Tuoche mag Paro Okwako Piny Ngima
“Kinde duto, abedoga gi parruok kata ka an e ot kar kenda.”
“Sama awinjo ka amor ahinya, luoro moro jamaka nikech ang’eyo ni gima biro luwo mano en parruok ma biro nyoso chunya ahinya.”
“Atemoga matek mondo kik aparra ahinya, kata kamano, apoga mana ka parruok osebemba.”
Be isegakalo e weche kaka mago? Be nyalo bedo ni osiepni kata watni moro nyagore gi pek kaka mago?
Bed gadier ni ok in kendi. Ji mang’eny e kindewagi nyagore gi tuoche mag paro. Nyalo bedo ni in iwuon inyagori gi tuoche ma kamago, kata watni moro e ma nyagore gi tuochego.
Onge kiawa ni wadak e “kinde matek ahinya” mopong’ gi chandruoge. (2 Timotheo 3:1) Nonro moro ma notim nyiso ni e piny ngima, ng’ato achiel e kind ji aboro nyagore gi tuo mar paro. E higa mar 2020, tuo mar korona nomiyo joma nigi parruok omedore gi pasent ma hawo 26, to joma nigi tuoche madongo ma parruok keloga nomedore gi pasent 28.
Kata obedo ni ng’eyo kwan mag joma nigi tuo mar paro en gima duong’, gima dwarore moloyo en ng’eyo ka be wan kata wedewa nigi paro mangima.
Bedo gi paro mangima tiende en ang’o?
Ng’ama pache ngima en ng’ama pache liw kendo ma timo gik moko e yo malong’o. Sama pachwa ngima, mano nyalo miyo wanyagre maber gi pek mag ngima, watim tijewa e yo maber, kendo wabed mamor.
Adiera e wi tuoche mag paro
-
OK kelgiga gi nyawo moro ma ng’ato nigo.
-
GIN tuoche ma keloga ne ng’ato chandruoge mang’eny ahinya kendo gichocho yo ma ng’ato parogo, kaka owinjo e chunye, kod timbene.
-
Ginyalo miyo ng’ato kik bed gi winjruok maber gi ji, kata kik otim tijene e yo maber kaka nojatimo chon.
-
Ginyalo mako joma dongo gi joma tindo, bed ni gia e oganda mane, giwacho dhok mane, gin e din mane, gisomo kata ok gisomo, gidhier kata gimewo.
Konyo joma nigi tuoche mag paro
Ka po ni ifwenyo ni nitie lokruoge moko e timbeni, ok inind maber, ok ichiem maber, iparori ahinya, kendo in gi kuyo ma ok rum, nyalo dwarore ni imany kony mondo ing’e gimomiyo gik ma kamago timoreni kendo iyud thieth ma dwarore. Mano bende e gima onego itim sama ifwenyo ni watni kata osiepni moro nigi lokruoge ma kamago. To ere kama inyalo yudoe kony?
Yesu Kristo, ma e ng’at mariek moloyo mosegadak e piny kae nowacho kama: “Jo mangima ok dwar laktar, to jo matuo e ma dwaro.” (Mathayo 9:12) Jogo ma nyagore gi tuoche mag paro kendo ma yudo thieth mowinjore nyalo dwoko tuochegigo piny, to mano nyalo konyogi dak e ngima maber. En gima nyiso rieko ka gimanyo thieth mapiyo sama gifwenyo ni nitie gimoro ma timore e ngimagi ma hinyogi kendo ma kawo kinde malach. a
Kata obedo ni Muma ok en bug thieth, en gi puonj ma nyalo konyo joma nyagore gi tuoche mag paro. Wakwayi ni inon sula duto ma luwo mondo ine kaka Muma nyalo konyowa nyagore gi tuoche mag paro.
a Gaset mar Ohinga mar Jarito ok pwodh kit thieth moro sie. Ng’ato ka ng’ato onego otim nonro e wi thieth modwaro luwo ka pok otimo yiero.
Samoro Inyalo Hero Magi Bende
DWOKO PENJO MA JI NIGO E WI MUMA
Be Muma Nyalo Konya Sama Chunya Onyosore?
Nitie gik moko adek ma Nyasaye miyowa mondo okonywa sama chunywa onyosore.
ESSENTIAL BIBLE TEACHINGS
Ang’o Momiyo Nyasaye Oweyo Chandruok Mondo Obedie?
Ng’eny ji penjo gimomiyo piny opong’ gi sigu kod chandruok. Muma chiwo dwoko makare kendo ma hoyo chunywa.
SIKURU KA UNENO!
Tuoche mag Paro Mosebedo ka Medore Kuom Rowere—Ang’o ma Muma Wacho?
Muma chiwo puonj ma nyalo konyo rowere ma nyagore gi tuoche mag paro.
WECHE E WIWA
Kwa Mondo Opuonji Muma Nono ma Onge Chudo
Yud puonjruok Muma ma onge chudo e sa mowinjore kodi kendo e kama ihero.
