STEFANO ne ochung’ e nyim chwo mager ahinya e buch Sanhedrin. Sanhedrin e ma ne en kot maduong’ mogik e piny Israel, omiyo, jong’ad-bura 71 ma ne tiyo kanyo e ma ne omi teko mang’eny moloyo ji te e Israel. Kayafa jadolo maduong’ ma ne otelo ne joma ne ochano nek Yesu dweche moko matin motelo e ma noluongo burano. (Mat. 26:57, 59; Tich 6:8-12) Sama ne gidhi nyime luongo joneno mag miriambo, moro bang’ machielo, nitie gima nomako dhogi kuom Stefano. Ne gineno ka “lela wang’e chal gi mar malaika.”​—Tich 6:13-15.

Ere kaka Stefano ne nyalo bedo gi chuny mokue e nyim chwo magergo? Ka ne pok otere e nyim Sanhedrin, Stefano ne odich e tij yalo kitaye gi teko mar roho maler. (Tich 6:3-7) Sama ne iteme e nyim Sanhedrin, rohono e ma ne hoyo chunye kendo konye paro weche moko. (Joh. 14:16) Sama Stefano ne chiwo neno gi chir kaka oler e bug Tich Joote sula mar 7, roho maler noparone weche 20 gi dire ma yudore e Ndiko mag Dho-Hibrania. (Joh. 14:26) Yie mar Stefano nomedo bedo motegno ka noneno Yesu e fweny kochung’ e bad Nyasaye korachwich.​—Tich 7:54-56, 59, 60.

Samoro biro chopo kama wan be isandowa mager kendo ibwogowa gi tho. (Joh. 15:20) Ka wadhi nyime somo Wach Nyasaye pile pile kendo bedo modich e tij lendo, roho mar Jehova biro konyowa. Rohono biro miyowa teko mar chung’ motegno kendo siko gi chuny mokue sama ikwedowa.​—1 Pet. 4:12-14.