalo bedo ni ne en tuo moro, Jehova ne ok otimo kamano. (2 Kor. 12:7-9) Ne ane bende ranyisi mar jaote Jakobo kod Petro. Ruoth Herode ne chano negogi giduto. Kanyakla nolamo ne Petro, kendo nenore ni ne gilamo ne Jakobo bende. Kata kamano, Jakobo nonegi, to Petro nogony e yor hono. (Tich 12:1-11) Wanyalo penjore niya: ‘Ang’o momiyo Jehova noreso Petro, to Jakobo noweyo mondo onegi?’ Muma ok wachnwa. c Gima wanyalo bedogo gadier en ni yore mag Jehova “duto ni kare.” (Rap. 32:4) Bende, wang’eyo ni Petro gi Jakobo ne gin jotich Jehova ma noyiego. (Fwe. 21:14) Nitie sama Jehova nyalo dwoko lamowa e yo ma ne ok wapar. Kata kamano, nikech wan gadier ni Jehova en Nyasaye ma jahera kendo makare, ok wabedga gi kiawa gi yo moro amora modwokogo lamowa.—Ayub 33:13.

7. Ang’o monego watang’go, to nikech ang’o?

⁷ Watemoga matek mondo kik wapimre  gi jomamoko. Kuom ranyisi, wanyalo kwayo Jehova mondo okonywa e yo moro sie, kata kamano, ok otimnwa kaka wakwayeno. Bang’e, wanyalo fwenyo ni nitie ng’at machielo ma nokwayo Jehova wach achiel achielno to Jehova nodwoko lamone. Mano e gima notimore ne nyaminwa moro miluongo ni Anna. Nokwayo Jehova mondo ochang Matthew jaode ma ne nigi tuo mar kansa. Gie kindeno, nyimine moko ariyo ma hikgi oniang’ bende ne nigi tuo mar kansa. Anna nolemo gi kinda ne Matthew kod ne nyiminego. Matthew notho, to nyiminego nochango. Mokwongo okwongo, Anna ne paroga ni nyiminego nochango nikech Jehova nokonyogi. Ka en kamano, ang’o momiyo en to Jehova ne ok ochango jaode? Kuom adier, ok wanyal ng’eyo kaka nyiminego nochango. Gima wang’eyo en ni gikone, Jehova biro tieko chandruoge duto ma waromogo chuth, kendo ogombo chiero osiepene mosetho.—Ayub 14:15.

8. (a) Ka luwore gi Isaya 43:2, ere kaka Jehova sirowaga? (b) Ere kaka lamo nyalo konyowa sama wakalo e chandruoge madongo? (Ne vidio ma wiye wacho ni Lamo Konyowa Nano.)

⁸ Jehova biro sirowa kinde duto. Nikech Jehova en Wuoro ma jahera, ok omorga sama wachandore. (Isa. 63:9) Kata kamano, ok ogeng’nwaga chandruoge ma waromogo, minyalo pim gi aoche kod mach. (Som Isaya 43:2.) Osingo ni obiro bedo kodwa sama ‘wakalo’ e chandruogego. Bende, ok obi weyo mondo chandruogewa omonwa dhi nyime lame. Omiyowaga rohone maler mondo okonywa nano. (Luka 11:13; Fil. 4:13) Kuom mano, wanyalo bedo gadier ni kinde duto obiro miyowa gimoro amora ma wadwaro mondo okonywa nano kendo siko ka wamakore kode. d

9. Ka luwore gi Jakobo 1:6, 7, ang’o momiyo dwarore ni wabed gadier ni Jehova biro konyowa?

⁹ Jehova dwaro ni wagen kuome. (Hib. 11:6) Nitie sama chandruogewa nyalo chalo gi gode madongo ma ok wanyal twenyo. Wanyalo kata chako bedo gi kiawa ka be Jehova biro konyowa. Kata kamano, Muma nyisowa ni teko mar Nyasaye nyalo miyo ‘wakal ohinga.’ (Zab. 18:29) Omiyo, kar chako bedo gi kiawa, onego wakwa Jehova mondo omiwa yie, kendo wagen ni obiro dwoko lamowa.—Som Jakobo 1:6, 7.

10. Ler ane kaka wanyalo timo ka luwore gi lamowa.

¹⁰ Jehova dwaro ni watim ka luwore gi lamowa. Kuom ranyisi, owadwa moro nyalo kwayo Jehova mondo jatende omiye rusa mar dhi e chokruok maduong’. Ere kaka Jehova nyalo dwoko kwayono? Onyalo miyo owadwano chir mar dhi wuoyo gi jatende. Mano nyiso ni owadwano nyaka kaw okang’ mar wuoyo gi jatende, kendo nyalo dwarore ni otim kamano nyadinwoya. Samoro nyalo chune ni owil odiechienge mobiro dhi e chokruogno gi jatich wadgi machielo, kata nyalo chune mondo oyie osache mag odiechiengego odhi adhiya kamano.

11. Ang’o momiyo onego walam nyadinwoya e wi chandruogewa?

¹¹ Jehova dwaro ni walam nyading’eny e wi gik ma chandowa. (1 The. 5:17)  Yesu notiyo gi weche ma nyiso ni moko kuom kwayowa ok bi dwok gi kanyono. (Luka 11:9) Omiyo, kik chunyi jog! Lem gi kinda kendo nyadinwoya. (Luka 18:1-7) Sama walemo nyadinwoya e wach moro, wanyiso Jehova ni wadich ahinya gi gima wakwayeno. Bende, wanyiso ni wan gi yie ni en gi teko mar konyowa.

12. (a) En penjo mane monego wapenjre e wi kwayowa, to nikech ang’o? (b) Ere kaka wanyalo ng’eyo ni lamowa miyo Jehova luor? (Ne sanduk ma wiye wacho ni, “ Be Kwayoga Nyiso ni Amiyo Jehova Luor?”)

¹² Ka po ni ok omiwa gimoro ma wakwayo e lamo, wanyalo penjore penjo moko adek. Mokwongo, ‘Be akwayo gima owinjore?’ Thothne, waparoga ni wan e ma wang’eyo maber gima nyalo konyowa. Kata kamano, moko kuom gik ma wakwayoga e lamo, samoro ok bi konyowa ahinya. Ka po ni wan gi chandruok moro, nyalo bedo ni nitie yo maber ahinya ma Jehova nyalo konyowago moloyo ma wakwayono. Bende, moko kuom gik ma wakwayo nyalo bedo ni ok winjre gi dwach Jehova. (1 Joh. 5:14) Par ane kendo ranyisi mar jonyuol ma Jokristo ma ne wasewuoye motelo. Ne gikwayo Jehova mondo okony nyathigi osik e adiera. Mano nyalo nenore ka kwayo mowinjore. Kata kamano, Jehova ok nyal chuno ng’ato ang’ata kuomwa mondo otine. Odwaro ni ng’ato ka ng’ato oyier tiyone, moriwo nyaka nyithindwa. (Rap. 10:12, 13; 30:19, 20) Omiyo, nyalo bedo maber ka jonyuolgo okwayo Jehova mondo okonygi chopo e chuny nyathigi mondo gikonye oher Jehova kendo obed osiepne.—Nge. 22:6; Efe. 6:4.

13. Ka luwore gi Jo-Hibrania 4:16, Jehova konyowaga e kinde mage? Ler ane.

 ¹³ Penjo mar ariyo ma wanyalo penjore en ni, ‘Be en kinde mowinjore mondo Jehova odwokie lamona?’ Wanyalo dwaro ni Jehova odwok lamowa mapiyo. Kata kamano, Jehova e mong’eyo kinde mowinjore mar dwokowa. (Som Jo-Hibrania 4:16.) Sama ok odwoko lamowa gikanyono, wanyalo chako paro ni dwoko mare en ‘Ooyo.’ Kata kamano, nyalo bedo ni dwoko mare en, ‘Rit matin.’ Par ane kendo ranyisi mar owadwa ma rawera ma nokwayo mondo Jehova ochange. Ka po ni Jehova ne nyalo change e yor hono, Satan ne nyalo wacho ni owadwano dhi nyime tiyo ne Jehova nikech nochange. (Ayub 1:9-11; 2:4) E wi mano, Jehova oseketo kinde mobiro tiekoe tuoche duto. (Isa. 33:24; Fwe. 21:3, 4) Ka pok kindeno ochopo, ok onego wapar ni gie sani obiro changowa e yor hono. Kuom mano, owadwano nyalo kwayo Jehova mondo omiye teko kod chuny mokuwe mondo odhi nyime nano kendo makore kode.—Zab. 29:11.

14. Ang’o mipuonjori e ranyisi mar Janice?

¹⁴ Par ane kendo ranyisi mar Janice, ma nokwayo Jehova mondo odhi oti e Bethel. Higni abich nokalo ka pok nofwenyo kaka Jehova nodwoko lamone. Owacho kama: “Jehova notiyo gi kindego e puonja kendo konya bedo gi kido mamoko ma naongego. Ne dwarore ni amed gene ahinya, atim dongruok e yo ma natimogo puonjruok, kendo abed gi mor madier ma ok otenre kuom chal ma ng’ato kaloe.” Bang’e, nomi jaod Janice migawo mar bedo jarit-alwora, kendo Janice ne mor ahinya riwo jaode lwedo e migawono. Janice wacho kama koparo  chien: “Jehova nodwoko lamona, to ok e yo ma naparo. Nokawa kinde mondo ane kaka Jehova nodwoko lamona e yo maber. Kata kamano, amor ahinya ni aseneno kaka ohera kod kaka ong’won koda.”

15. Ang’o momiyo seche moko ber nono dwach Jehova sama walemo? (Ne pichni bende.)

¹⁵ Penjo mar adek ma wanyalo penjore en mae, ‘Dibed ni dwarore ni akwa gima opogore?’ Kata obedo ni dwarore ni wakwa gik moko sie sama walamo, nyalo dwarore bende ni wanon dwach Jehova ka luwore gi kwayowa. Par ane kendo ranyisi mar nyaminwa ma pok okendi mosebedo ka kwayo Jehova mondo odhi e Skul mar Joland-Injili mar Pinyruoth. Odwaro dhi e skundno mondo odhi olend kama jolendo dwaroree ahinya. Omiyo, sama onyiso Jehova e lamo kaka doher dhi e skundno, onyalo kwaye bende mondo okonye fwenyo yore mamoko monyalo tiyonego e yo momedore. (Tich 16:9, 10) Kae to onyalo timo ka luwore gi lamoge kuom penjo jarit-alworagi ka po ni nitie kanyakla man machiegni ma nigi jopainia matin, kata onyalo ndiko ne ofis mondo openj ka nitie alwora moro monyalo dhi lendoe ma jolendo dwaroree moloyo. e

16. Ang’o ma wanyalo bedogo gadier?

¹⁶ Mana kaka wasepuonjore, wanyalo bedo gadier ni Jehova biro konyowa nikech en jahera kendo yorene ni kare. (Zab. 4:3; Isa. 30:18) Nitie sama onyalo dwoko lamowa e yo ma ok wapar. Kata kamano, kinde duto, Jehova biro dwoko lamowa. Oherowa ahinya. Ok onyal jwang’owa. (Zab. 9:10) Omiyo, dhi nyime ‘geno Nyasaye kinde duto,’ ka iolone weche duto manie chunyi e lamo.—Zab. 62:8.