JALAND-INJILI en ng’at malando wach maber. Jehova Nyasaye e Jaland-Injili mokwongo kendo maduong’ie moloyo. Mapiyo bang’ kane jonyuolwa mokwongo oseng’anyo, Jehova nolando wach maber ni thuol ma en Satan Jachien, ibiro kethi. (Chak. 3:​15) Kuom higini mang’eny mosekalo, Jehova notayo chwo moko ma nomiye luor mondo ondik weche mathoth kuom kaka ibiro ket nyinge obed maler, kaka ibiro tiek gik maricho duto ma Satan osekelo, kendo kaka dhano biro yudo ngima ma Adam gi Hawa nolalo.

² Malaike bende gin joland-injili. Gin giwegi gilando injili kendo gikonyo jomoko mondo oland wach maber. (Luka 1:​19; 2:​10; Tich 8:⁠26, 27, 35; Fwe. 14:6) To nade Mikael malaika maduong’? Kane en e piny kaka dhano, noketo ranyisi maber ne joland injili. Gima Yesu nokawo maduong’ e ngimane ne en lando wach maber.​​—⁠Luka 4:​16-​21.

³ Yesu nochiko jopuonjrene mondo obed joland-injili. (Math. 28:⁠19, 20; Tich 1:8) Jaote Paulo nojiwo Timotheo jatich wadgi kama: “Ti tich mar lando Wach Maber, [“injili,” NW] kendo chop tich duto ma omiyi.” (2 Tim. 4:5) Ka wan kaka jolup Yesu, en wach mane maber ma walando? Wanyiso ji ni Jehova Wuonwa manie polo oherowa. (Joh. 3:​16; 1 Pet. 5:7) Yo maduong’ ma Jehova Nyasaye nyisogo ni ohero dhano en kokalo kuom Pinyruodhe. Kuom mano, wamor lando ne ji ni jogo duto maluwo chike mag Pinyruodhno, mawinjo Nyasaye kendo  matimo gik makare, nyalo bedo gi winjruok maber kode ma gibed osiepene. (Zab. 15:​1, 2) Jehova dwaro tieko chandruok duto mosebetie nikech timbe maok kare. Obiro golo lit duto ma dhano osekale kuom ngimagi duto. To mano doko wach maber! (Isa. 65:17) Nikech wan joland-injili, we wanon ane dwoko mag penjo ariyo madongogi: Ang’o momiyo dwarore ahinya ni ji owinj wach maber ndalogi? To ere kaka wanyalo chopo migawo marwa mar lando injili e yo makare?

⁴ Kaw ane ni ng’ato wachoni ni wuonu noringo moweyou kaachiel gi joodu. Ng’atno wachoni ni wuonu ok dwar kata neni kendo ni nitie weche moko ma nopando mondo kik ing’e, kendo ni wuonu en ng’at mager. Jomoko to wachoni ni wuonu nosetho omiyo onge tiende mondo itudri kode. Kamano bende, ji mang’eny osenyis weche kaka mago e wi Nyasaye. Ipuonjogi ni Nyasaye en midhiero, ni en ng’at ma ng’eyo kore tek, kata ni en ng’at mager. Kuom ranyisi, jotend dinde moko puonjo ni Nyasaye biro kumo joma richo e mach manyaka chieng’. Jomoko wacho ni Nyasaye ema kelo masiche mamiyo ji chandore e piny. Kata obedo ni masichego nego joma richo kaachiel gi joma beyo, pod giwacho ni masichego gin kum mawuok kuom Nyasaye.

⁵ Jomoko to wacho ni Nyasaye onge kendo ni dhano nosieko kowuok kuom le. Jogo moyie kuom puonj mar ni gik moko nosieko kendgi wacho ni Jachwech onge kendo ni gik moko ne ok ochwe. Jomoko to wacho ni bedo ni dhano nowuok kuom le, mano emomiyo seche moko dhano nyalo bedo mawuor kata mager kaka le. Giwacho ni onge rach ka joma nigi nyalo dhi nyime himo joma onge gi nyalo nikech mano en kido ma nochakore chon kendo pod biro medo dhi nyime. Omiyo jogo moketo geno margi kuom puonjno onge gi geno moro amora mar kinde mabiro.

⁶ Puonj mar ni gik moko nosieko kendgi, koda puonj mag dinde mag miriambo, e moko kuom gik mosekelo ne dhano chandruok e ndalogi mag giko. (Rumi 1:​28-​31; 2 Tim. 3:​1-5) Puonjgo ok nyal luong ni wach maber nikech giwuok kuom dhano. Kar mano, mana kaka jaote Paulo nowacho, gisemiyo dhano obedo ‘gi paro motimo mudho, kendo gipogore ae ngima mar Nyasaye.’ (Efe. 4:​17-​19) E wi mano, puonj mar ni gik moko nosieko kendgi kod puonj mamoko mag miriambo osemono ji rwako wach maber mawuok kuom Nyasaye.​​—⁠Som Jo Efeso 2:​11-​13.

⁷ Mondo ji obed gi winjruok maber gi Nyasaye, nyaka gikwong gibed gadier ni Jehova nitie, kendo ni nitie gimomiyo dwarore gisud machiegni kode. Wanyalo konyogi mondo gipuonjre mang’eny e wi Nyasaye kuom jiwogi mondo ginon chwech e yo matut. Sama ji puonjore e wi chwech ka gin gi paro makare, ging’eyo rieko kaachiel gi teko ma Nyasaye nigo. (Rumi 1:⁠19, 20) Ere kaka wanyalo konyo ji mondo ong’e ni gimoro amora ma Nyasaye nochweyo ber miwuoro? Wanyalo tiyo gi brosua ariyo miluongo ni, Uhai​​—⁠Ulitokana na Muumba? kod Maswali Matano Muhimu Kuhusu Chanzo cha Uhai. Kata kamano nitie penjo moko ma ng’ato ok nyal dwoko mana kong’iyo chwech kende. Kuom ranyisi, ng’ato ok nyal ng’eyo dwaro mar Nyasaye ne piny, gimomiyo pod oweyo  chandruok mondo obedie, koda kabe Nyasaye dewowa ng’ato ka ng’ato.

⁸ Yo achiel kende ma ji nyalo ng’eyogo wach maber e wi Nyasaye kod dwache, en kuom puonjruok Muma. Wan gi thuolo makende mar konyo ji opuonjre wach maber! Kata kamano, mondo wamul chuny ji, ok onego wapuonjgi mana adiera mag Muma kende, to onego wakonygi giwinj tiend puonjgo. (2 Tim. 3:​14) Wanyalo timo kamano kuom luwo ranyisi mar Yesu. Ang’o momiyo weche Yesu ne chopo e chuny jowinjo? Mokwongo en nikech ne otiyo gi penjo e yo maber chuth. Wanyalo luwo nade ranyisi mare?

⁹ Mana kaka Yesu, ang’o momiyo wan bende onego wati gi penjo sama walando wach maber? Kaw ane ni laktar moro wachoni ni en gi wach moro maber modwaro nyisi. Owacho ni onyalo thiedho tuwo machandi, to mana ka otimoni yeng’o. Samoro inyalo yie gi wechenego. To nade kapo ni odwaro teri e yeng’o to pok openji gima tuwoyi? Donge inyalo chako chich kode. Kata bed ni en laktar molony ahinya e weche mag thieth, pod dwarore ni openji gima tuwoyi, kendo ochik ite malong’o ne gima iwacho kapok ochiwo kony moro amora. E yo machalo kamano, kapo ni wadwaro konyo ji orwak wach maber mar Pinyruoth, nyaka wati gi penjo e yo molony. Wabiro miyogi kony e yo makare chuth mana ka waseng’eyo gima dwarore mondo gibed gi winjruok maber gi Nyasaye.

¹⁰ Yesu nong’eyo ni tiyo gi penjo e yo maber, konyo japuonj mondo ong’e japuonjrene e yo maber, kendo mano miyo japuonjrene ochiw pache sama gipuonjore. Kuom ranyisi, kane Yesu dwaro puonjo jopuonjrene obed joma bolore, ne okwongo openjogi penjo moro ma ne dhi miyo gipar matut. (Mari. 9:​33) Mondo okony Petro ong’e tiyo gi puonj mag Muma, Yesu nopenje penjo moro ma nigi dwoko ariyo mondo Petro ema oyier dwoko. (Math. 17:⁠24-​26) Kinde machielo bende, kane Yesu dwaro ng’eyo gima ne nie chuny jopuonjrene, nopenjogi penjo moko ma ne dhi miyo ng’ato ka ng’ato ochiw pache. (Som Mathayo 16:⁠13-​17.) Yesu ne ok nyis ji mana gima onego gitim. Kaluwore gi kaka ne otiyo gi penjo, nojiwo ji mondo orwak wach maber kendo gitim lokruok e ngimagi.

¹¹ Sama waluwo ranyisi mar Yesu kuom tiyo gi penjo e yo molony, wachopo gik moko adek. Wafwenyo yo maber mar konyo ji, wang’eyo kaka wanyalo konyo joma ok dwar ni walendnegi, kendo wapuonjo joma obolore ong’e kaka wach maber nyalo konyogi. Ne ane ranyisi adek manyiso kaka wanyalo tiyo gi penjo e yo makare.

¹² Ranyisi Mokwongo: Inyalo timo nade ka nyathini ma rawera oluor wuoyo gi joklas wetene e wi chwech? Inyalo konye nade mondo obed gi chir mar lendonegi? Kar jare kata nyise mana gima onego odhi owach, inyalo penje penjo moko mondo okonye ochiw paro mana kaka Yesu dotimo. Inyalo timo mano nade?

 ¹³ Som gi nyathini weche moko mayudore e brosua miluongo ni Maswali Matano Muhimu Kuhusu Chanzo cha Uhai. Bang’ nono penjo abich mayudore e brosuano, inyalo penjo nyathini ni kuom penjo abichgo, mane ma more moloyo. Jiwe mondo owach gik mamoko momiyo oyie ni nitie Jachwech kod gimomiyo odwaro tiyo ne Nyasaye. (Rumi 12:2) We nyathini ong’e ni dwoko mobiro chiwo ok ochuno ni nyaka chalre ndi gi mari.

¹⁴ Ler ne nyathini ni sama owuoyo gi nyathi wadgi, onyalo luwo kaka inyise. Mano tiende ni, onyalo tiyo gi paro moko ma ne imiye, kae to openj nyathi wadgino paro ma en-go. Kuom ranyisi, onyalo kwayo nyathino mondo osom weche manie sanduk e ite mar 17 e brosua mar Uhai​​—⁠Ulitokana na Muumba? Onyalo penjo nyathino niya, “Iparo ni rieko ma oguyo nigo mar fuyo kendo ng’eyo kama odhiye ni malo moloyo mar ndege?” Nyathino nyalo yie. Kae to nyathini nyalo penje kendo niya, “Ka ndege ma dhano oloso ok nyal loyo oguyo gi rieko, be en adier ni oguyo ne obiro kende maok ochweye?” Mondo ikony nyathini omed lony kendo obed gi chir mar wuoyo gi ji kuom yie mare, ber ka kinde ka kinde utimo kode ranyisi. Ka itiego nyathini mondo oti gi penjo e yo maber chuth, ibiro konye mondo ochop migape mar bedo jaland-injili.

¹⁵ Ranyisi mar Ariyo: Sama wan e tijwa mar lendo, wanyalo romo gi ng’at mawacho ni en ok oyie ni Nyasaye nitie. Pod wanyalo temo konye mondo ong’e ni Nyasaye nitie. Wanyalo penje e yo mamuol ni osebedo gi parono kuom kinde malach maromo nade, kendo penje gimomiyo ok oyie ni Nyasaye nitie. Bang’ winjo dwoko mare, wanyalo yie ni nyaka bed ni oseparo matut  ahinya kuom wachno. Kae to wanyalo penje kapo ni onyalo yie somo brosua manyiso ayanga ni gik moko ne ochwe. Kapo ni oyie, wanyalo miye brosua mar Uhai​​—⁠Ulitokana na Muumba? kata Maswali Matano Muhimu Kuhusu Chanzo cha Uhai. Sama watiyo gi penjo e yo mariek, kendo e yo mang’won, wanyalo chopo e chuny ng’ato gi wach maber.

¹⁶ Ranyisi mar Adek: Sama watayo puonjruok mar Muma, ang’o manyalo timore ka japuonjre chiwo dwoko kosomo mana weche mondiki e bug puonjruok? Samoro ok obi timo dongruok maber e adiera. Nikech ang’o? Nikech japuonjre machiwo dwoko kasomo mana weche mondik e paragraf maok oparo matut kuomgi, chalo gi yien ma tiendene ok oringo matut e lowo. Nyalo bedo matek ne japuonjre machalo kamano mondo ochung’ motegno e kinde moromoe gi akwede mager. (Math. 13:⁠20, 21) Mondo wakonye, dwarore wapenje kaka owinjo e chunye kuom gik ma opuonjore. Tem nono kabe oyie gi gik mopuonjore, koda gimomiyo owacho kamano. Kae to konye one gima Ndiko wacho e wi wachno mondo omi obed gi yie mosir gi Muma. (Hib. 5:​14) Ka watiyo gi penjo e yo maber, jopuonjre magwa biro bedo motegno e adiera, kendo chung’ motegno sama jomoko kwedogi kata temo wuondogi. (Kol. 2:​6-8) Ang’o kendo mwanyalo timo mondo wachop migawowa kaka joland-injili?

¹⁷ Yesu nooro jopuonjrene odhi olend ka gin ji ariyo ariyo. (Mari. 6:7; Luka 10:1) Bang’e jaote Paulo nowuoyo kuom ‘jotich wetene ma notiyo kode matek e tich mar lando wach maber.’ (Fili. 4:3) Kaluwore gi Ndiko ma onyis malogo, ka nochopo higa 1953, joland wach Pinyruoth nochako program mar tiego jomoko e tij lendo.

¹⁸ Sama udhi lendo kanyachiel gi Jakristo wadu, inyalo timo ang’o mondo ikonye seche ma owuoyo gi wuon ot? (Som 1 Jo Korintho 3:​6-9.) In bende el Muma mondo isom ndiko ma nyawadu somo. Chik iti malong’o seche ma nyawadu lendo kata wuon ot loso, nimar dipo ka nyawadu okwayi mondo ikonye lero tiend wach moro ne wuon ot. (Ekl. 4:​12) Kata kamano, ket wachni e paro: Kik ing’ad nyawadu sama olendo e yo maber kata kik ing’ad wuon ot sama owuoyo. Ka ing’ado mbakano, inyalo nyoso chuny jalendo wadu kata chocho pach wuon ot. Seche moko, ok rach ka in bende imedo wach moro e mbaka ma dhi nyime. Kata kamano kapo ni iyiero mar chiwo pachi, wuo machwok ahinya. Kae to iwe nyawadu odhi nyime.

¹⁹ Sama in kaachiel gi jalendo wadu uwuotho kuwuok e ot moro ka udhi e machielo, unyalo jiworu e yo mane? Donge unyalo tiyo gi thuolono mondo uwuo kaka unyalo medo bero yore mutiyogo e wuoyo gi weg udi? Tem mondo mbaka migoyo gi nyawadu e wi weg udi manie alworano kik bed mbaka manyoso chuny. E wi mano, kik idonj e obadho mar wuoyo marach e wi owete gi nyimine. (Nge. 18:24) Kinde duto onego waket e paro ni wan dhano morem. Kuom ng’wono mare, Jehova osemiyowa mwandu ma en tich mar lando wach maber kendo ochikowa kaka onego walande. (Som 2 Jo Korintho 4:​1, 7.) Omiyo, waduto wanyiso ni wamor gi migawo majaber momiwani kuom timo duto mwanyalo mondo wachop migawo marwa mar bedo joland-injili mabeyo.